Iофтхьабзэу «IофшIэным ыкIи зыкъэухъумэжьыным сафэхьазыр» зыфиIорэм дышъэ бгъэхалъхьэхэр къыщызыхьыгъэхэр зэрыт унашъор Урысыем спортымкIэ и Министерствэ къыхиутыгъ.
Мы къэгъэлъэгъонымкIэ илъэсым иятIонэрэ мэзищкIэ шъолъыр анахь дэгъуищым Адыгеир ахэфагъэп, ау республикэм дышъэу къыщахьыгъэм ипчъагъэкIэ рекордхэр ыгъэуцугъэх. Мэлылъфэгъум и 1-м къыщегъэжьагъэу бэдзэогъум и 1-м нэс шапхъэхэр зытыгъэхэм ащыщэу балл анахь иныр нэбгырэ 249-мэ къахьыгъ. Ахэм илъэси 6-м къыщыублагъэу 54-м нэс аныбжь.КIэлэеджакIохэм пэрытныгъэр аIыгъIофтхьабзэу «IофшIэным ыкIи зыкъэухъумэжьыным сафэхьазыр» зыфиIорэм пэрытныгъэр щызыIыгъхэр ныбжьыкIэхэр ары. Дышъэ бгъэхалъхьэхэр къызыфагъэшъошагъэхэм азыныкъо фэдизым (нэбгыри 108-мэ) илъэс 16 — 17 аныбжь. Апшъэрэ еджапIэм учIэхьанымкIэ мыщ балл тедзэхэр къетых, арышъ, шапхъэхэр зытымэ зышIоигъохэм япчъагъэ макIэп. ЯтIонэрэ чIыпIэм щытых илъэс 14 — 15 зыныбжьхэр (нэбгырэ 41-рэ). Джащ фэдэу илъэс 18 — 19 зыныбжь нэбгырэ 30-мэ дышъэ бгъэхалъхьэхэр аратыгъэх.
Нахьыжъхэри ауж къинэхэрэпЗыныбжь илъэс 18-м нэсыгъэхэм ыкIи къехъугъэхэм ащыщэу дышъэкIэ шапхъэр зытыгъэр нэбгырэ 49-рэ. Илъэс 50 — 54-рэ зыныбжьхэм якуп къыщыхэщыгъэх Бэрзэдж Екатеринэрэ ЖакIэмыкъо Сусаннэрэ. Мы нэбгыритIум ящысэкIэ къагъэлъагъо спортым упылъынымкIэ ныбжьыр пэрыохъоу зэрэщымытыр.Тигъунэгъухэм талъэплъэАу Адыгеимрэ Краснодар краимрэ якъэгъэлъэгъонхэр зэбгъапшэмэ, тигъунэгъухэм щысэ зэратепхын плъэкIыщтыр зэфэхьысыжьхэм къагъэнафэ. Мы уахътэм Пшызэ шъолъыр щыпсэурэ нэбгырэ 14193-мэ дышъэ бгъэхалъхьэхэр къалэжьыгъэх. Шъыпкъэ, краим щыпсэухэрэм япчъагъэ гъогогъу 12-кIэ нахьыб. Ау ащ дакIоу шапхъэхэр зытыгъэхэри фэдэ 57-кIэ нахьыб. Гъунэгъу шъолъырым исхэу зыныбжь илъэс 70-м шIокIыгъэ нэбгырэ 29-мэ дышъэ бгъэхалъхьэхэр аратыгъэх.КъэралыгъомкIэ къэгъэлъэгъонхэрМэлылъфэгъум къыщегъэжьагъэу бэдзэогъум нэс къэралыгъом ишъолъыр 88-мэ ащыпсэурэ нэбгырэ 289426-мэ дышъэ бгъэхалъхьэхэр къалэжьыгъэх. 2026-рэ илъэсыр къызихьагъэм къыщегъэжьагъэу «IофшIэным ыкIи зыкъэухъумэжьыным сафэхьазыр» зыфиIорэм ишапхъэхэр нэбгырэ миллион 1,7-мэ атыгъ. КъыкIэлъыкIощт Iофтхьабзэр чъэпыогъум рагъэжьэщт. Арышъ, тиреспубликэ щыпсэухэрэм джыри мэзищ фэдиз яI ащ зэрифэшъуашэу зыфагъэхьазырыным.