«Полярис-Адыгея»
Дронхэм ягъэзекIонкIэ Къыблэ федеральнэ шъолъырым ипервенствэ къалэу Ростов-на-Дону щыкIуагъ.
Адыгэ Республикэм ихэшыпыкIыгъэ командэ мыщ дэгъу дэдэу зыкъыщигъэлъэгъуагъ, тиспортсменхэм медаль 11 къахьыгъ: дышъэу — 5, тыжьынэу — 4, джэрзэу — 2.Зэнэкъокъум хэлэжьагъэхэм къахэщыгъэх тишъолъыр щыпсэухэрэ зэшыпхъухэу Елена ыкIи Анастасия Синицинхэр. Еленэ Кубокэу «Легенда гонок дронов» зыфиIорэр къыфагъэшъошагъ, джащ фэдэу дышъэ медали 4 ыкIи джэрзэу 2 къыхьыгъ. Анастасии къэгъэлъэгъон дэгъухэр иIэх. Ащ тикомандэ дышъэ медали 2, тыжьынэу 2 ыкIи зы джэрз къыфихьыгъ.
Сэнаущыгъэ зыхэлъ кIэлэцIыкIухэм IэпыIэгъу афэхъурэ шъолъыр гупчэу «Полярис-Адыгеям» лъэныкъоу «Фиджитал спортыр. БПЛА-м игъэзекIон» зыфиIорэм щеджэхэрэми гъэхъэгъэшIухэр ашIыгъэх. Евгений Поляковым ныбжьыкIэхэр егъасэх. Матвей Вереневым текIоныгъэр къыдихыгъ, Тимофей Белоножкэм лъэныкъоу «техническэ симулятор» зыфиIорэм тыжьын медаль къыщихьыгъ.Тиспортсменхэм ыкIи ахэр зыгъасэхэрэм тафэгушIо, тапэкIи мыщ фэдэ гъэхъэгъэшIухэр ашIынхэу, Урысыем ипервенствэу зэхащэщтым зэрифэшъуашэу зыкъыщагъэлъэгъонэу, текIоныгъакIэхэр къыдахынхэу афэтэIо.
