ЯIофшIэн зэфахьысыжьыгъ

Адыгэ Республикэм хэгъэгу кIоцI IофхэмкIэ и Министерствэ иколлегие изэхэсыгъо 2026-рэ илъэсым имэзих Iофэу ышIагъэм зэфэхьысыжьхэр щыфишIыгъэх.

Iофтхьабзэм хэлэжьагъэх Адыгэ Республикэм хэгъэгу кIоцI IофхэмкIэ иминистрэу, полицием игенерал-майорэу Олег Безсмельницыныр, ащ игуадзэхэу Лъэустэнджэл Махьмуд, Андрей Остапенкэр, Владимир Лавровыр, министрэм игуадзэ ипшъэрылъхэр зыгъэцакIэхэу Лариса Шубинар ыкIи Максим Олейниковыр, джащ фэдэу республикэ министерст­вэм икъулыкъухэм ыкIи иструктурнэ подразделениехэм яаппарат, районхэм ащыIэ отдел­хэм япащэхэр.Коллегием изэхэсыгъо къызэIуихызэ, Олег Безсмельницыным зытегущыIэщтхэ Iофыгъохэр къыгъэнэфагъэх: 2026-рэ илъэсым мэзихэу пыкIыгъэм Iофэу ашIагъэм зэфэхьысыжьхэр зэ­рэфашIыщтхэм фэшъхьафэу, ятIонэрэ илъэсныкъомкIэ пшъэ­рылъхэр агъэуцущтых.Хэбзэукъоныгъэм ылъэны­къокIэ мэзихым Адыгеим изытетыгъэм фэгъэхьыгъэ доклад къышIыгъ республикэ МВД-м иштаб ипащэу, полковникэу Максим Черносмагэм. Къулыкъум ипащэхэм ащыщ къызэ­рэхигъэщыгъэмкIэ, шъолъыр министерствэм иIофышIэмэ общественнэ щынэгъончъэным ылъэныкъокIэ япшъэрылъхэр щытхъу пылъэу агъэцакIэх.Максим Черносмагэ къыхигъэщыгъ аужырэ илъэс заулэхэм Адыгеим бзэджэшIагъэу щызэрахьэрэр нахь макIэ зэ­рэхъугъэр. 2026-рэ илъэсым иапэрэ мэзих пштэмэ, бзэ­джэшIагъэхэр процент 27,5-м нэсэу къеIыхыгъэх, бзэджэ­шIэгъэ хьылъэхэр ыкIи хьылъэ дэдэхэр ызыщанэ фэдизкIэ нахь макIэх. АмышIа­хэу цIыфым ипсауныгъэ зэщызы­гъакъоу, ащ къыхэкIэу дунаир езыгъэхъожьырэм ебэныным ыкIи автомобильхэр атыгъунхэм афэгъэхьыгъэ бзэджэшIагъэ зэрахьагъэу агъэунэфыгъэп.БзэджэшIэгъэ хьылъэхэм ыкIи хьылъэ дэдэхэм якъызэIухынкIэ Урысые Федерацием ишъолъыр дэгъуитфымэ министерствэр ахэфагъ.2026-рэ илъэсым иятIонэрэ мэзих анахьэу анаIэ зытыра­дзэнэу ыкIи яIофшIэн зыщагъэ­лъэшынэу агъэнафэхэрэм ащыщых терроризмэм ыкIи экстремизмэм, наркотикхэмрэ Iашэ­хэмрэ хэбзэнчъэу къызэрэрагъэкIокIыхэрэм, кощын Iофхэм япхыгъэ хэбзэ­укъоныгъэхэм апэу­цужьыгъэныр, джащ фэ-дэу зыныбжь имыкъугъэмэ бзэ­джэшIагъэу зэрахьан алъэкIыщт­хэр пэшIорыгъэшъэу къыхэ­гъэ­щы­гъэн­хэм дэлэжьэгъэныр.ЫпэкIэ зэрэщытыгъэм фэдэу, къулыкъум иIэшъхьэтетхэр лъэп­лъэх къэралыгъо фэIо-фашIэхэр игъом ыкIи хэбзэгъэуцугъэхэм адиштэу агъэцэкIэнхэм, материальнэ-техническэ базэр гъэпытэгъэным , Адыгеим иполицие икъулыкъушIэхэр гъэхьазырыгъэнхэм.Щытхъу пылъэу къулыкъур зыхьыхэрэр коллегием изэхэсыгъо къыщыхагъэщыгъэх, ахэм медальхэр, щытхъу ыкIи рэ­зэныгъэ тхылъхэр министрэу Олег Безсмельницыным аритыжьыгъэх.