«ШIэныгъэм» ихъарзынэщ
Урысые обществэу «ШIэныгъэм» ыгъэнэфэгъэ грантыр Адыгеим иеджэпIитIумэ къаратыщт.
ШIэныгъэ зыщызэрагъэгъотырэ чIыпIэу къэралыгъом итхэм япхыгъэу лэжьэрэ ны-ты комитетхэм ягукъэкIхэр гъэцэкIэгъэнхэмкIэ федеральнэ бюджетым къыхэхыгъэу ахъщэм сомэ миллион 400 хагъэхъуагъ. Урысые обществэу «ШIэныгъэм» УФ-м просвещениемкIэ и Министерствэ иIэпыIэгъоу зэхищэрэ хэушъхьафыкIыгъэ зэнэкъокъум хэлэжьагъэхэм мылъкур афагощыгъ. Ащ хэфагъэх Адыгэ Республикэм щагъэхьазырыгъэ проектхэри. Ахэм ягъэцэкIэн пэIуагъэхьащт мылъкоу сомэ миллион 1,05-рэ хъурэр къафатIупщыщт.Тэхъутэмыкъое районым ит къуаджэу АдыгеякIэм дэт гурыт еджапIэу N 29-р ахэм ахэфагъ. «Лъэпкъхэм яфестиваль: уиер зэгъашIэ» зыцIэ проектым грантэу сомэ мин 677,3-рэ хъурэр къыфагъэшъошагъ.
Джэджэ районым ит гурыт еджапIэу N 9-м фагъэшъошагъэр сомэ мин 376,3-рэ. «ШIэжьым икоридорхэр»: уахътэмрэ культурэмрэ уапхырызыщырэ зекIоныр» зышъхьэ проектыр ащ щагъэхьазырыгъ.«Гурыт еджапIэхэм, кIэлэцIыкIу IыгъыпIэхэм, колледжхэм, нэмыкI еджапIэхэм ачIэс ныбжьыкIэхэм яшIэныгъэхэм ахэгъэхъогъэным, ны-тыхэмрэ кIэлэегъаджэхэмрэ зэгъусэхэу IэпыIэгъу ащкIэ зэфэхъужьынхэм мыщ фэдэ Iофтхьабзэхэр фэIорышIэх, — къыхигъэщыгъ Урысые обществэу «ШIэныгъэм» ипащэу Максим Древаль.Грантхэр къэзыхьыгъэхэм шышъхьэIум и 31-м нэс мылъкур аIэкIагъэхьащт. Ащ ыуж проектхэм ягъэцэкIэн ахэр фежьэщтых. ШэкIогъум и 15-м нэс IофшIэнхэр зэкIэ аухынхэ фае. А мазэм и 27-м нэс проектхэр зэрэгъэцэкIагъэхэр «Электронный бюджет» зыфиIорэ системэм къыщагъэлъэгъощт.