КъумпIыл Мурат: Титарихъ лъызыгъэкIотэщтыр шъоры, тэ ренэу кIэщакIо шъузфэхъухэрэмкIэ къыжъудедгъэштэщт

Адыгеим и ЛIышъхьэу КъумпIыл Мурат Урысые общественнэ организациеу «Урысыем иныбжьыкIэхэм я Союз» зыфиIорэм и Адыгэ шъолъыр къутамэ зызэхащагъэр илъэси 10 зэрэхъурэм фэгъэхьыгъэ зэIукIэм хэлэжьагъ.

Джащ фэдэу а Iофтхьабзэм къекIолIагъэх АР-м иминистрэхэм я Кабинет и Тхьаматэу, финансхэмкIэ министрэу Виктор Орловыр, культурэмкIэ министрэу Аулъэ Юрэ, ныбжьыкIэ IофхэмкIэ АР-м и Комитет итхьаматэу Максим Галушкиныр, шъолъыр организацием итхьаматэу Хьабый Айтэч, апшъэрэ еджапIэхэм, министерствэхэм ыкIи къулы­къухэм ялIыкIохэр, Урысые общественнэ организациеу «Урысыем иныбжьыкIэхэм я Союз» зыфиIорэм ишъолъыр къутамэ исовет хэтхэр.Къызэрэугъоигъэхэм шIуфэс къарихызэ, республикэм и ЛIышъхьэ къызэрэхигъэщыгъэмкIэ, блэкIыгъэ илъэси 10-м къыкIоцI шъолъыр организацием нахь зиушъомбгъугъ, ыкIуачIэ хэхъуагъ, ежь ипроектхэр пхырещых, хэбзэ къулыкъу­хэм ягъусэу ныбжьыкIэхэм Iоф адешIэ, ягупсэ республикэ шIуагъэ къызэрэфахьыщт лъэныкъохэмкIэ ишIуагъэ къегъакIо.«Президентэу Владимир Путиным ныбжьыкIэхэу къыткIэхъухьэхэрэм Iофэу адашIэрэр агъэлъэшынэу пшъэрылъ къе­гъэуцу. Тиреспубликэ илъэс 35-м шIомыкIыгъэ ныбжьыкIэ мини 135-рэ фэдиз щэпсэу. НыбжьыкIэ организациехэр щыIэ хъугъэх, ахэм яIофшIэнкIэ зэдегъэштэныгъэ пытэ азыфагу илъыным, зы коман­дэ зыкIэу щытынхэм мэхьанэшхо иI», — къыIуагъ Адыгеим и ЛIышъхьэ.КъумпIыл Мурат агу къызэригъэкIыжьы­гъэмкIэ, IофшIэныр нэфагъэ хэлъэу ыкIи кIэухышIухэр фэхъухэу лъыгъэкIотэгъэным пае илъэси 3-кIэ узэкIэIэбэжьымэ, ныбжьыкIэхэм яIофхэмкIэ Комитет зэхащэгъагъ. А унашъом ишIуагъэ къэкIо акIуачIэ нахь зэрагъэуIунэу, хэбзэ къулы­къухэм ыкIи обществэм гъусэныгъэ адыряIэнэу, ныбжьыкIэ политикэр лъэ­гэпIакIэм тещэгъэнэу. Мылкъоу а Iоф­тхьабзэхэм апэIуагъахьэрэри нахьыбэ ашIыгъ: илъэси 3-м къыкIоцI рес­публикэ бюджетым ыкIи федеральнэ грантхэм якъэкIуапIэхэм яшIуагъэкIэ сомэ миллион 650-рэ а лъэныкъом пэ­Iуагъэхьагъ.