Урысыем иунэгъо анахь дэгъухэм ащыщ

«Илъэсым иуна­гъу-2026-рэ» зыфиIорэ Урысые зэнэкъокъум Адыгеим щыщ унагъо текIоныгъэ къыщыдэзыхыгъэхэм ащыщ хъугъэ.

ФедерациемкIэ Советым зэнэкъокъур зэфихьысыжьыгъ. Урысыем ишъолъыр 89-мэ ­къарыкIыгъэ унэгъо 11800-м ехъурэмэ ащ зыкъыщагъэлъэгъуагъ.«Джэджэ районым ит псэу­пIэу Келермесскэм щыщхэ Головановхэу Александр ыкIи Маринэ сафэгушIо къатефэ шъыпкъэу лъэныкъоу «КIэлэцIыкIубэ зэрыс унагъу» зыфиIо­рэмкIэ текIоныгъэ къызэрэ­щыдахыгъэм фэшI! Ахэр илъэс 19 хъугъэу зэгъусэх, нэбгыри­бгъу зэдапIу ыкIи шIэхэу япшIэ­нэрэр къафэхъущт. ШIулъэгъуныгъэр, зэрэлъытэжьыныгъэр зэрылъхэ, Iофыр шIу зыщалъэгъурэ ыкIи япшъэдэкIыжь къыз­щагурыIорэ унагъоу мыр щыт», — къащитхыгъ социальнэ нэ­кIубгъохэм Адыгеим и ЛIы­шъхьэу КъумпIыл Мурат.Унагъом ышъхьэ Урысыем ошIэ-дэмышIэ IофхэмкIэ и Министерствэ Адыгэ РеспубликэмкIэ и ГъэIорышIапIэ имэшIо­гъэкIосэ-къэгъэнэжьэкIо отряд къыдекIокIырэ купым истаршина, дзэ ыкIи къулыкъу тынхэр иIэх. Ишъхьэгъусэ унагъомрэ сабыйхэм япIунрэ ищыIэныгъэ афегъэхьы, Щытхъу дипломэу «Материнская слава» зыфиIорэр къыфагъэшъошагъ. Зэшъхьэгъу­сэхэм яфэшъошэ лIэуж апIу — Екатеринэ, Егор, Елизаветэ, Есение, Евгение, Ефим, Богдан, Евангелинэ ыкIи Елизар. Ахэр чанэу общественнэ, спорт ыкIи творческэ щыIэныгъэм хэла­жьэх, унэгъо пытэм ыкIи зэгурыIожьым ищысэх.«Урысыем щыпсэурэ лъэпкъхэм я Илъэс мыщ фэдэ уна­гъохэу тикъэралыгъо иунэгъо хэбзэ анахь дэгъухэр зэзыпхыхэрэм текIоныгъэ къызэ­рэдахырэм мэхьанэшхо иI.Сабый зиIэ унагъохэм Iэпы­Iэгъу ягъэгъотыгъэныр социальнэ политикэм илъэныкъо анахь шъхьаIэу тэркIэ къэнэжьы. Ащ пае, УФ-м и Президентэу Владимир Путиным демографием изытет нахьышIу шIыгъэнымкIэ пшъэрылъэу къыгъэуцугъэм къыхиубытэу, социальнэ тынхэмрэ фэгъэкIотэнхэмрэ зэраратыщтхэ амалхэм зятэгъэу­шъомбгъу, сабыибэ зиIэ унагъо­хэм IэпыIэгъу ятыгъэным тыдэ­лажьэ, кIэлэцIыкIухэм япIункIэ, гъэсэныгъэ ягъэгъотыгъэнымкIэ, спортым ыкIи творчествэм апылъынхэмкIэ амалхэр ятэтых. Джырэ уахътэм шъолъырым федеральнэ ыкIи шъолъыр Iэпы­Iэгъу зэфэшъхьаф 30 фэдиз демографием ылъэныкъо ра­гъэ­гъоты, лъэпкъ проектэу «Уна­гъомрэ» партиеу «Единэ Россием» илъэпкъ программэрэ къатырэ амалхэр ахэм ащыщых.Мыщ дэжьым федеральнэхэм зарагъэушъомбгъугъ республикэ бюджетым щыщ мылъкукIэ унагъохэм зэрадеIэхэрэр нахьыбэ ашIыным пае. Мы Iофым ишIуа­гъэ къэлъагъо. Адыгеим сабыибэ зиIэ унагъоу исхэм япчъагъэ щыхэхъо, джырэ уахътэм ахэр 9600-рэ мэхъух — респуб­ликэм иятфэнэрэ унагъо пэпчъ. Ащ къегъэлъагъо цIыфхэм IэпыIэгъу зэрарагъэгъотыщтыр ашIошъ зэрэхъурэр ыкIи ны-тыхэм неущырэ мафэм яцыхьэ зэрэтелъыр. Сыгу къыздеIэу сафэгушIо текIоныгъэмкIэ Александррэ Маринэрэ ыкIи Головановхэм яунэгъо ин исхэм зэкIэми! Псауныгъэ пытэ, насып, щыIэкIэшIу яIэнэу сафэлъаIо. Яунэ сыдигъокIи шIулъэгъур, зэгурыIоныгъэр ыкIи гушIуагъор щэрэбысымых!» — къытхыгъ КъумпIыл Мурат.