IофшIэнымрэ социальнэ хэхъоныгъэмрэкIэ Министерствэр
Адыгеим щызэхащэгъэ къекIокIырэ бригадэхэм ялIыкIохэр щагу пэпчъ лъэIэсых, зыныбжь хэкIотагъэхэм анаIэ атырагъэты, афэгумэкIых.
Урысыем щыпсэурэ нэжъ-Iужъ миллиони 8-м ехъу къекIокIырэ бригадэхэмкIэ ыкIи социальнэ фэIо-фашIэхэр зыгъэцэкIэрэ гупчэхэмкIэ IэпыIэгъу агъоты. А программэм Адыгэ Республикэри хэлажьэ.АР-м IофшIэнымрэ социальнэ хэхъоныгъэмрэкIэ и Министерствэ зыныбжь хэкIотагъэхэу пэIудзыгъэ ыкIи къоджэ псэупIэхэм ащыпсэухэрэм IэпыIэгъу ягъэгъотыгъэнымкIэ къекIокIырэ бригадэхэм яIофшIэн исистемэ гъэнэфагъэу, шIуагъэ къытэу зэхищагъ.Республикэм ащ фэдэ бригадэ 20 ит, нэбгырэ пчъагъэу щыпсэурэм ыкIи псэупIэр зэрэпэIудзыгъэм елъытыгъэу ахэр атырагуащэх. Ащ ишIуагъэкIэ анахь къутыр цIыкIуми лъыIэсынхэ алъэкIы.Министерствэм ышIыгъэ зэфэхьысыжьхэм къагъэлъэгъогъэ пчъагъэхэм къаушыхьаты а IэпыIэгъур цIыфхэм зэрящыкIагъэр ыкIи зэрагъэфедэрэр. 2024-рэ илъэсым пэIудзыгъэ къоджэ псэупIэхэм адэс нэбгырэ 3905-мэIэпыIэгъу афэхъугъэх, ахэм фэIо-фэшIэ 4134-рэ афагъэцэкIагъ.Сыда къекIокIырэ бригадэхэм ашIэрэр?ЗищыкIагъэхэм гъомылапхъэхэр, Iэзэгъу уцхэр алъагъэIэсых, медицинэ уплъэкIунхэм, диспансеризацием ыкIи IэзапIэхэм ащэх, социальнэ-хъызмэт ыкIи упчIэжьэгъу IэпыIэгъу арагъэгъоты.Лъэпкъ проектэу «Унагъом» къыдыхэлъытагъэу цIыфхэм ащэфыгъэ автомобильхэр чанэу агъэфедэх, ахэм яшIуагъэкIэ зыныбжь хэкIотэгъэ 3326-мэ ящыкIэгъэ уплъэкIунхэр ашIыгъэх.Мыр фэIо-фэшIэ къодыеп, зекIон зымылъэкIэу, зизакъоу псэоу ыкIи зэпымыоу унаIэ зытетын фаеу къалэм пэчыжьэу псэурэмкIэ дунаим дыриIэ зэпхыныгъэ мэхъу.
Iэшъынэ Сусан.