ПIалъэхэм адиштэу

Бжыхьэ-кIымэфэ уахътэу унэхэр зыщагъэфэбэнхэ фаем псэупIэ-коммунальнэ хъызмэтым епхыгъэ псэуалъэхэр къызэтемыуцонхэм игъэкIотыгъэу Адыгеим щыдэлажьэх. Мы уахътэм республикэм имуниципальнэ псэупIэ пстэури ащ ыуж ит. IофшIэнхэм сомэ миллиони 114-м ехъу апэIухьащт, пIалъэм диштэу ахэр къаухынхэу агъэнафэ.

АР-м псэолъэшIынымкIэ, транспортымкIэ, псэупIэ-коммунальнэ ыкIи ­гъогу хъызмэтымкIэ и Министерствэ энер­гиер къэухъумэгъэнымкIэ ыкIи федэ къегъэ­хьыгъэнымкIэ иотдел ипащэу Хъымыщ Тимур къызэриIуагъэмкIэ, шапхъэхэм къызэращыдэлъытагъэу, кIымафэр икIи фабэр къатын имыщыкIэгъэжь зэхъум, муниципальнэ образование пэпчъ ипсэу­пIэ-коммунальнэ хъызмэт епхыгъэ псэуа­лъэхэм язытет зэригъэшIагъ, ащ къыгъэлъэгъуагъэхэм къапкъырыкIхэзэ гъэцэкIэжьын IофшIэнэу зэшIуахын фаехэм яплан къызэхигъэуцуагъ, нэужым республикэм зэрэщытэу щашIэщтыр агъэнэфагъ.— ЗэкIэмкIи котельнэ 260-рэ, фабэр къэзытырэ пунктэу 25-рэ, ащ икIуапIэу километрэ 302-рэ, гъэстыныпхъэ шхъуантIэм икIуапIэу километрэ 4500-м ехъу, псырыкIуапIэу километрэ 2300-м нахьыбэ, фэтэрыбэу зэхэт унэ 2000 фэдиз къихьащт бжыхьэ-кIымэфэ уахътэм фэ­гъэхьазырыгъэнэу рахъухьэ. Джащ фэдэу пхъэ кубометрэ 670-рэ, шIомыкI тонн 375-рэ ащ фэдэ гъэсты­ныпхъэ зищыкIагъэхэм аIэкIэ­гъэхьэгъэн фае. ЗэкIэмкIи а Iоф­шIэнхэм сомэ миллиони 114,5-рэ фэдиз апэ­Iухьащт, — къыIуагъ Хъымыщ Тимур.Муниципальнэ образованиехэм зэкIэми IофшIэнхэр ащырагъэжьагъэх. ПIа­лъэхэм адиштэу ахэр лъагъэкIуатэх. Iоныгъом и 1-м нэс аухынхэ фай. ЕтIанэ Ростехнадзорым ыкIи АР-м и ПсэупIэ инспекцие ялIыкIохэм ахэр ауплъэкIущтых, зыпари щыкIагъэ къахамыгъэщымэ, унэхэм ягъэфэбэн зэрэфэхьа­зырхэр къэзыушыхьатырэ тхылъхэр къаратыщтых.Министерствэм илIыкIо къызэриIуагъэмкIэ, зэрэхьазырхэр зэрагъэунэфырэ шапхъэхэм блэкIыгъэ илъэсым зэхъокIыныгъэхэр афэхъугъэх. Джы фабэр къэзытырэ организацие пэпчъ Iофтхьабзэу зэшIуихын фаехэр гъэнэфагъэх, бжыхьэ-кIымэфэ уахътэм зэ­рэфэхьазырыр индексхэмкIэ къыгъэ­лъэгъон фае.Къулыкъу зэфэшъхьафхэм ялIыкIохэр зыхэхьэгъэ комиссиехэр муниципальнэ образованиехэм ащызэхащагъэх. Рос­технадзорым Темыр КавказымкIэ и ГъэIорышIапIэ иIофышIэхэр ягъусэхэу ахэм мэкъуогъум къыщыублагъэу Iоныгъом нэс фабэр къэзытырэ организациехэр ауплъэкIущтых. Тэхъутэмыкъое ыкIи Кощхьэблэ районхэм ащ фэдэ уплъэкIунхэр ащыкIогъахэх.