Футбол цIыкIумкIэ Адыгэ Республикэм и Кубок икъыдэхын фэгъэхьыгъэ зэнэкъокъум къыдыхэлъытэгъэ зичэзыу ешIэгъухэр мы мафэхэм щыIагъэх. Командэ 16-у турнирым хэлажьэхэрэм ащыщэу къэнагъэр 4. Финалныкъом ихьанхэмкIэ зэIукIэгъухэм зэфэхьысыжьэу афэхъугъэхэм нэIуасэ шъуафэтэшIы.
«Кавказ-Адэмый» (Красногвардейскэ район) — «Арго» (Мыекъуапэ) – 4:0 (1:0).«Кавказ-Адэмыем» къин къыщымыхъоу текIоныгъэр къыдихынэу бэмэ алъытэщтыгъэми, пчъагъэр къызэIуихын зилъэкIыгъэр я 22-рэ такъикъыр ары ныIэп. Александр Красновым къэлапчъэм Iэгуаор дидзагъ. ЯтIонэрэ таймым красногвардейцэхэр нахь зэрэлъэшхэр къэнэфагъ. А. Красновым (гъогогъуитIо), Датхъужъ Адам, Артем Мельник къэлапчъэм Iэгуаор дадзи, 4:0-у бысымхэм текIоныгъэр къыдахыгъ.«Ансар» (Мыекъуапэ) — «Зихи» (Кощхьэблэ район) — 0:1 (0:1).Командэхэр текIоныгъэм фэбэнагъэх. Кощхьэблэ районым ифутболистхэр зэIукIэгъум ипэублэ къыщегъэжьагъэу нахь лъэшэу джэгугъэх ыкIи я 4-рэ такъикъым пенальти агъэцэкIэнэу фитыныгъэ къыдахыгъ. Ау Джыгунэ Арсен къэлапчъэм Iэгуаор дидзэшъугъэп. ХьакIэхэр ащ къыщыуцугъэхэп, такъикъ заулэ тешIагъэу Шорэ Дамир пчъагъэр къызэIуихыгъ, 1:0-у ешIэгъур аухыгъ.
«Алиро» (Мыекъопэ район) — «Запереездовские» (Кощхьабл) — 8:2 (3:0).Бысымхэр хэпшIыкIэу нахь лъэшыгъэх. «Алиро» щешIэхэрэ Роман Алоянрэ Даниил Жолобовымрэ тIогъогогъу зырызэ, Артем Косян, Михаил Текнеджян ыкIи Всеволод Сухотериным къэлапчъэм Iэгуаор дадзагъ. «Алиро» щешIэрэ футболистым икъэлапчъэ Iэгуаор дидзэжьыгъ, кощхьаблэхэм къахэщыгъэр Тао Малик. Зэфэхьысыжьыр – 8:2.«Спортмастер-2» (Мыекъуапэ) – «Легион» (Мыекъуапэ) – 1:4 (1:1).«Спортмастер-2-м» ешIэгъур дэгъу дэдэу ригъэжьагъ, Къуныжъ Артур ешIапIэм ипчэгу итэу тазырыр ыгъэцакIэзэ къэлапчъэм дэуагъ ыкIи пчъагъэр къызэIуихыгъ. Апэрэ едзыгъом икIэух «Легионым» пчъагъэр зэфэдиз ышIын фызэшIокIыгъ, къахэщыгъэр ГуIэтыжь Рустам.ЯтIонэрэ таймым «Легионым» иешIакIэ ригъэхъугъ, Бжьэц Бислъан, Андрей Переверзевым ыкIи Сергей Кокориным къэлапчъэм Iэгуаор дадзагъ, 4:1-у зэIукIэгъур аухыгъ.ШышъхьэIум и 5-м стадионэу «Юность» зыфиIорэм финалныкъом къыдыхэлъытэгъэ ешIэгъухэр щыкIощтых. Пчыхьэм сыхьатыр 7-м зэIукIэщтых «Кавказ-Адэмый» ыкIи «Зихи», ащ ыуж «Алиро» ыкIи «Легион».