Е. Кривко
Зи Хэкужъ къэзыгъэзэжьыгъэм и Мафэ Адыгеим щыхагъэунэфыкIыгъ.
Хабзэм иIофышIэхэр, общественнэ зэхахьэхэм ялIыкIохэр, республикэм щыпсэухэрэр, хьакIэхэр, мэфэкIыр къызщежьагъэхэу Хэкужъым къэзыгъэзэжьыгъэхэр ЗыкIыныгъэмрэ ЗэгурыIоныгъэмрэ ягупчэ щызэIукIагъэх. ЗичIыгу зыгъотыжьыгъэхэм джыри зы илъэсэу атэ хэкум щагъэкIуагъэм зэфэхьысыжьхэр фашIыгъэх.Иорданием, Сирием, Тыркуем, Израиль ыкIи нэмыкI къэралхэм къарыкIыжьыгъэ адыгэ нэбгырэ минитIурэ ныкъорэ фэдиз непэ республикэм щэпсэу. Ахэм цIыфышъхьэ пчъагъэр къагъэбаигъэ къодыеп, республикэм ищыIэныгъэ, ихэхъоныгъэ сыд фэдэрэ лъэныкъокIи яIахьышIу халъхьэ. Илъэсхэр тешIэ къэс, апэрэ лъэбэкъоу хэхэс адыгэхэм якъегъэзэжьынкIэ республикэм ышIыгъагъэм имэхьанэ мэлъэшы. Ар игущыIэ къыщыхигъэщыгъ АР-м и ЛIышъхьэ ыцIэкIэ пчыхьэзэхахьэм къыщыгущыIэгъэ министрэхэм я Кабинет и Тхьаматэ игуадзэу Хъоткъо Хъызыр.— ИчIыгогъухэм якъегъэгъэзэжьын мэхьанэу ритырэр зыфэдэр, зыщыщ лъэпкъым емылъытыгъэу цIыфхэм ыIэ афищэиным зэрэфэхьазырыр Урысыем дунаим къыригъэлъэгъугъ. Ар къыщиушыхьатыжьыгъ 2011-рэ илъэсым Сирием, — къыIуагъ ащ.Хабзэ зэрэхъугъэу, мэфэкIым къыдыхэлъытагъэу Адыгеим итворческэ купхэм, орэдыIохэм яконцерт пчэгум щыкIуагъ, лъэпкъ IэпэIасэхэм яIэшIагъэхэм якъэгъэлъэгъони зэхащагъ. Адыгэ джэгур пчыхьэзэхахьэм кIэух фэхъугъ.