ПауэрлифтингымкIэ зэIухыгъэ зэнэкъокъоу «Кубок Черного моря Pride Family» зыфиIорэр къалэу Геленджик щыкIуагъ. Урысыем ишъолъыр 11-мэ ыкIи икъэлэ 21-мэ къарыкIыгъэ спортсмен анахь лъэшхэр мыщ щызэрэугъоигъэх.
Адыгэкъалэ щыщ Тэтэрхэу Рустамрэ Расулрэ турнирым хэлэжьагъэх ыкIи гъэхъэгъэшIухэр ашIыгъэх. Ятэрэ ыкъорэ якъэлэ гупсэ, яспорт клуб ыкIи республикэр зэрифэшъуашэу къагъэлъэгъуагъ, лъэныкъо зэфэшъхьафхэмкIэ дышъэ медалих къахьыгъ. АщкIэ Адыгеим пэрытныгъэр ыубытыгъ. Илъэс 12 зыныбжь Расул килограмм 52-м нэс къэзыщэчыхэрэм якуп хэтыгъ, ащ килограмм 70-рэ къыIэтыгъ ыкIи текIоныгъэр къыфагъэшъошагъ. Джащ фэдэу илъэс 13 — 15 зыныбжьхэми ар янэкъокъугъ. Лъэныкъоу «экстремальнэ бицепс» зыфиIорэм штангэр гъогогъу 45-рэ къыщиIэтыгъ, «народнэ жимым» килограмм 27,5-рэ къэзыщэчырэ пкъыгъор гъогогъу 25-рэ ыгъэцэкIагъ. Илъэс 38-рэ зыныбжь Тэтэр Рустами икIалэ ыуж къинагъэп, дышъэ медаль заулэ къыхьыгъ, иунэе рекорд ыгъэуцугъ.
ПауэрлифтингымкIэ дунаим и Кубок икъыдэхын фэгъэхьыгъэ зэнэкъокъум спортсменхэм джырэ уахътэм зыфагъэхьазыры.