Добро.РФ
Вице-премьерэу Дмитрий Чернышенкэр Правительствэм и Координационнэ гупчэ зэIукIэгъу щадыриIагъ компаниехэу зиорганизациехэм шIушIэныр ащызыгъэцакIэхэрэм ялIыкIохэм ыкIи гуфакIохэм. ШIушIэн Iофтхьабзэу зэшIуахыхэрэм апае рэзэныгъэ тхылъхэри ащ аритыжьыгъэх.
«Корпоративнэ волонтеркIэ» заджэхэрэм и Мафэ ехъулIэу а Iофтхьабзэр зэхащэгъагъ. Ащ хэлэжьагъэх Къэралыгъо Думэм ныбжьыкIэ политикэмкIэ и Комитет итхьаматэу, экосистемэу «ШIушIагъ. УФ» зыфиIорэм ипащэу Артем Метелевыр, Росмолодежым ипащэ игуадзэу Юрий Лескиныр, УФ-м экономикэ хэхъоныгъэмкIэ и Министерствэ илIыкIохэр, къэралыгъо хабзэм икъулыкъухэр, гуфэкIо организацие зэфэшъхьафхэм я Лъэпкъ совет хэтхэр, шIухьафтынэу «Тызэгъус» зыфиIорэр зыфагъэшъошагъэхэм ащыщхэр.«Ти Президентэу Владимир Путиным нэбгырэ пэпчъ амалэу иIэр гъэфедэгъэныр, исэнаущыгъэ хэгъэхъогъэныр, и Хэгъэгу фэшъыпкъэу пIугъэныр, социальнэ пшъэдэкIыжь зэрихьырэр икъоу зэхишIыкIыныр анахь лъэныкъо шъхьаIэхэу къыгъэнэфагъэх. Хэгъэгум иэкономикэ ихэхъоныгъэкIэ мэхьанэшхо зиIэхэм ащыщ зы чIыпIэ щызэдэлажьэхэрэм шIушIэныр ылъапсэу яIоф зэхэщэгъэныр. 2023-рэ илъэсым Урысыем зэхэубытэгъэ продукциеу къыщахьыжьыгъэм щыщэу сомэ миллиард 290-р ахэм ягъэхъагъэу плъытэн плъэкIыщт. 2024-рэ илъэсым ар сомэ миллиард 400-м шIокIыгъ.Бизнесым ылъэныкъокIи компаниехэм ястратегическэ планирование епхыгъэ документхэми ар нахь къахэщы хъугъэ. Джырэ лъэхъаным цIыфхэм IофшIэн язытыхэрэми а лъэныкъор нахь къыдалъытэу аублагъ», — къыIуагъ Дмитрий Чернышенкэм.
2030-рэ илъэсым ехъулIэу ныбжьыкIэхэм япроцент 45-м къыщымыкIэу шIушIэ IофшIэным къыхэгъэлэжьэгъэнымкIэ пшъэрылъ гъэнэфагъэхэр Президентым Правительствэм, федеральнэ ыкIи шъолъыр къулыкъухэм къафигъэуцугъ. Илъэсэу икIыгъэм зы IофшIапIэм зэдыIутхэм ащ фэдэ гухэлъ зыдаIыгъэу яIофшIэн зэрэзэхащэщтым фэгъэхьыгъэ хэбзэгъэугъэ аштэгъагъ. Къэралыгъомрэ ащ фэдэ компаниехэмрэ шIуагъэ хэлъэу язэдэлэжьэныгъэ зэдагъэпсынымкIи амал дэгъоу ар плъытэн плъэкIыщт.Правительствэм и Тхьаматэ игуадзэ щысэхэр ащкIэ къыхьыгъэх. Хы ШIуцIэ Iушъом, Дагъыстан ыкIи Краснодар краим къащыхъугъэгъэ тхьамыкIагъохэм ядэгъэзыжьынкIэ, хэушъхьафыкIыгъэ дзэ операцием хэлажьэхэрэм адеIэгъэнымкIэ гуфакIохэм бэ зэшIуахыгъэр.ЕджапIэхэр, колледжхэр, апшъэрэ еджапIэхэр къэзыухыхэрэр шIушIэ Iофтхьабзэхэм къахэщэгъэнхэмкIи ащ мэхьанэшхо иI. Дмитрий Чернышенкэм къыхигъэщыгъ ащ фэдэ IофшIэкIэ-шIум зэкIэхэри щыгъэгъозэгъэнхэ зэрэфаер.