ПсэупIэ-коммунальнэ хъызмэтым Iофыгъо шъхьаIэу иIэхэм ащыщ обо­рудованиеу агъэпсэуалъэхэрэр жъы зэрэхъугъэхэр. Ащ фэшI проект ыкIи программэ зэфэшъхьафхэр агъэфедэхэзэ ахэр агъэкIэжьынхэм республикэм лъэшэу щыпылъых. Мары мыгъэ къоджэ псэупIэхэм хэхъоныгъэ ягъэшIыгъэным фытегъэпсыхьэгъэ къэралыгъо программэм къыщыдэлъытагъэу Кощхьэблэ районым кIэу котельнэ щагъэуцу. Ащ лъэхъаным диштэу шIыгъэ хьакоу энергиер къэзыухъумэщтхэр чIагъэуцощтых.Джащ фэдэу псэупIэ-коммунальнэ хъызмэтым игъэкIэжьын фытегъэпсыхьэгъэ шъолъыр программэм къыщыдэ­лъытагъэу илъэс зытIукIэ узэкIэIэбэжьмэ Адыгэкъалэ фабэм икIуапIэхэр щызэблахъугъэх, Мыекъуапи ащ фэдэу километри 7,7-рэ щагъэкIэжьыгъ.Ащ нэмыкIэу, сыдигъокIи мы лъэныкъом иIэ Iофыгъохэм ащыщ электроэнергием, гъэстыныпхъэ шхъуантIэм ауасэ игъом къэзымытыхэрэр организациехэм зэрахэтхэр. ПсэупIэ-коммунальнэ хъызмэтым ипсэуалъэхэр бжы­хьэ-кIымэфэ уахътэхэм зыщафагъэхьазырхэрэ лъэхъаным чIыфэхэр «гъэо­хъуакIо» мэхъух.Хъымыщ Тимур къызэриIуагъэмкIэ, мы илъэсым имэкъуогъу мазэ нэс пштэмэ, гъэстыныпхъэ шхъуантIэмкIэ чIыфэхэр сомэ миллион 440,8-м ехъух, электроэнергием ыпкIэу къамытыгъэр миллион 91,6-рэ. Ащ фэшI псэолъэшIынымкIэ, транспортымкIэ, псэупIэ-ком­мунальнэ ыкIи гъогу хъызмэтымкIэ Министерствэм иунашъокIэ межведомственнэ комиссие зэхащагъ. Гъэсты­ныпхъэ шхъуантIэм, электроэнергием, псым, фабэм ауасэ игъом къэугъои­гъэным ар фэгъэзагъ. Комиссием хэ­бзэухъумэкIо къулыкъухэм, ПсэупIэ ин­с­пекцием, уасэхэмрэ тарифхэмрэкIэ АР-м и ГъэIорышIапIэ, экономикэ хэ­хъоныгъэмкIэ ыкIи сатыумкIэ Минис­терствэм ялIыкIохэр хагъэхьагъэх.— ХъызмэтшIапIэхэм бжы­хьэ-кIымэфэ уахътэм зыфагъэхьазырынымкIэ чIыфэхэм яягъэ ­къэкIо. Ахъщэр икъоу аIэкIэлъмэ, IофшIэнэу ищыкIагъэр хэзыгъэ имыIэу зэшIуахыщт. ХъызмэтшIэпIэ цIыкIухэр ары анахьыбэу гумэкIыгъо хафэ­хэрэр. Сыда пIомэ, ахэм амалэу яIэр нахь макI, предприятие инхэм къызхагъэкIын IэпэчIэгъанэ аIэкIэлъ, — къыIуагъ Хъымыщ Тимур.ПсэупIэ-коммунальнэ хъызмэтым епхыгъэ IофшIэнэу республикэм щызэшIуахырэр зэкIэ фабэр, псы къабзэр, гъэстыныпхъэ шхъуантIэр, электро­энергиер унэхэм икъоу аIэкIэхьанхэм, цIыфхэм Iэрыфэгъу щыIакIэ яIэным фытегъэпсыхьагъэх. Ахэр мыгужъонхэм пае фэIо-фашIэхэм апкIэ игъом ттыныр зэкIэми типшъэрылъ.ХЪУТ Нэфсэт.