Къэралыгъо IэпыIэгъум зырагъэушъомбгъу

Къэралыгъо фондэу «Хэгъэгум иухъумакIохэр» зыфиIо­рэм ишъолъыр къутамэ хэушъхьафыкIыгъэ дзэ операцием хэлэжьагъэхэм ыкIи ахэм яунагъохэм аригъэгъотырэ Iэпы­Iэгъум изегъэушъомбгъун лъегъэкIуатэ.

А IофшIэным илъэныкъо шъхьаIэхэм ащыщ ясэнэхьат зыкъыхагъотэныр ыкIи яунэе Iоф агъэпсыныр.Ащ епхыгъэу зэIукIэгъоу «УиIоф мэкъумэщ хъызмэтым къыщегъажь» зыфиIорэр шъолъыр фондым щыкIуагъ. Iофтхьабзэм хэлэжьагъэх езыгъэжьэ­гъэкIэ предпринимательхэм IэпыIэгъу афэхъурэ къулыкъухэм ялIыкIохэр, фон­дэу «Хэгъэгум иухъумакIохэр» зыфи­Iорэм икъутамэ ипащэ иапэрэ гуадзэу НэмытIэкъо Юныс, хэушъхьафыкIыгъэ дзэ операцием хэлэжьагъэхэр, ахэм яунагъохэр, нэмыкIхэр.ЗэIукIэгъум къыщыгущыIагъэх АР-м мэкъу-мэщымкIэ иминистрэ игуадзэу Шъэожъ Абрек, Iахьзэхэлъ обществэу «Россельхозбанкым» и Краснодар шъо­лъыр къутамэ икредитнэ аналитик шъхьа­Iэу Нина Болдаревар, АР-м предпринимательхэм IэпыIэгъу ягъэгъоты­гъэнымкIэ и Гупчэу «Мой бизнес» зыфиIорэм иотдел ипащэу Теуцожь Азэмат.

— Фондым ипшъэрылъ шъхьаIэхэм ащыщ хэушъхьафыкIыгъэ дзэ операцием иветеранхэм ясэнэхьат епхыгъэу щыIэныгъэм зыкъыхагъотэнымкIэ амалыкIэхэр къафэгъотыгъэнхэр. IэпыIэгъоу щыIэхэр къафэтIотэн закъор арэп зыуж титыр, ягукъэкI зэрэлъыIэсыщтхэ шIыкIэр афэтэгъэнафэ. Джащ пае ащ фэгъэзэгъэ къулыкъухэм ыкIи организациехэм ялIыкIохэр зы чIыпIэм щытыугъоигъэх, зыгъэгумэкIыхэрэ упчIэхэр ахэм афагъэзэнхэшъ, занкIэу джэуапхэр къаратыжьынхэу ыкIи непэкIэ амалэу яIэхэр зыфэдэр ашIэнхэу, — хигъэунэфыкIыгъ НэмытIэкъо Юныс.Специалистхэм къэзэрэугъоигъэхэм къафаIотагъ грант программэу щыIэхэр, зэнэкъокъу шIыкIэм тетэу ахэм узэра­хэлэжьэщтыр, ищыкIэгъэ тхылъхэр зэ­рэбгъэхьазырыщтхэр, нэмыкIхэр.АнаIэ зытырарагъэдзагъэхэм ащыщ грантэу «Агромотиватор» зыфиIорэр. Ар хэушъхьафыкIыгъэ дзэ операцием хэлэжьагъэхэм апае пхыращы. Былым­хъуным зегъэушъомбгъугъэнымкIэ сомэ миллиони 7 ыкIи мэкъумэщ хъызмэтым инэмыкI лъэныкъохэм ащыщхэм сомэ миллиони 5-м кIахьэу ахъщэ IэпыIэгъу а программэм къыдыхэлъытагъ. Мылъкур мэкъумэщ техникэм, оборудованием, былымхэм якъэщэфын, псэолъэшIыным е псэуалъэхэм ягъэкIэжьын апэ­Iуагъэхьан алъэкIыщт.АР-м мэкъу-мэщымкIэ иминистрэ игуадзэу Шъэожъ Абрек къызэриIуа­гъэмкIэ, ветеранхэм агъэпсыгъэ фермер хъызмэтшIапIэхэм хэхъоныгъэ ашIынымкIэ республикэр IэпыIэгъу афэхъу.— Непэ хэушъхьафыкIыгъэ дзэ операцием хэлэжьагъэхэм апае къэралы-гъо IэпыIэгъу гъэнэфагъэхэр щыIэх. Типшъэрылъыр ахэр зэкIэ Iэрыфэгъу шIыгъэнхэр ыкIи узэрахэлэжьэщтхэр агурыгъэIогъэныр ары, — къыхигъэ­щыгъ Шъэожъ Абрек.Iофтхьабзэм хэлэжьагъэхэм гъэсэныгъэ проектэу «Фермерым иеджапIэ» фэгъэхьыгъэу къафаIотагъ, ащ иедзыгъо бжыхьэм рагъэжьэщт. Предприниматель хъущтхэр мыщ щеджэнхэ алъэкIыщт, яунэе IофкIэ шIэныгъэхэр щагъотыщтых ыкIи хэхъоныгъэ ашIынымкIэ проектхэр зэрагъэхьазырыщтхэр арагъэшIэщтых.Ветеранхэм яупчIэхэр специалистхэм афагъэзагъэх, джэуапхэри агъотыжьыгъэх.ХэушъхьафыкIыгъэ дзэ операцием хэлэжьэгъэ Денис Гальцовыр Iофтхьабзэм игуапэу къекIолIагъ, ащ мэкъумэщ хъызмэтым зыфигъэзэн мурад зэриIэр къыIотагъ.— Программэу «Агромотиваторым» амалэу къытыхэрэр игъэкIотыгъэу зэзгъашIэмэ сшIоигъоу сыкъэкIуагъ. ТапэкIэ экологическэ фермэ къызэIусхымэ сшIоигъу, мэлхэмрэ щагу бзыухэмрэ схъущтых. Грант IэпыIэгъур ыкIи «Фермерым иеджапIэ» афэгъэхьыгъэу щызэхэсхыгъэхэр сшIогъэшIэгъон. Къызщебгъэжьэщтыр ыкIи уапэкIэ узэрэ­лъыкIотэщтыр мыщ фэдэ зэIукIэгъухэм къыпфагъэнафэ, — къыддэгощагъ игу­пшысэхэмкIэ ветераныр.Фондэу «Хэгъэгум иухъумакIохэр» зыфиIорэм ишъолъыр къутамэ минис­терствэхэм, финанс организациехэм ыкIи предпринимательствэм IэпыIэгъу фэхъугъэнымкIэ институтхэм адыриIэ зэдэлэжьэныгъэм изегъэушъомбгъун лъегъэкIуатэ. ХэушъхьафыкIыгъэ дзэ операцием иветеранхэм къэралыгъо IэпыIэгъум иамалхэр ашIэнхэмкIэ, зан­кIэу специалистхэм гущыIэгъу афэхъунхэмкIэ, проектэу агъэхьазырхэрэр щы­Iэныгъэм щыпхыращынхэмкIэ мы шIыкIэм ишIуагъэ къэкIо.