АдыгеимкIэ гуфакIохэм япчъагъэ нахьыбэ мэхъу зэпыт. Непэ нэбгырэ мин 46-м ехъу тиреспубликэкIэ тиI. КIэлэеджакIохэм къащегъэжьагъэу зыныбжь хэкIотагъэхэм анэсыжьэу шIушIэныр яшэн хъугъэ. Нэбгырэ зырызэу яшIуагъэ къызэрагъакIорэм нэмыкIэу, IофшIэкIо купыр зэрэпсаоу ащ фэдэ Iофтхьабзэхэм ахэлажьэуи бэрэ къыхэкIы. ГущыIэм пае, хэушъхьафыкIыгъэ дзэ операцием хэлажьэхэрэм апае щыгъыни, хъытыуи, пси, лъэпэд хъагъэхэри, нэмыкIхэри зэдагъэхьазырыхэшъ, афарагъащэх. ГуфэкIо, ныбжьыкIэ движениехэм, общественнэ организациехэм, предпринимательхэм, цIыф гумэкIылэхэм бэ а лъэныкъомкIэ ашIэрэр. Партиеу «Единэ Россием» ишъолъыр къутамэ шIушIэ IэпыIэгъур зэпигъэурэп. НепэкIэ сомэ миллион 97,2-рэ фэдиз зытефэрэ хьылъэр аIэкIагъэхьагъ. ПстэумкIи хьылъэ тонн 6000 фэдиз афарагъэщагъ.Мы илъэсым иублэгъухэм адэжь пыим АдыгеякIэм зэрарышхо къызырехым, республикэм иорганизациябэмэ яшIуагъэ ахэм арагъэкIыгъ. Унэхэр зыпкъ игъэуцожьыгъэнхэмкIэ псэолъэшI компаниехэр къадеIагъэх. Фэтэрхэр зэкIэ зыпкъ рагъэуцожьыгъэх. ЦIыфхэр зычIэсыщт унэхэм яшIынкIи ахэр IэпыIэгъу афэхъух. АщкIэ щысэу къэбгъэлъэгъон плъэкIыщт зэфэшIыгъэ Iахьзэхэлъ обществэу «ОБД» зыфиIорэр. Мы илъэсым Мыекъуапэ щатыгъэ унэм кIэлэцIыкIу ибэхэм апае фэтэрхэр къафыхагъэкIыгъэх.ИлъэсыкIэ мэфэкIхэм ялъэхъан республикэм осышхоу къыщесыгъэм къыздихьыгъэ гумэкIыгъохэм ядэгъэзыжьынкIи яшIуагъэ къагъэкIуагъ муниципалитетхэм, псэупIэ-коммунальнэ хъызмэтым иорганизациехэм, район администрациехэм.Предприятиеу «Картонтарэми» щысэшIу къегъэлъагъо, ансамблэ цIэрыIоу «Налмэсым» ынаIэ тырегъэты, дэIэпыIэ. Джащ фэдэу ежь иIофышIэхэми социальнэ лъэныкъомкIэ ишIуагъэ арегъэкIы.АР-м и ЛIышъхьэ зэрэхигъэунэфыкIыгъэмкIэ, социальнэ политикэмкIэ цыхьэшIэгъу IэпыIэгъоу щыт мысатыу секторыр. Грант IэпыIэгъум амал къеты проектхэр пхырыщыгъэнхэмкIэ: илъэсэу икIыгъэм проект 40-мэ сомэ миллион 54-рэ апэIуагъэхьагъ.