Шъолъыр фондыр
Къэралыгъо фондэу «Хэгъэгум иухъумакIохэр» зыфиIорэм хэушъхьафыкIыгъэ дзэ операцием иветеранхэу уIэгъэ хьылъэ зытещагъэхэм Iэрыфэгъу афэхъущт щыгъынхэр афеды.
Ащ фэгъэзэгъэ специалистхэм нэбгырэ пэпчъ ипсауныгъэ изытет, изекIокIэ амалхэр ыкIи шIоигъоныгъэу иIэр къыдалъытэ. ТилIыхъужъхэм Iэрыфэгъу ыкIи къякIущт щыгъынхэр афадынхэм пае заявкэ пэпчъ шъхьафэу хэплъэх.Зыпкъ игъэуцожьыгъэнхэмкIэ техническэ амалхэм афэдэу адаптивнэ щыгъынхэр фондым ыпкIэ хэмылъэу ветеранхэм ареты. Нэбгырэ пэпчъ комплектищ телъытагъ: гъэмэфэ, кIымэфэ ыкIи лъэхъэнэ зэблэкIыгъом зыщалъэщтхэр. Шъошэ зэхэтым пкъыгъо 12 хэхьэ. Ахэр афэзыдыхэрэр адаптивнэ щыгъыным идизайнкIэ Дунэе зэнэкъокъоу «На крыльях» зыфиIорэм текIоныгъэ къыщыдэзыхыгъэхэр ары. 2025-рэ илъэсым игъэмафэ къыщегъэжьагъэу къэралыгъо фондым шъошэ зэхэт 2800-м ехъу аритыгъ. Адыгэ Республикэм щыIэ фондым ащ фэдэ шъуашэхэр хэушъхьафыкIыгъэ дзэ операцием иветеран 12-мэ аIэкIигъэхьагъ.Мы амалыр фондым иIэнымкIэ лъэIур Анна Цивилевам Президентэу Владимир Путиным икIыгъэ илъэсым игъэтхэпэ мазэ рихьылIагъ ыкIи ащ къыдыригъэштагъ.Адаптивнэ щыгъын комплектым хэхьэх: спорт джанэр, гъончэджыр, курткэ фабэр, джинс гъончэджыр, нэмыкI гъончэдж къызэрыкIор, чIэгъ-чIэлъхэм анэсыжьэу, нэмыкIхэри. Къыхэгъэщыгъэн фае, мыхэр зэкIэ сэкъатныгъэ зиIэхэм япсауныгъэ, яIэпкъ-лъэпкъхэм язытет ялъытыгъэу адыгъэх. Ыбгъухэм замокхэр адэдагъэхэу зыщыплъэнкIи, пщыгъынкIи Iэрыфэгъухэу шIыгъэх.— Нэбгырэ пэпчъ щыкIагъэу иIэм тешIыкIыгъэу адаптивнэ щыгъыныр зэрэфадырэм уIэгъэ хьылъэ зытещэгъэ ветераным ицыхьэ нахь зытелъыжь ешIы, мамыр щыIакIэм нахь псынкIэу зыкъыхигъотэн елъэкIы. Непэ гъунапкъэхэм татегущыIэрэп, гушхоныгъэу ыкIи кIуачIэу лIыхъужъхэм къызхагъотэжьырэр ары зигугъу тшIырэр. Адаптивнэ модэм ылъэныкъокIэ технологиякIэхэм амалышIоу къафызэIуихыхэрэм яшIуагъэкIэ ветеранхэр спортым, творчествэм, зыфэехэ сэнэхьатым зыкъыхагъотэн алъэкIы, щыIэныгъэм дырагъаштэу мэпсэух. Пшъэрылъ шъхьаIэу тиIэр — ухъумакIо пэпчъ IэпыIэгъу зэриIэр зэхишIэн ыкIи ицыхьэ зытелъыжьэу ыпэкIэ лъыкIотэн ылъэкIынымкIэ ищыкIэгъэ амалхэр едгъэгъотыныр, — къыIуагъ УФ-м зыкъэухъумэжьынымкIэ иминистрэ игуадзэу, фондэу «Хэгъэгум иухъумакIохэр» зыфиIорэм итхьаматэу Анна Цивилевам.