Физкультурникым и Мафэ тефэу зипсауныгъэ зыгъэпытэ зышIоигъохэм апае республикэм икъэлэ шъхьаIэ спорт Iофтхьэбзэ гъэшIэгъон щырагъэкIокIыщт. ШышъхьэIум и 8-м кушъхьэфэчъэ спортыр зыгу рихьыхэрэр Мыекъуапэ иурам шъхьаIэхэм къарычъэщтых. Мыщ икIэщакIор АР-м физическэ культурэмкIэ ыкIи спортымкIэ и Комитет.
Iофтхьабзэр пчэдыжьым сыхьатыр 6-м рагъэжьэщт. Ащ хэлэжьэщтхэм ятхын Мыекъуапэ игупчэу «Зэкъошныгъэм» (мэщытым дэжь) сыхьатыр 5-м щаублэщт.Зыныбжь илъэс 16-м нэсыгъэхэр спорт мэфэкIым хэлэжьэнхэ алъэкIыщт. ЗэхэщакIохэм анахьэу анаIэ зытырагъэтырэр щынэгъончъэным ишапхъэхэр гъэцэкIэгъэнхэр ары. Ащ къыдыхэлъытагъэу зызыушэты зышIоигъохэм шъхьэр зыухъумэрэ пкъыгъор (шлемыр) ыкIи техническэу шапхъэхэм адиштэрэ кушъхьэфачъэр агъэфедэнхэ фае.Гъогууанэр урамхэу Пионерскэм, Пролетарскэм, Краснооктябрьскэм ыкIи М. Горькэм ыцIэ зыхьырэм апхырыкIыщт.АР-м физическэ культурэмкIэ ыкIи спортымкIэ и Комитет автомобилыр зыгъэIорышIэхэрэм зафегъазэ Iофтхьабзэм хэлажьэхэрэм ящынэгъончъагъэ ухъумэгъэным анаIэ тырагъэтынэу, шышъхьэIум и 7-м пчыхьэм къыщегъэжьагъэу и 8-м мафэм сыхьатыр 12-м нэс яавтотранспорт мы урамхэм щамыгъэзекIонэу.