М. Гордышов
Цифрэ шIыкIэм лъэныкъо пстэур тегъэхьэгъэныр, ащ епхыгъэу тихэгъэгу къыщаугупшысырэ фэIо-фашIэхэр щыIэныгъэм щыпхырыщыгъэнхэр, ошIэ-дэмышIэ Iоф къэхъугъэмэ, цIыфхэм макъэ языгъэIущт системэм изегъэушъомбгъун — мыхэм ыкIи нэмыкIхэм ащытегущыIагъэх Адыгеим и ЛIышъхьэу КъумпIыл Муратрэ Iахьзэхэлъ обществэу «Ростелекомым» Краснодар краимкIэ икъутамэ ипащэу агъэнэфэгъэ Руслан Юсуповымрэ IофшIэгъу зэIукIэгъоу зэдыряIагъэм.
ЗэдэгущыIэгъум хэлэжьагъэх АР-иминистрэхэм я Кабинет и Тхьаматэу КIэрэщэ Анзаур, ащ игуадзэу, цифрэ хэхъоныгъэхэмкIэ, къэбарлъыгъэIэс ыкIи телекоммуникационнэ технологиехэмкIэ министрэу Шыу Заурбэч, Правительствэм ипащэ игуадзэу, финансхэмкIэ министрэу Виктор Орловыр, «Ростелекомым» Краснодар краимкIэ икъутамэ ипащэ игуадзэу Бжьэмыхъу Азамат.КъумпIыл Мурат пстэумэ апэу Руслан Юсуповыр «Ростелекомым» икъутамэ ипэщэ IэнатIэ зэрэIуагъэхьагъэм фэшI фэгушIуагъ. Ащ ыпэкIэ ар Тульскэ ыкIи Рязанскэ хэкухэм ащыIэ къутамэхэм япэщагъ.
АР-м и ЛIышъхьэ къызэрэхигъэщыгъэмкIэ, лъэныкъо зэфэшъхьафхэмкIэ, гущыIэм пае, цифрэ шIыкIэм ипхырщын, цифрэ щынэгъончъагъэм афэгъэхьыгъэу лъэпкъ проектхэм, къэралыгъо программэхэм къащыдэлъытагъэхэм ягъэцэкIэнкIэ, псэупIэхэм интернетыр аIэкIэгъэхьэгъэнымкIэ, икъу фэдизэу зэпхыныгъэм иамалхэр гъэфедэгъэнхэмкIэ, ошIэ-дэмышIэ Iоф къэхъугъэмэ цIыфхэм макъэ языгъэIущт шъолъыр системэм изегъэушъомбгъункIэ компанием дэлэжьэнэу республикэр фэхьазыр.«Лъэныкъо пэпчъ цифрэ шIыкIэм тегъэхьэгъэным, ащ епхыгъэу тихэгъэгу къыщаугупшысыгъэ фэIо-фашIэхэр щыIэныгъэм щыпхырыщыгъэнхэм, къэбарлъыгъэIэс технологием, телекоммуникационнэ инфраструктурэм зягъэушъомбгъугъэным алъэныкъокIэ зэшIохыгъэн фэе пшъэрылъыбэ тапашъхьэ ит. «Ростелекомым» ащ фэдэ проектхэр шъолъырхэм ащыпхырыщыгъэнхэмкIэ опытышхо иI. Ащ иамалхэр тапэкIи къызэрэтшъхьэпэщтхэм сицыхьэ телъ», — къыIуагъ КъумпIыл Мурат.Руслан Юсуповыр уахътэм къыздихьыгъэ цифрэ шIыкIэхэм шъолъырхэм зыщягъэушъомбгъугъэным пае зэшIуахыхэрэм къатегущыIагъ. Аужырэ илъэситфым лъэпкъ программэу «Ростелеком» зыфиIорэм къыщыдэлъытагъэу культурэм иучреждениеу Адыгеим итхэм ащыщэу 86-мэ интернетыр афитIупщыгъ. Ахэм ащыщых тхылъеджапIэхэр, искусствэмкIэ еджапIэхэр, муниципальнэ музейхэр, нэмыкI социальнэ псэуалъэхэр.Джащ фэдэу цифрэ шIыкIэм игъэфедэнкIэ зэфэмыдэныгъэр дэгъэзыжьыгъэным фытегъэпсыхьэгъэ федеральнэ программэм къыщыдэлъытагъэу псэупIэ цIыкIухэм зэпхыныгъэм истанциеу 8 ащитIупщыгъ, «Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым къыдэлъытагъэу хьылъэзещэ автомашинэхэр къэзыщэчырэ псэуалъэу 6, АР-м итранспорт системэ хэхъоныгъэ егъэшIыгъэнымкIэ шъолъыр программэмкIэ 2 ыгъэуцугъ.А зэпстэумэ анэмыкIэу адыгэ къуаем ифестиваль изэхэщэн компаниер хэлажьэ. Iофтхьабзэм къекIуалIэхэрэм интернетыр агъэфедэн алъэкIыным ащ ынаIэ тет ыкIи фестивалыр зэрэкIорэр занкIэу эфирым къыщегъэлъагъо.«Зэпхыныгъэм ыкIи интернетым алъэныкъокIэ лъэхъаным къыздихьыгъэ фэIо-фашIэхэр цIыфхэм, бизнесым къызIэкIэгъэхьэгъошIу афэхъунхэм фэшI «оптическэ инфраструктурэм» хэхъоныгъэ егъэшIыгъэным лъэшэу тыпылъ. Адыгеим ипсэолъэшIхэм ыкIи хъызмэтшIапIэхэм ащыщыбэм титехнологиехэр, тихэгъэгу къыщаугупшысыгъэ шIыкIэхэр псэупIэ-коммунальнэ хъызмэтым, къэбарлъыгъэIэсыныр щынэгъончъэгъэным, видеолъыплъэным ащагъэфедэх. «Ростелекомыр» цIыфыр тыдэ щыпсэуми, скоростышхо зиIэ интернетыр къызIэкIэгъэхьэгъошIу фэхъуным ыуж ит», — къыIуагъ Руслан Юсуповым.ЗэдэгущыIэгъум къызэрэщыхагъэщыгъэмкIэ, 2026-рэ илъэсым иапэрэ мэзих пштэмэ, тишъолъыр щыпсэурэ унэгъо мини 6-м ехъумэ оптическэ интернетыр афитIупщыгъ. ПстэумкIи Адыгеим ит унэ 90-мэ компанием интернет арищэлIагъ.Шъолъырым ипащэ зэIукIэгъум икIэухым цифрэ шIыкIэм зегъэушъомбгъугъэным ылъэныкъокIэ лъэпкъ гухэлъхэм ягъэцэкIэн «Ростелекомыр» къыхагъэлэжьэнэу, социальнэ мэхьанэ зиIэ программэхэмрэ проектхэмрэ япхырыщынкIэ компанием иамалхэр агъэфедэнхэу АР-м иминистрэхэм я Кабинет пшъэрылъ фишIыгъ.АР-м и ЛIышъхьэипресс-къулыкъу къытыгъэкъэбархэмкIэ ХЪУТ Нэфсэт.