Яблэнэрэ зэIугъэкIэгъум иIофшIэн ыухыгъ

АР-м и Къэралыгъо Совет — Хасэм я LX-рэ зэхэсыгъоу тыгъуасэ иIагъэр Парламентым ияблэнэрэ зэIугъэкIэгъукIэ аужырагъ. Ащ хэлэжьагъэх АР-м и ЛIышъхьэу КъумпIыл Мурат, министрэхэм я Кабинет хэтхэр, федеральнэ ыкIи республикэ къулыкъухэм япащэхэр, нэмыкIхэр. Зэхэсыгъор зэрищагъ Парламентым и Тхьаматэу Владимир Нарожнэм.

Мыщ иповесткэ пстэумэ анахь иныгъ пIоми хэукъоныгъэ хъущтэп, Iофыгъуи 100 щыгъэ­нэфэгъагъ. Депутатхэр зытегущыIагъэхэм анахь шъхьаIэхэм ащыщ «Унагъом, ныгъом, ты­гъом ыкIи кIэлэцIыкIугъом якъэу­хъумэн фэгъэхьыгъ» зыфиIорэ хэбзэгъэуцугъэм зэ­хъокIыныгъэхэр фэшIыгъэнхэр.ХэушъхьафыкIыгъэ дзэ операцием хэлажьэхэрэм ыкIи ахэм ягупсэхэм IэпыIэгъу ятыгъэным ар фытегъэпсыхьагъ. Сабыибэ зыпIурэ унагъохэу, зикIалэ ащ хэлажьэхэрэм афа­кIощтыгъэ социальнэ IэпыIэгъоу зипIалъэ зыухыгъэр зэтегъэуцожьыгъэныр ары ащ зигугъу къыщишIырэр.Хэбзэгъэуцугъэм зэхъокIыныгъэу фашIыгъэм къызэрэ­щыдэлъытагъэмкIэ, сабыибэ зыпIурэ унагъом икIыгъэу, илъэс 23-м аныбжь шIомыкIыгъэу, зы нэбгырэ е нахьыбэ хэушъхьафыкIыгъэ дзэ операцием хэлажьэмэ, хэкIодагъэмэ унагъом исхэм анахьыкIэм ыныбжь илъэс 18-м нэсыфэкIэ (очнэ шIыкIэм тетэу еджэмэ илъэс 23-м нэс) ахъщэ тын къыфэкIощт.Ащ нэмыкIэу 2026-рэ илъэс бюджетым, шIокI зимыIэ медицинэ страхованиемкIэ Фондым иилъэс бюджет, муниципальнэ образованиехэм ятамыгъэхэм ягъэфедэнкIэ шапхъэхэр зыу­къохэрэм, юридическэ лицоу гъэсэныгъэ имыIэу предприниматель Iофым пылъым, зихэ­хъогъоу илъэс 16-м къыщегъэ­жьагъэу 18-м нэс зыныбжьхэр янэ-ятэхэр ямыгъусэхэу чэщым урамым тетхэмэ тазырэу атыралъхьащтым, чIыпIэ зыгъэIорышIэжьыныр публичнэ хэбзэ зыкI системэм хэгъэхьэгъэным, инвестицие Iофым, гъэсэныгъэм, культурнэ кIэным хэхьэрэ псэуалъэхэм якъызэтегъэнэн ыкIи ягъэфедэн, нэмыкIхэм афытегъэпсыхьэгъэ хэбзэгъэуцугъэхэм зэхъокIыныгъэхэр афэшIыгъэнхэм афэгъэхьыгъэ хэбзэгъэуцугъэхэм япроектхэм атегущыIагъэх, апэрэ ыкIи ятIонэрэ еджэгъухэмкIэ аштагъэх.

