Обществэу «ШIэныгъ»
Хы-дзэ флотым и Мафэу бэдзэогъум и 26-м хагъэунэфыкIыгъэм тефэу гъэсэныгъэ лекцие зэхащагъ.
Адыгеим щыщ лIэуж нахьыжъмэ зэдэгущыIэгъу адишIыгъ хэушъхьафыкIыгъэ дзэ операцием иветеранэу, фондэу «Хэгъэгум иухъумакIохэм» ишъолъыр къутамэу Мыекъуапэ щыIэм исоциальнэ координаторэу Сергей Артюшенкэм. Обществэу «ШIэныгъэмрэ» фондэу «Хэгъэгум иухъумакIохэмрэ» кIэщакIо зыфэхъугъэхэ Iофтхьабзэу «Хэгъэгум къулыкъу фэсэхьы» зыфиIорэм къыдыхэлъытагъэу зэIукIэгъур рагъэкIокIыгъ.Къэралыгъомрэ ащ щыпсэухэрэмрэ ящынэгъончъагъэ къэуухъумэныр ыкIи къулыкъу афэпхьыныр непэ сэнэхьат къодыеу зэрэщымытыжьыр, ар зыгъэцакIэхэрэм ящыIэныгъэ щыщ шъыпкъэу зэрэхъугъэр лекторым къыIотагъ. КъедэIухэрэр къыхигъэлажьэхэзэ, Хэгъэгум иухъумакIо иобраз зыфэдэнэу щытымрэ лIыхъужъныгъэм ищысэхэу тарихъым къыхэнагъэхэмрэ атегущыIагъэх.Ащ къыхигъэщыгъ хэти, исэнэхьат емылъытыгъэу, Хэгъэгум иухъумакIоу хъун зэрилъэкIыщтыр, Родинэр къиныгъомэ аIукIэмэ, ащ фэхьазырын фае — зэо зэутэкIэуи, тыкъэзыуцухьэрэ дунаим къыхэкIыгъэ тхьамыкIагъоуи орэхъу. ДзэкIолIхэм е ухъумэкIо къулыкъухэм ащылэжьэрэ закъохэм ар апшъэ дафэкIэ икъурэп, зыухъумэжьын промышленностым, наукэм е медицинэм яIофышIэхэри, гуфакIохэри хэлэжьэнхэм щэгугъых.
«Хэгъэгур непэ къызэрэуухъумэщтыр зэо къодыеп, ащ фэшъхьафэу зэхэт щынагъоу къэхъухэрэми уапэуцужьыныр къыдэплъытэнэу щыт: информационнэхэр, тарихъым икIэтхыкIыжьын ыкIи зэхэтыкIэ хабзэхэм язэблэхъун фэдэхэм. НыбжьыкIэмэ патриотическэ IофшIэныр адызепхьаныр, Урысыем и ЛIыхъужъхэм, хэушъхьафыкIыгъэ дзэ операцием иветеранхэм аIугъэкIэгъэнхэр, тхьамафэ къэс Къэралыгъо быракъыр къэIэтыгъэныр, гимныр къегъэIогъэныр — ахэр тарихъ шIэжьыр къэгъэнэжьыгъэным ылъапсэх, къыткIэхъухьэрэ лIэужмэ хэгъэгур шIу ягъэлъэгъугъэным фэIорышIэх. КъохьэпIэ хэгъэгумэ тызэхагъэзы ашIоигъу, Урысыем игушъхьэ баиныгъэ зэрэзэщагъэкъощтым пылъых. Джащ пае титарихъ, тикультурэ, тишэн-хабзэхэм якъэухъумэн чанэу тыдэлэжьэн фае», — къыхигъэщыгъ обществэу «ШIэныгъэм» илекторэу Сергей Артюшенкэм.Ащ зэIукIэм урысыдзэм итарихъ къыщиIотагъ — Стрелецкэ дзэхэу Иван Грознэм илъэхъан щыIагъэмэ къащыублагъэу IэпэIэсэныгъэ зыхэлъ дзэу ыкIи флотэу а I-рэ Петр ыгъэпсыгъагъэм нэсыжьэу, джащ фэдэу дзэпащэхэу Александр Суворовым, Михаил Кутузовым, Павел Нахимовым ыкIи Алексей Брусиловым ягугъу къышIыгъ.«Хэгъэгу зэошхом илъэхъан рядовоеу Александр Матросовым пыим ипытапIэ амбразурэ бгъэгукIэ зыридзылIагъ, ыпсэ джащ тетэу ыти, огъур зэпигъэун ылъэ