Делэкъо А.
АР-м хэдзынхэмкIэ и Гупчэ комиссие тыгъуасэ я 87-рэ зэхэсыгъоу иIагъэм Iофыгъо 24-мэ ащыхэплъагъэх. Iофтхьабзэр зэрищагъ ащ и Тхьаматэу Сэмэгу Нурбый.
Iоныгъом и 20-м щыIэщт хэдзынхэм ахэлэжьэщт кандидатхэм ягъэнэфэн лъэкIуатэ. Урысые Федерацием и Федеральнэ ЗэIукIэ и Къэралыгъо Думэ иябгъонэрэ зэIугъэкIэгъумкIэ политическэ партиеу «Новые люди» зыфиIорэм къыгъэлъэгъогъэ Рашид Цахаевым итхылъхэр шапхъэхэм зэрадиштэрэр АР-м хэдзынхэмкIэ и Гупчэ комиссие хэтэу Юрий Овчаровым къыIуагъ, ащ икандидатурэ комиссием хэтхэм дырагъэштагъ ыкIи депутатынымкIэ кандидат зэрэхъугъэр къэзыушыхьатырэ тхылъыр ратыжьыгъ. Нэужым Адыгэ Республикэм и Къэралыгъо Совет — Хасэм ияенэрэ зэIукIэгъу идепутатынымкIэ кандидат 20 агъэнэфагъ, тхылъхэр аратыжьыгъэх.Iофтхьабзэм нэмыкI зигъо Iофыгъохэми ащытегущыIагъэх. Ахэм ащыщ сэкъатныгъэ зиIэхэр хэдзынхэм ахэлэжьэнхэмкIэ IэпыIэгъу афэхъущт гуфакIохэр гъэнэфэгъэнхэр. Ащ епхыгъэ Iофыгъоу зэшIохыгъэн фаехэм АР-м хэдзынхэмкIэ и Гупчэ комиссие хэтэу Виктор Хижняк ащигъэгъозагъэх.ДЕЛЭКЪО Анет.