Iэшъынэ А.
Адыгеим иуниверситетхэм ачIахьэ зышIоигъохэм джыри лъэIу тхылъхэр ащаIахых. ТиреспубликэкIэ апшъэрэ къэралыгъо еджэпIитIу тиI: Адыгэ къэралыгъо университетыр ыкIи Мыекъопэ къэралыгъо технологическэ университетыр. Мы гъэмафэм еджапIэхэм лъэIу тхылъ мин 23-м ехъу къаIэкIэхьагъ.
ЛъэIу тхылъхэм япроцент 83-р Къэралыгъо фэIо-фашIэхэмкIэ порталым исервисэу «Поступление в вуз онлайн» зыфиIорэмкIэ атыгъэх. Лъэпкъ проектэу «Экономика данных» гъэцэкIагъэ зэрэхъурэм ишIуагъэкIэ ащ Iоф ешIэ. Мы илъэсым Адыгэ къэралыгъо университетым чIыпIэ 5940-рэ иI, бюджет чIыпIэ 858-ри ащ хэхьэ. МКъТУ-м чIыпIэ 2938-рэ иI, бюджет чIыпIэхэр 1149-рэ зэрэхъухэрэр.Адыгеим иуниверситетхэм гъунэгъу шъолъырхэм къарыкIырэ абитуриентхэри бэу къякIуалIэх: Краснодар краим ыкIи Темыр Кавказым иреспубликхэм къащыублагъэу Алтай краим, Амурскэ хэкум, Хабаровскэ краим анэсыжьэу.«ТиеджапIэхэр къэзыухыхэрэр Москва, Санкт-Петербург, Ростов-на-Дону, Краснодар яапшъэрэ еджэпIэ пэрытхэм ачIэхьэх. ШIэныгъэрэ IэпэIэсэныгъэрэ зэрагъэгъотыгъэу республикэм къагъэзэжьынышъ, ащ ихэхъоныгъэ яIахь зэрэхашIыхьащтым сицыхьэ телъ. Анахьэу тынаIэ зытедгъэтырэр «целевой» зыфаIорэ лъэныкъом тегъэпсыхьагъэу егъэджэгъэнхэр ары. НыбжьыкIэхэм шIэныгъэу зэрагъэгъотыгъэхэр республикэм иучреждениехэмрэ ипредприятиехэмрэ къащагъэшъыпкъэжьын алъэкIыщт, ахэм къахеубытэх медицинэ ыкIи чIыгулэжьын лъэныкъохэр», — къыхигъэщыгъ Адыгеим и ЛIышъхьэу КъумпIыл Мурат.Мы илъэсым нахьыбэмэ сэнэхьатэу аIэ къырагъэхьащтхэр зэпхыгъэхэр педагогикэр, менеджментыр, къэбар технологиехэр, экономикэр, зекIоныр, медицинэр, юриспруденциер ыкIи псэолъэшIыныр ары.«ЕджапIэхэр къэзыухыгъэхэм гъогу зэфэшъхьафхэр къяжэх. Нэбгырэ пэпчъ сыфэлъаIо еджапIэу ыгукIэ къыхихыгъэм чIэхьанэу, сэнэхьатэу зэригъэгъотыгъэр щыIэныгъэмкIэ цыхьэшIэгъу кIэгъэкъон фэхъунэу. Устудентыным къикIырэр еджэн закъор арэп, нэIосакIэхэм, гухэлъыкIэхэм, кIэ горэхэр къызэIухыгъэнхэм ар яуахът. ШIэныгъэу зэжъугъэгъотыгъэр тигупсэ Адыгеимкъызэрэщызфэжъугъэфедэжьыщтым сицыхьэ телъ», — республикэм исоциальнэ хъытыухэм къаригъэхьагъ ЛIышъхьэм.