Инфраструктурэм ылъэныкъокIи ­мылъку гъэнэфагъэ къыхагъэкIы, ныбжьы­кIэхэр зыщызэIукIэщт гупчэхэр агъэпсых. Гухэлъэу яIэхэр къызэфаIуатэ, япроект­хэр агъэцакIэх. Пшъэрылъыбэ зэшIозыхырэ ныбжьыкIэ гупчэу «Адыгеим иныбжьыкIэхэр» зыфиIорэр Мыекъуапэ щызэтырагъэпсыхьажьыгъэ унэм чIэт, къэлэ гупчэм ит тарихъ унэми игъэцэ­кIэжьын ыкIэм фэкIо. Апэрэхэм я Движение ишъолъыр къутамэ ащ чIэтыщт. НыбжьыкIэхэм яхэхъоныгъэкIэ илъэс псаум Iоф зышIэщт Гупчэр Мыекъуапэ къыпэблагъэу ашIы, республикэмкIэ анахь ныбжьыкIэ гупчэ шъхьаIэхэм зыкIэ ащыщэу ар хъущт. 2030-рэ илъэсым ыкIэм ехъулIэу муниципалитет пэпчъ ныбжьыкIэхэм апае гупчэхэр ащызэхащэщтых, гущыIэм пае, мы илъэсым ыкIэм нэс Шэуджэн ыкIи Теуцожь районхэм ахэр къащызэIуахыщтых.Адыгеим ныбжьыкIэ Iофтхьэбзэ зэфэшъхьафыбэ щызэхащэ: «Адыгеим иныбжьыкIэхэр» зыфиIорэ форумыр, слетэу «Фыщт» зыцIэр. Ахэм ныбжьыкIэ хъуп­хъэхэр хэгъэгум ишъолъыр зэфэшъхьаф­хэм къарэкIыхэшъ, ащызэIокIэх, Адыгеим истудентхэм я Ассоциациеу Урысыем инэмыкI шъолъырхэм ащеджэрэ ныбжьыкIэхэу республикэм щыщхэр зыхахьэрэми Iофтхьэбзабэ егъэцакIэ.«Анахь мэхьанэ зиIэр ныбжьыкIэхэм Iофэу адатшIэрэр яхэгъэгу шIу алъэгъу­ным, фэшъыпкъэнхэм, ащ къырыкIощтымкIэ пшъэдэкIыжь зэрахьырэр зэхашIыкIыным япхыгъэу щытыныр ары. Илъэс къэс зэхатщэрэ Iофтхьабзэхэр а пшъэ­рылъым фэIорышIэх: Iофыгъо гъэнэфагъэхэм афэгъэхьыгъэ зэIукIэгъухэр, гъэ­сэныгъэм епхыгъэ программэхэр, республикэм ыкIи хэгъэгум ятарихъ, якультурэ, яхабзэхэм афэгъэхьыгъэ проектхэр. Ахэр зэкIэ зы гухэлъ зыфэIорышIэхэрэр: шъо, ныбжьыкIэхэм, ти Хэгъэгушхо къырыкIощтымкIэ пшъэ­дэ­кIыжь зэрэшъухьырэр къыжъугурыIоу шъукъэтэджыныр ары. ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм IэпыIэгъу ятыгъэным шъхьа­фэу сыкъытегущыIэщт. Шъо ренэу а Iофым шъухэлажьэ: дзэкIолIхэм ыкIи ахэм яунагъохэм шъуадеIэ, шIушIэ Iоф­тхьабзэхэр зэхэшъощэх», — къыIуагъ КъумпIыл Мурат.Республикэм и ЛIышъхьэ къыхигъэщыгъ шъолъырым иныбжьыкIэхэр къин зиIэм деIэнхэм зэрэфэхьазырхэр, шIушIэным епхыгъэ Iофтхьабзэхэм чанэу зэрахэлажьэхэрэр, шIуагъэ къэзыхьыщт проектхэм ягъэцэкIэнкIэ, зыныбжь хэ­кIотагъэхэм IэпыIэгъу ятыгъэнымкIэ Iо­фыгъо зэфэшъхьафхэр зэрагъэцакIэ­хэрэр. Адыгеим и ЛIышъхьэ къызэри­IуагъэмкIэ, хэгъэгум игъэпытэнкIэ ыкIи Урысыем щыпсэурэ цIыф лъэпкъ зэфэшъхьафхэр зэгурыIонхэмкIэ а пстэуми мэхьанэшхо яI.