АМ
Гъэмафэм иаужырэ мазэу шышъхьэIур къихьагъ. ИжъыкIэ мыщ «гъэбэжъум имазэкIэ» еджэщтыгъэх. Сыда пIомэ ар лэжьыгъэр зыщаугъоижьырэ маз.
Мы мазэм фабэр нахь зэкIакIоу ригъэжьэщт, бжыхьэм ифэмэ-бжьымэхэр къытехьащтых. ПчыкIэ уаехэр къыхэфэщтых, къушъхьэхэм пщагъор къащебэкIыщт. ШышъхьэIу мазэр фэбэ дэдэу зыщагъэунэфыгъэр 1961-рэ илъэсыр ары. Фабэр градус 41,3-м нэсэу щыIагъ. 1970-рэ илъэсым мы мазэр анахь чъыIагъ, фабэу градуси 6 нахь щыIагъэп.ГидрометеорологиемкIэ ыкIи тыкъэзыуцухьэрэ дунаим иуплъэкIункIэ Гупчэм къызэритыгъэмкIэ, шышъхьэIур фэбэщт ыкIи макIэу шынэгъакIэу щытыщт. Фабэу щыIэщтыр ыкIи ощхэу къещхыщтыр шапхъэхэм афэдизыщт ыкIи ашIокIыщтэп.Мазэм къыкIоцI ощхышхохэр ыкIи пчыкIэ оешхо щыIэнхэ ылъэкIыщт.Апэрэ мэфипшIыр. Чэщым градус 17 — 22-рэ щыIэщт. Мафэм фабэр градус 33 — 35-м кIахьэуи хъущт.ЯтIонэрэ мэфипшIыр. Чэщым градус 14 — 19, мафэм фабэр градус 27 — 32-м кIэхьащт.Ящэнэрэ мэфипшIыр. Чэщым фабэр градус 15 — 20, мафэм градус 28 — 33-рэ, градус 14-м нэсэу къызщеIыхыщтхэр къыхэкIыщтых.ШышъхьэIу мазэм ощх бэрэ къыземыщхыкIэ, машIо къэхъуным ищынагъо щыIэщт. Псыхъохэм адэт псыр шапхъэу щыIэхэм ашIокIыщтэп. Мэкъумэщ культурэхэм алъэныкъокIэ, лэжьыгъэм иIухыжьынкIэ ом изытет гумэкIыгъо къыздихьыщтэп.КIАРЭ Фатим.