УФ-м мэкъу-мэщымкIэ и Министерствэ фэгъэзэгъэ джэпсэлъэ заули депутатхэм аштагъ.Джащ фэдэу АР-м цIыфхэм яфитыныгъэхэр къэухъумэгъэнхэмкIэ и Уполномоченнэ 2025-рэ илъэсым Iофэу ышIагъэм фэгъэхьыгъэ зэфэхьысыжьым депутатхэр едэIугъэх. А IэнатIэр зыгъэцэкIэрэ Михаил Шебанец къызэриIуагъэмкIэ, закъыфэзыгъазэхэрэм япчъагъэ, ыпэрэ илъэсым егъэпшагъэмэ, фэдитIукIэ нахьыбэ хъугъэ. ПстэумкIи лъэIу тхылъ 778-рэ къарахьылIагъ. ЗэкIэми яIофхэм ахэп­лъагъэх. КъяолIагъэхэм ащыщэу 540-р хэушъхьафыкIыгъэ дзэ операцием хэлажьэ­хэрэмрэ ахэм яунагъохэмрэ. Ахэм яIофхэр пстэумэ апшъэ зэрашIыгъэхэм Уполномоченнэм къыкIигъэтхъыгъ.Парламент зэпхыныгъэхэм къащыдэлъытагъэу АР-м и Къэ­ралыгъо Совет — Хасэмрэ Темыр Осетием — Аланием и Парламентрэ язэдэлэжьэныгъэ фэгъэхьыгъэ зэзэгъыныгъэм депутатхэр тегущыIэхи, дыра­гъэштагъ.

Ахэм анэмыкIэу Зарина Коноваловар Тэхъутэмыкъое рай­оным ихьыкум участкэу N 3-м, КIыкI Мариет Мыекъопэ районым ихьыкум участкэу N 2-м, Хъут Заур Кощхьэблэ районым ихьыкум участкэу N 1-м яхьыкумышIэу гъэнэфэгъэнхэм дырагъэштагъ.Повесткэм щагъэнэфагъэхэм затегущыIэхэм ыуж АР-м и Къэралыгъо Совет — Хасэм ияблэнэрэ зэIугъэкIэгъу иилъэситф IофшIагъэ къызэфихьысыжьыгъ ащ и Тхьаматэу Владимир Нарожнэм. А уахътэр хэбзэихъухьан IофшIэным имызакъоу, мэхьанэшхо зиIэ об­щественнэ-политическэ хъу­-гъэ-шIагъэхэмкIэ зэрэбаигъэр ащ къыхигъэщыгъ. Урысыеми Президент, Адыгеим и ЛIы­шъхьэ яхэдзынхэр, Адыгэ Рес­публикэр загъэпсыгъэр илъэси 100, Къэралыгъо Совет — Хасэр зызэхащагъэр, Консти­туциер заштагъэр илъэс 30, ТекIоныгъэшхор къыздахыгъэр илъэс 80 зэрэхъухэрэр, УФ-м и Федеральнэ ЗэIукIэ Феде­рациемкIэ и Совет Адыгеим имафэхэр зэрэщыкIуагъэхэр, нэмыкIхэр а уахътэм къыхиубытагъэх.Владимир Нарожнэм къызэ­риIуагъэмкIэ, илъэситфым Парламентым икомитетхэр гъогогъу 460-рэ зэхэхьагъэх, Къэралыгъо Советым — Хасэм зэхэсыгъо 60 иIагъ, Iофыгъо 1200-мэ ахэплъагъэх, АР-м ихэбзэгъэуцугъэ 565-рэ ащаштагъ. «Правительственнэ сыхьатхэм» ыкIи «Парламент едэIунхэм» Iофыгъо 45-мэ ащатегущыIагъэх, федеральнэ хэбзэ къулыкъухэм афэгъэзэгъэ джэпсэлъэ 69-рэ аштагъ.— ТиIофшIэн Адыгеим и ЛIышъхьэу КъумпIыл Мурат, сенаторхэу, депутатхэу Александр Наролиныр, Хъопсэрыкъо Мурат, Владислав Резник, Хьасанэкъо Мурат, федеральнэ гупчэм ыкIи Къыблэ шъолъырым ащыIэ тиIофшIэгъухэр, респуб­ликэм и Правительствэ, хэ­бзэухъумэкIо къулыкъухэр, му­ниципалитетхэр, общественникхэр тигъусэхэу зэшIотхыгъ, — къыIуагъ шъолъыр Парламентым ипащэ.