Адыгеим ичIыгулэжьхэм бжыхьэсэ лэжьыгъэм иIожьын аухы. АР-м мэкъу-мэщымкIэ и Министерствэ шышъхьэIум и 4-м къызэритыгъэмкIэ, гектар 112212-у апхъыгъагъэм ипроцент 95-р, ар гектар 106305-рэ мэхъу, Iуахыжьыгъах.
Хьэм иIожьын аухыгъ. ПстэумкIи ар гектар 8491-рэ хъущтыгъ. ГурытымкIэ гектарым центнер 33,1-рэ къырахыгъ, тонн 28069,8-рэ къаугъоижьыгъ.Бжыхьэсэ коцым гектар 90005-рэ рагъэубытыгъагъ. Ащ щыщэу мини 5-м ехъу ныIэп къэнагъэр. ГухэкIыми, ощх зэпымыужьэу мыгъэ щыIагъэм иягъэ ригъэкIыгъ. Тимэкъумэщ хъызмэтшIапIэхэм блэкIыгъэ илъэсхэм къырахыжьыщтыгъэм мыгъэ бэу къыщыкIагъ. Зы гектарым гурытымкIэ центнер 42,9-рэ ныIэп къытырэр, тонн 363518-рэ къаугъоижьыгъ. Лэжьыгъэ бэгъуагъэ илъэс къэс къизыхыжьыщтыгъэ тичIыгулэжьхэмкIэ ар макIэ.Ахэм анэмыкIэу чылапхъэ ашIыщт рапсэу гектар 13586-рэ яIагъ. Ар ощххэм «агъащтэрэп», арышъ, изытет фермерхэр егъэразэх. Мы уахътэм гектар 12978-р аIожьыгъах, зы гектарым гурытымкIэ центнер 24-рэ къеты. Ар къэгъэлъэгъон дэгъу. Джащ фэдэу тритикалер гектари 130-рэ мэхъу, ащ 80-р хагъэкIыгъ, гурытымкIэ гектарым центнер 32-рэ къеты.Бжыхьасэхэр анахь макIэу зиIэгъэ муниципальнэ образованиехэм, Мыекъуапэрэ Адыгэкъалэрэ, яIухыжьын аухыгъ. Бэу зылэжьыхэрэр пштэхэмэ, Кощхьэблэ ыкIи Шэуджэн районхэм ячIыгулэжьхэр апэ итых. Бжыхьэсэ лэжьыгъэу апхъыгъагъэм зэфэдизэу, ар процент 98-рэ, ахэм хагъэкIыгъ.Кощхьэблэ районым пстэумкIи бжыхьэсэ гектар 18986-рэ иIагъ, Iуихыжьыгъэр 16871-р ары. Апхъыгъагъэм щыщэу 15284-р коцым рагъэубытыгъагъ, 14833-р Iуахыжьыгъ, гектарым центнер 46,6-рэ гурытымкIэ къырахы.Шэуджэн районым ичIыгулэжьхэм гектар 17324-рэ бжыхьасэу апхъыгъагъ, 15910-р аIожьыгъах. Коцэу мы районым щыхалъхьагъэр гектар 14500-рэ хъущтыгъ, къэнагъэр 200-м ехъу ныIэп. Зы гектарым, гурытымкIэ лъытагъэу, центнер 48,5-рэ къеты. КъырахыжьырэмкIи ахэр апэ итых.ПстэумкIи комбайнэ 262-мэ республикэм ибжыхьасэхэр Iуахыжьых. Ахэм лэжьыгъэр зытырахыгъэу пстэумкIи гектар 56896-м уарзэр щаупкIэтэжьыгъах, 5235-р ажъожьыгъ.Лэжьыгъэр зыIуахыжьырэм ыуж ар зэрэIуагъэкIыщт уасэр чIыгулэжьхэм Iофыгъоу яIэхэм ащыщ. Мыгъэ пыут. АР-м мэкъу-мэщымкIэ и Министерствэ тызэрэщигъэгъозагъэмкIэ, хьэм соми 9 — 10, коцэу я 4-рэ класскIэ кIорэм 10 — 11, рапсым сомэ 27 — 29-рэ (хэбзэIахьэу хэкIыщтыри къыдэлъытагъэу) зы килограммым ыуас. ГухэкIыми, мыщ къыхагъэхъожьы, мы уахътэм къухьэуцупIэхэм къиныгъохэр зэряIэхэм ыпкъ къикIэу коцым иушъэни, иIугъэкIыни къызэтырагъэуцуагъэх.ХЪУТ Нэфсэт.