Цэй З.
Адыгэ Республикэм лъэпкъ культурэмкIэ и Гупчэ, тарихъ-культурнэ кIэным икъэухъумэнкIэ Фондэу «КIэныр», АР-м культурэмкIэ и Министерствэ зэгъусэхэу проектэу «QR-зекIоныр: Адыгеир къызэIух» зыфиIорэм игъэцэкIэн дэлажьэх. Культурнэ, тарихъ ыкIи чIыопс баиныгъэу шъолъырым иIэр непэрэ щыIакIэм диштэрэ шIыкIэхэмкIэ цIыфхэм алъыгъэIэсыгъэным Iофтхьабзэр фэIорышIэ.Мы проектым игъэцэкIэн къыдыхэлъытагъэу «Адыгеир кадрэм итэу: илъэгъупхъэ чIыпIэхэр» зыфиIорэ зэнэкъокъу зэхащэгъагъ. Дизайн-макет анахь дэгъу къашIынымкIэ шIоигъоныгъэ зиIэу зыныбжь илъэс 18-м ехъугъэхэр ащ хэлэжьэнхэ фитыгъэх.Яблоновскэм къикIыгъэ Жьэлкъэщый Айнарэ зэнэкъокъум зыкъыщызыгъэлъэгъуагъэхэм ащыщ.Мэхьанэшхо зиIэ чIыпIэу Адыгеим итхэм нахь игъэкIотыгъэу Айнарэ защигъэгъозагъ, ыгукIэ нахь пэблагъэхэр къыхихыгъэх, дизайн-макетитIу ышIыгъ.— Испунэхэр гъэшIэгъон дэдэх. Ахэм апылъ къэбар шъыпкъэм джы къызнэсыгъэми тызэрэщымыгъуазэм узIэпещэ. Шъэфэу къыздырахьакIырэр сиIофшIагъэ къыщизгъэлъэгъукIы сшIоигъуагъ. ШIуцIэ-фыжь теплъэ иIэу ар сшIыгъэ. ЯтIонэрэр — Хьаджыкъо тIуакIэм фэгъэхьыгъ. Ащ фэдэ чIыпIэ дахэ щыI Iоу сшIэрэп. Апэрэм елъытыгъэмэ, шъо зэфэшъхьафхэр бэу згъэфедагъэх, — еIо Жьэлкъэщый Айнарэ.Яблоновскэ къэзыгъэлъэгъогъэ пшъашъэм апэрэ ыкIи ящэнэрэ чIыпIэхэр зэнэкъокъум къыщихьыгъэх.— ТекIоныгъэ къыдэзыхыгъэхэм яIофшIагъэхэр щыгъынхэм ыкIи Iалъмэкъхэм атешIыхьагъэхэу пчъагъэкIэ 500-м нэсэу къыдэдгъэкIыщтых. QR-кодэу атетыщтхэм Адыгеим ичIыпIэхэм афэгъэхьыгъэ къэбархэр къарыпхышъущтых. КъэIогъэн фае, дунэе хъытыум нэпцI къэбархэр къыратхэхэу бэрэ къыхэкIы. Тарихъ шъыпкъэу апылъыр цIыфхэм тэрэзэу алъыдгъэIэсы тшIоигъу. Ары мыщ фэдэ Iофтхьабзэхэм ямэхьэнэ шъхьаIэр, — къыхегъэщы проектэу «QR-зекIоныр: Адыгеир къызэIух» зыфиIорэр зигукъэкIэу Хьабый Пщымаф.Гран-прир къэзыхьыгъэр «Хьаджыкъо испун» зыцIэ IофшIагъэу Василиса Сураевам ыгъэхьазырыгъэр ары. ЗэкIэмкIи нэбгыри 115-рэ зэнэкъокъум хэлэжьагъ. Ахэм ащыщэу 7-р анахь дэгъоу алъытагъ. Щытхъу тхылъхэмрэ шIухьафтынхэмрэкIэ зэфэхьысыжь зэхахьэм ахэр къыщыхагъэщыгъэх.Цэй Замир.