ГуфэкIо купыр
ГуфэкIо купэу «Сетевой плацдарм» зыфиIорэм ипащэу Еленэ (зэкIэми зэрашIэрэр Алена) Кутимскаям бгъэхалъхьэу «За помощь участникам СВО» зыфиIорэр къыфагъэшъошагъ.
Ар ритыжьыгъ Мыекъопэ къэлэ администрацием ипащэ хэушъхьафыкIыгъэ дзэ операцием иIофыгъохэмкIэ игуадзэу, сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэм хэлэжьэрэ Александр Махневым.ГуфэкIо IэпыIэгъур тызхэт щыIэныгъэм хэпчын умылъэкIынэу изы Iахь хъугъэ. ГуфэкIо мин пчъагъэ зэкъохьагъэу, къэралыгъом афишIэрэм емыплъыхэу, дзэ операцием хэлажьэхэрэм ящыкIагъэр арагъэгъоты. Еленэ дзэ операциер къызежьэгъэ апэрэ мафэм къыщыублагъэу емызэщыжьэу тидзэкIолIхэу фронтым Iутхэм ящыкIагъэр арегъэгъоты.Купэу «Сетевой плацдарм» зыфиIоу ащ зэхищагъэм ныбжь зэфэшъхьаф зиIэ нэбгырэ500-м ехъу къызэлъеубыты ыкIи ахэм япшъэрылъ шъхьаIэр зыухъумэхэрэ хъытыухэм яблэн. «Сетевой плацдармыр» зыщыIэм къыщегъэжьагъэу хъытыу мини 3-м ехъу ыблагъ ыкIи ахэр зэкIэ дзэ операцием ащагъэх, зы мазэм хъытыуи 100 фэдиз аблэн алъэкIы. Купыр ащ къыщыуцурэп, IэпыIэгъоу дзэкIолIхэм ящыкIагъэу къараIорэм тетэу шIушIэн IофкIэ ахэр афаугъоих, афарагъащэх. Ежь Еленэ шIушIэ IэпыIэгъу зыщэхэрэм ахэтэуи макIо.Бзылъфыгъэ гуфэкIо чаным зэрихьэрэ IофшIэным осэшIу фашIызэ а тыныр къыфагъэшъошагъ. Мыр апэрэп, икIыгъэ илъэсми бгъэхалъхьэу «За содействие СВО» зыфиIорэр къыратыгъ ыкIи УФ-м и Президентэу Владимир Путиным игукъэкIыкIэ агъэнэфэгъэ апэрэ Лъэпкъ шIухьафтынэу «Къэралыгъор цIыфхэм зэрахъокIы» зыфиIорэм илауреат нэбгырэ минмэ ащыщ хъугъэ.— Мыщ фэдэ гуфэкIо чанэу непэ къэралыгъом иIэхэм яшIуагъэкIэ тикъулыкъушIэхэм зэракъотхэр, зэряжэхэрэр зэхашIэ, зэрахьэрэ IофшIэныр текIоныгъэр къэблэгъэным фэIорышIэ. АкIуачIэ къыхьэу, агу пытэу джыри игъо къэсыфэ яIофшIэн купым лъигъэкIотэнэу афэсэIо, — хигъэунэфыкIыгъ Александр Махневым.IЭШЪЫНЭ Сусан.