Кощхьэблэ районым иавтомобиль гъогоу «Дружба — Егерухай» зыфиIорэм пхырыкIырэ псыхъоу Щэхъураджэ телъ лъэмыджым игъэцэкIэжьын фежьагъэх, жъы хъугъэхэ пкъыгъохэр зэблахъущтых.
ЗэкIэмкIи псэолъэшIхэм метри 124-рэ агъэцэкIэжьынэу щыт.Кощхьэблэ район администрацием къызэритыгъэмкIэ, къоджэ псэупIэхэр зэзыпхырэ лъэмыджыр зэрищыкIагъэм фэдэу, шэпхъэшIухэм адиштэу агъэцэкIэжьыщт, шэкIогъум ыкIэхэм анэс IофшIэнхэр къаухыщтых ыкIи псэуалъэр атIупщыщт.ГъэцэкIэжьыныр лъэпкъ проектэу «ЩыIэныгъэм пае инфраструктурэр» зыфиIорэм къыдыхэлъытагъэу рагъэкIокIы. Лъэпкъ проектыр яIэпыIэгъоу мы илъэсым зэкIэмкIи километрэ 64,6-рэ зикIыхьэгъэ автомобиль гъогу Iахь 24-рэ ыкIи лъэмыджиплIырэ агъэцэкIэжьыщтых.