АР-м хэгъэгу кIоцI IофхэмкIэ и Министерствэ и Эксперт-криминалистическэ гупчэ экспертизэхэмкIэ, биологическэ объектхэм яушэтынкIэ ыкIи геномнэ къэбархэм яучеткIэ иотделение апэрэ ДНК-лабораторие къыщызэIуахыгъ.
Адыгеим и ЛIышъхьэу КъумпIыл Муратрэ Урысыем хэгъэгу кIоцI IофхэмкIэ и Министерствэ и Эксперт-криминалистическэ гупчэ ипащэу Вадим Казьминымрэ IофшIэпIакIэу къызэIуахыгъэм щыIагъэх ыкIи ащ амалэу иIэхэм защагъэгъозагъ.Iофтхьабзэм хэлэжьагъэх Адыгеим и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м хэгъэгу кIоцI IофхэмкIэ иминистрэу Олег Безсмельницыныр, АР-м хэгъэгу кIоцI IофхэмкIэ и Министерствэ иподразделениехэм япащэхэмрэ яIофышIэхэмрэ.Адыгеим и ЛIышъхьэ АР-м хэгъэгу кIоцI IофхэмкIэ и Министерствэ иIофышIэхэм лабораториер къызэрэзэIуахыгъэмкIэ афэгушIуагъ, нэмыкI шъолъырхэм арамыгъэхьэу мыщ экспертизэхэр щашIынэу амал зэряIэщтыр къыхигъэщыгъ. Экспертизэхэм уахътэу апэIухьэрэм ащ къыкIыригъэчыщт, пэшIорыгъэшъ зэхэфынхэри нахь псынкIэу зэхащэн алъэкIыщт. ДНК-ушэтынхэм IофшIэныр къызэрагъэпсынкIэщтым имызакъоу, геномнэ къэбархэмкIэ Федеральнэ базэми ищыкIэгъэ къэбархэр рагъэхьащтых. Ащ ишIуагъэкIэ бзэджэшIагъэхэр нахь псынкIэу зэхафын, цIыфэу кIодыгъэхэр къагъотыжьын зэралъэкIыщтыр Iофтхьабзэм щыхагъэунэфыкIыгъ.«Тэ анахьэу тынаIэ зытедгъэтырэр цIыфхэм ящынэгъончъагъ ары. Республикэм иполицейскэхэм а лъэныкъомкIэ Iофышхо агъэцакIэ. Ахэм яIофшIэн хэшIыкIышхо зэрэфыряIэм, зэрэзэдеIэжьхэрэм яшIуагъэкIэ мы аужырэ илъэсныкъом хэгъэгум ишъолъыр анахь щынэгъончъэхэм ястатус Адыгеим къыгъэнэжьын ылъэкIыгъ. ДНК-лабораториер къызэрэзэIуахыгъэм къыхэкIэу джыри нахь шIуагъэ къытэу Iоф ашIэн алъэкIыщт. Тэри, полицейскэхэми, нэмыкI хэбзэухъумэкIо къулыкъухэми лъэныкъо пстэумкIи IэпыIэгъу тапэкIи тафэхъущт. Iоф зэрэзэдэтшIэщт лъэныкъохэр дгъэнэфэгъахэх, ахэм ягъэпытэн ыуж титыщт, — къыIуагъ КъумпIыл Мурат.Лабораториер къызэIуахы зэхъум джащ фэдэу къэгущыIагъэх Урысыем хэгъэгу кIоцI IофхэмкIэ и Министерствэ и Эксперт-криминалистическэ гупчэ ипащэу Вадим Казьминыр, АР-м и Къэралыгъо Совет — Хасэм и Тхьаматэу Владимир Нарожнэр, АР-м хэгъэгу кIоцI IофхэмкIэ иминистрэу Олег Безсмельницыныр.Лабораторием иIофышIэхэм химикэ-биологическэ гъэсэныгъэ яI, Урысыем хэгъэгу кIоцI IофхэмкIэ и Министерствэ и Эксперт-криминалистическэ гупчэ щырагъэджагъэх, япшъэрылъхэм ягъэцэкIэн фэхьазырых. АР-м хэгъэгу кIоцI IофхэмкIэ иминистрэ республикэм и ЛIышъхьэ риIуагъ мылъкукIи, техникэкIи нахь зэтегъэпсыхьагъэ хъунхэмкIэ IэпыIэгъу къызэрафэхъурэм фэшI зэрэфэразэр.Адыгеим и ЛIышъхьэ лабораторием иIофышIэхэм адэгущыIагъ, IофшIэкIэ амалэу щыIэхэм защигъэгъозагъ. Криминалистхэм къызэраIуагъэмкIэ, тихэгъэгу къыщыдагъэкIырэ оборудованиер лабораторием къыфащэфыгъ. Биоматериал зэфэшъхьафхэм адэлэжьэнхэу мыщ амал щыряIэщт. БзэджашIэхэм алъыхъухэ зыхъукIэ, мыщ фэдэ ушэтын лъэпкъ зэфэшъхьафхэр республикэм иполицейскэхэм къызфагъэфедэнхэ алъэкIыщт.АР-м и ЛIышъхьэ ипресс-къулыкъу къытырэ къэбархэмкIэЛIышэ Саныет