АР-м и ЛIышъхьэ кIэщакIо афэхъугъэу хэбзэгъэуцугъэ 47-рэ яблэнэрэ зэIугъэкIэгъум щаштагъ, министрэхэм я Ка­бинет проект 258-рэ къыхилъхьагъ.Хэбзэгъэуцугъэу Iоф зыдашIагъэхэм Владимир Нарожнэр кIэкIэу къатегущыIагъ, Урысыем ыкIи ащ иныбджэгъу къэралыгъохэм ащыщэу Республикэу Беларусь яшъолъырхэм ащыщ­хэм яхэбзэихъухьэ къулыкъу­хэм, Урысыем и Къыблэ шъо­лъыр парламентхэм я Ассоциацие, федеральнэ гупчэм зэрадэлэжьагъэхэм ягугъу къы­шIыгъ, «Правительственнэ сы­хьатхэм», «Парламент едэIунхэм» Iофыгъоу къащаIэтыгъэхэм къащыуцугъ.Ипсалъэ икIэухым АР-м и ЛIышъхьэ, министрэхэм я Кабинет, федеральнэ ыкIи респуб­ликэ къулыкъухэм, депутатхэм закъыфигъэзагъ. Зэпхыныгъэ зэдыряIэу, зэгурыIохэу зэрэзэ­дэлэжьагъэхэм шIогъэ ин къызэритыгъэм къыкIигъэтхъызэ, пстэуми зэрафэразэр къыIуагъ. КъэкIощт яенэрэ зэIугъэкIэгъум идепутат хъунэу зикандидатурэ къэзыгъэлъэгъощтхэм хэдзынхэмкIэ кампанием ягухэлъхэр къащыдэхъунхэу къафэлъэIуагъ.Пстэумэ ауж АР-м и ЛIы­шъхьэу КъумпIыл Мурат гущыIэр ыштагъ. Яблэнэрэ зэIугъэкIэ­гъум идепутатхэм илъэситфым шIогъэшхо хэлъэу яIофшIэн зэ­рэзэхащагъэм фэшI нэбгырэ пэпчъ зэрэфэразэм респуб­ликэм ипащэ къыкIигъэтхъыгъ. УФ-м и Президент ыкIи федеральнэ гупчэм унашъоу къа­шIыхэрэм ягъэцэкIэн ищыкIэгъэ хэбзэгъэуцугъэхэр игъом штэгъэнхэм депутатхэр зэрэдэлэжьагъэхэр къыхигъэщыгъ.КъумпIыл Мурат къызэриIуа­гъэмкIэ, республикэ хэбзэгъэуцугъэу аштагъэ пэпчъ цIыфхэм яшIоигъоныгъэхэм адештэ. Хэу­шъхьафыкIыгъэ дзэ операцием хэлажьэхэрэмрэ ахэм яуна­гъохэмрэ IэпыIэгъу ятыгъэным фытегъэпсыхьагъэхэми лъэшэу Iоф адашIагъ.Республикэм ипащэ Донбасс ыкIи Новороссиер Урысыем къызэрэхэхьажьыгъэхэр, хэу­шъхьафыкIыгъэ дзэ операциер зэрэрагъэжьагъэр мы илъэси­тфым къызэрэхиубытагъэхэр агу къыгъэкIыжьыгъ. Адыгеим щыпсэухэрэм УФ-м и Президентэу Владимир Путиным гъо­гоу хихыгъэм зэрэдырагъэштагъэр къыхигъэщыгъ, федеральнэ гупчэм иунашъохэр шъо­лъырым ыкIи муниципальнэ образованиехэм пхыращын­хэмкIэ депутатхэм Iофышхо зэрашIагъэм къыкIигъэтхъыгъ.