Урысыем адаптивнэ щыгъыным хэхъоныгъэ щишIынымкIэ мэхьанэ зиIэр ащ фэдэ щыгъыным идизайнкIэ Дунэе зэнэкъокъоу «На крыльях» зыфиIорэр ары. Ар зэхещэ къэралыгъо фондэу «Хэгъэгум иухъумакIохэр» зыфиIорэм шъолъыр правительствэхэр ыкIи ВЭБ.РФ иIэпыIэгъухэу.2025-рэ илъэсым а зэнэкъокъум Урысыем ишъолъыр 67-мэ ыкIи IэкIыб къэралыгъуиблымэ къарыкIыгъэ нэбгырэ 286-рэ хэлэжьагъ. 2026-рэ илъэсыр лъэпкъхэм языкIыныгъэ и Илъэсэу Президентым зэригъэнэфагъэм къыхэкIэу культурнэ хабзэхэр ыкIи лъэпкъ нэшанэхэр зэнэкъокъум къыхэщых. Ащ хэлажьэрэ пэпчъ ишъолъыр инэшанэ ыкIи Урысыем идэхагъэрэ изэфэшъхьафыгъэрэ имодель къызэрэщыхигъэщыщтым ыуж ит.«На крыльях» зыфиIорэм ишъолъыр едзыгъохэр мыгъэ зэнэкъокъухэу «Хэгъэгум иухъумакIохэм я Кубок» къащыдыхэлъытагъэхэу рекIокIых. Урал ыкIи Сыбыр федеральнэ шъолъырхэм къэгъэлъэгъонхэр ащыкIуагъэх. Темыр-КъохьэпIэ федеральнэ шъолъырым щыкIогъэ зэнэкъокъум иедзыгъо текIоныгъэ къыщыдэзыхыгъэхэм яколлекциехэр мэкъуогъум и 30-м къагъэлъэгъонхэ амал яIагъ. Джы къэкIощт къэгъэлъэгъоныр мы илъэсым ичъэпыогъу мазэ Къыблэ федеральнэ шъолъырым щыкIощт.Фондэу «Хэгъэгум иухъумакIохэр» зыфиIорэм икъутамэу АР-м щыIэр а зэнэкъокъум хэлэжьэщтхэм яугъоин ыуж ит. Ащ пае дизайнерхэм, дэн IофымкIэ IэпэIасэхэм ыкIи сэкъатныгъэ зиIэ ветеранхэм зэIукIэгъухэр адызэхащэх. Адаптивнэ щыгъынхэр зыдыщтхэр занкIэу ветеранхэм задэгущыIэхэкIэ ахэм къащыдалъытэщт лъэныкъохэр нахь шIэгъошIу афэхъущт.Адаптивнэ щыгъыным идизайнкIэ Дунэе зэнэкъокъоу «На крыльях» зыфиIоу Къыблэ федеральнэ шъолъырым щыкIощтым хэлажьэ зышIоигъохэм ялъэIу тхылъхэр 2026-рэ илъэсым шышъхьэIум и 31-м нэс атынхэ алъэкIыщт. Сэкъатныгъэ зиIэхэм ящыIэныгъэ Iэрыфэгъу зышIы зышIоигъо дизайнерхэр, модельерхэр, щыгъынхэр къыдэзыгъэкIыхэрэр, профильнэ гъэсэныгъэ организациехэм ястудентхэр зэнэкъокъум хэлэжьэнхэ алъэкIыщт.Илъэсищым къыкIоцI а проектым зиушъомбгъугъ. Кузбасс шъолъырым игукъэкI джы дунэе шапхъэм нэсыгъ, модельерхэм ясэнаущыгъэ къыщагъэлъэгъо, хэушъхьафыкIыгъэ дзэ операцием сэкъатныгъэ хэзыхыгъэхэм Iэрыфэгъу псэукIэ яIэным яIахьышIу халъхьэ.IЭШЪЫНЭ Сусан.