Бэслъынэй Щ. ихъарзынэщ
Шам къикIыжьи Адыгеим къэзыгъэзэжьыгъэ Бэслъынэй Щамил орэдыIо купэу «Мыстым» хэт.Дунаим тет адыгэхэм шышъхьэIум и 1-р — зи ЧIыгужъ къэзыгъэзэжьыгъэм и Мафэу хагъэунэфыкIы, тятэжъ пIашъэхэм яижъырэ чIыгу къэгъэзэжьыгъэным итамыгъэу ар щыт. Бэслъынэй ЩамилкIэ мы мафэм анахьэу етIани мэхьанэшхо иI: Адыгеим къызегъэзэжьыр ары ащ итворческэ гъогу ублагъэ зыхъугъэр. Непэ ар купэу «Мыстым» хэт, адыгэ культурэр мэкъамэмкIэ къэгъэнэжьыгъэным ыкIи зэлъягъэшIэгъэным иIахь хешIыхьэ.
Щамил илъэс 19 ыныбжь. Шам къыщыхъугъ. 2016-рэ илъэсым, илъэси 9 ыныбжьэу, яунагъокIэ Адыгеим къэкIожьыгъэх. Къызщыхъугъэ хэгъэгури фэбагъэ хэлъэу бэрэ ыгу къэкIыжьы. Апэдэдэ пщынэр янэ-ятэхэм ащ къыщыфащэфыгъагъ, мэкъамэхэм ыгукIэ афэщагъэ хъуным ар лъапсэ фэхъугъагъ.Адыгеим апэрэ мафэхэу щигъэкIуагъэхэри пытэу ыгу къинагъэх. ЗэкIэ шIогъэшIэгъоныгъ: цIыфхэри, еджапIэри, бзэри. Iо хэлъэп, апэдэдэ зэкIэри шIокъиныгъ. Аузэ, ныбджэгъухэри иIэ хъугъэх, къыздигъэзэжьыгъэри ежь иунэу зэрэщытым нахь теубытагъэ фыриIэ хъугъэ.Ны-тыхэмкIэ къэгъэзэжьыныр псынкIагъэп, щыIэныгъэр икIэрыкIэ шъыпкъэу рагъэжьэжьын фэягъ. Апэрэ илъэсхэр кIалэм къин къыщыхъугъагъ. Урысыбзэр ышIахэщтыгъэп, еджэпIакIэм есэн фэягъ, зыхэсхэми еджэнымкIэ ауж къимынэ шIоигъуагъ. Ау къызэрэкощыжьыгъэм ишIогъэшхо къэкIуагъ, итворческэ гъогу ублапIэ фэхъунымкIэ мэхьэнэ гъэнэфагъэ ащ иIагъ.
Яунагъо лъэпкъ мэкъамэхэр иIукIыщтыгъэх. Адыгэ культурэмрэ хэбзэ зэхэтыкIэхэмрэ ицIыкIугъом къыщегъэжьагъэу янэ-ятэхэм ар ахащэщтыгъ. Итворческэ гъогукIэ, апшъэрэ чIыпIэ ищыIэныгъэ ащ щиубытынымкIэ а пстэуми мэхьэнэ гъэнэфагъэ яIагъ.Апэдэдэ сценэм къызытехьэгъагъэр 2016-рэ илъэсым шышъхьэIум и 1-р ары. Зи Хэкужъ къэзыгъэзыжьыгъэхэм я Мафэ ар тефэгъагъ. Хэтрэ адыгэкIи а мафэм мэхьанэшхо иI, уи Хэкужъ ущыпсэуным, убзэ урыгущыIэным, культурэмрэ шэн-хабзэхэмрэ къэуухъумэнхэм ащ нахь уфегъэчэфы.КIалэм ищыIэныгъэ къыхэхъухьэгъэ анахь хъугъэ-шIэгъэ шъхьаIэу елъытэ ятэжъ пIашъэхэр зыкIэхъопсыщтыгъэхэ чIыгум къызэригъэзэжьыгъэр. ЫгукIэ зыфэщэгъэ музыкэм пылъынымкIи, къызхэкIыгъэ лъэпкъым рыгушхоным иамал иIэ зэрэхъугъэми ащыгушIукIыщтыгъ.Iо хэлъэп, ащ фэдэ зэхашIэхэр кIалэм нахь игъэкIотыгъэу ышIыхэзэ, итворчествэ цIыфхэм нахь осэшхо къызэрэфашIыщтым елъытыгъэуи Iоф зыдишIэжьыщтыгъ.IэкIыб къэралхэм ащыпсэурэ адыгэхэми, ЧIыгужъым исхэми ятарихъи, абзи, якультури зы. 2021-рэ илъэсым «Мыстыр» зэхащэгъагъ, ар зишIушIагъэр Хъоджэе Иландрэ ТIэшъу Аслъанрэ. Адыгэ жэрыIо творчествэр ылъапсэу джырэ мэкъамэхэм атетэу яорэдхэр агъэпсых. НыбжьыкIэхэм нахь апэблагъэу, агукIэ нахь къаштэу хъуным ахэр пылъых.Адыгэ мэкъамэхэр нахьыбэмэ зэхарагъэхы ашIоигъоу жанрэ зэфэшъхьафхэри ныбжьыкIэхэм агъэфедэх, ахэм адакIоу лъэпкъ лъапсэмрэ шэн-хабзэхэмрэ афашIырэ лъытэныгъэ-шъхьэкIэфэныгъэр къагъэнэжьы.НыбжьыкIэхэм музыкэмкIэ лъэпкъэу къызхэкIыгъэм итарихъ нэIуасэ зыфашIы, ныдэлъфыбзэм, культурэм нахь лъэшэу анаIэ къатырадзэ.IэкIыб къэралхэм арысхэм лъэпкъ къашъохэу, лъэпкъ мэкъамэхэу къаухъумагъэхэм мэхьанэшхо яI зэдытие адыгэ культурэм хэхъоныгъэ ышIынымкIэ. Творчествэм ишIуагъэ къэкIо, тыдэ тыщыпсэугъэми, тызэрэзылъэпкъыр икъоу зэхэтшIэнымкIэ.Гогэн Нэрыс.