— Тызэгъусэу тиухъумакIохэм яфитыныгъэхэр агъэфедэн амал зэряIэмкIэ гарантие къязытырэ системэр зэдэдгъэпсыгъ, со­циальнэ фэгъэкIотэнхэм ыкIи медицинэ IэпыIэгъум къащегъэ­жьагъэу, дзэкIолIхэм ясабыйхэм IэпыIэгъу ягъэгъотыгъэным, ежьхэм IофшIэпIэ чIыпIэхэр ятыгъэнхэм анэсыжьэу къызэлъытыубытыгъ. Хэгъэгур къэзыу­хъумэхэрэм апашъхьэ пшъэ­дэкIыжьэу тхьырэр къыдгурыIозэ унашъо пэпчъ тштагъэ. Хэбзэ­ихъухьан IофшIэным имызакъоу, АР-м и Къэралыгъо Совет — Хасэм идепутатхэр хэушъхьафыкIыгъэ дзэ операцием хэлажьэхэрэм шIушIэ IэпыIэгъоу афэкIощтыми чанэу хэлэжьа­гъэх. Ащыщыбэхэр ежьхэм ашъхьэкIэ дзэкIолIхэм яунагъо­хэм IэпыIэгъу афэхъугъэх, — къыIуагъ КъумпIыл Мурат.Адыгеим и ЛIышъхьэ шъо­лъырым ихэхъоныгъэхэм къатегущыIэзэ, Iофэу зэдашIагъэм ишIуагъэкIэ лъэныкъо пэпчъ зэхъокIыныгъэшIухэр зэрэфэ­хъугъэхэм, цIыфхэмкIэ мэхьанэшхо зиIэ проектхэр зэрэпхыращыгъэхэм къакIигъэтхъыгъ. Ащ хэхьэ инженернэ ыкIи гъогу инфраструктурэм игъэкIэжьын, еджапIэхэм, кIэлэцIыкIу IыгъыпIэхэм, сымэджэщхэм, культурэм ыкIи спортым япхыгъэ псэуалъэхэм яшIын, ягъэцэ­кIэжьын.КъумпIыл Мурат ипсалъэ икIэухым яблэнэрэ зэIугъэкIэгъум идепутатхэм, хэушъхьафыкIыгъэу Владимир Нарожнэм «тхьашъуегъэпсэу» къариIуагъ. Джащ фэдэу ныбжьыкIэ парламентым иIофшIэн шIуагъэ къы­тэу зэрэзэхищэрэр къыхигъэщыгъ. Шъолъырым ипащэ зэ­Iухыгъэ зэдэгущыIэгъур хэбзэшIоу зэрэщытым, ар къызэтегъэнэгъэным мэхьанэшхо зэриIэм анаIэ тыраригъэдзагъ, депутат хъунымкIэ кандидатхэм ягухэлъхэр къадэхъунхэу къа­фэлъэIуагъ. УФ-м и Къэралыгъо Думэ ыкIи АР-м и Къэралыгъо Совет — Хасэм идепутатхэм яхэдзынхэу Iоныгъом щыIэщтхэм афэгъэхьыгъэ пшъэрылъхэри къафишIыгъэх.— Хэбзэгъэуцугъэм диштэу, хэукъоныгъэ имыIэу, шъхьэи­хыгъэу хэдзынхэмкIэ кампаниер зэхэщагъэ хъунымкIэ ищыкIагъэр зэкIэ тшIэн фае. ЦIыфхэм Iоф адэшъушIэныр, ахэм яеплъыкIэхэр, ялъэIухэр зэхэшъухынхэр пстэуми анахь шъхьаI. Лъэбэкъоу тшIырэ ыкIи унашъоу тштэрэ пэпчъ цIыфхэм хабзэм нахьыбэу цыхьэ фашIыным фэIорышIэн фае, — къыIуагъ КъумпIыл Мурат.Нэужым Адыгеим и Парламент идепутатхэу, ащ и Аппарат иIофышIэхэу щытхъу ыкIи рэзэныгъэ тхылъхэмкIэ къыхагъэщыгъэхэм афэгушIуагъ, ахэр аритыжьыгъэх.УФ-м и Къэралыгъо Думэ ищытхъу тхылъхэр къафагъэ­шъошагъэх депутатхэу Алла Чернышовамрэ ШъэоцIыкIу Схьатбыйрэ. АР-м и ЛIышъхьэ ирэзэныгъэ тхылъхэмкIэ къыхагъэщыгъэх депутатхэу Любовь Ананниковар, Евгения Дьячковар, Ирина Мухинар.Мы зэхэсыгъомкIэ АР-м и Къэралыгъо Совет — Хасэм ияблэнэрэ зэIугъэкIэгъу иIоф­шIэн зэфишIыжьыгъ. КъыкIэ­лъыкIорэ яенэрэм идепутатхэм яхэдзынхэр Iоныгъо мазэу къэб­лагъэрэм щыIэщтых.ХЪУТ Нэфсэт.