«Зэрэхэгъэгу фэдэу, Адыгеири цIыф лъэпкъ зэфэшъхьафыбэ зыщыпсэурэ шъолъырэу щыт. НэмыкI лъэпкъхэм якультурэ лъытэныгъэ фашIынэу ныбжьыкIэхэр тэпIух. Урысыем и Президент илъэсэу тызхэтыр зыкIыныгъэм и Илъэ­сэу зэригъэнэфагъэми къегъэшъыпкъэ­жьы гупшысэ шъхьаIэу зэкIэми тыкъызыпкъырыкIырэр – лъэпкъ зэфэшъхьафхэу ащ щыпсэухэрэм язэдегъэштэныгъэ-зэгурыIоныгъ хэгъэгум кIуачIэ къезытырэр. Шъо хъугъэ-шIагъэхэм шъузэрахэлажьэ­рэм имызакъоу, неущ экономикэм, социальнэ лъэныкъом, гъэIорышIэным япхыгъэ Iофтхьэбзэ зэфэшъхьафхэр зыгъэцэкIэщтхэ IофышIэхэу шъущытыщт. Ащ пае тишIуагъэ шъотэгъэкIы шIушIэнымрэ проект IофшIэнымрэ къащежъугъэжьэнышъ, республикэм ифедэ зы­хэлъ IофшIэнэу пэщэныгъэ зехьэгъэным епхы­гъэм шъуишъыпкъэу шъуегупшысэным пае. Республикэм ихэхъоныгъэкIэ непэ зэшIотхырэ пстэуми шъуинеущрэ мафэ зыфэдэщтымкIэ мэхьэнэ гъэнэфагъэ яI. Титарихъ лъызыгъэкIотэщтыр шъоры, тэ ренэу кIэщакIо шъузфэхъухэрэмкIэ къы­жъу­дедгъэштэщт», — икIэухым зэфэхьысыжь къышIыгъ КъумпIыл Мурат.Ащ нэужым Адыгеим и ЛIышъхьэ ныбжьыкIэхэм зэдэгущыIэгъу адыриIагъ. Ахэм зыгъэгумэкIырэ IофыгъохэмкIэ упчIэхэр къыратыгъэх ыкIи ежьхэм яшIоигъоныгъэхэри къырахьылIагъэх. Социальнэ мэхьанэ зиIэ проектхэмкIэ грант IэпыIэгъум ишIуагъэ къызэрэкIорэм иIофыгъуи къаIэтыгъ. Республикэм иэкономикэкIэ пшъэрылъэу къэуцухэрэр зэшIохыгъэнхэм пае ныбжьыкIэ ИТ-кластерыр зэхэщэгъэным иамал, Адыгеим иэкономикэрэ исоциальнэ лъэныкъорэ ныбжьыкIэ IофышIэхэр нахьыбэу ахэщэгъэнхэм, социальнэ мэхьанэ зиIэ проектхэм япхырыщынкIэ ныбжьыкIэхэмрэ а Iофым фэгъэзэгъэ лIыкIо гъэнэфагъэ­хэмрэ язэдэлэжьэныгъэ агъэпытэным япхыгъэ лъэныкъохэм ягугъу къашIыгъ.Урысыем иныбжьыкIэхэм я Союз икъутамэ илъэси 10-м къыкIоцI Iофэу ышIагъэм икIэуххэр мыщ щызэфахьысыжьыгъэх ыкIи пшъэрылъэу къапыщылъхэр щырахъухьагъэх.АР-м и ЛIышъхьэ ипресс-къулыкъукъытырэ къэбархэмкIэТхьаркъохъо Сафыет.