АМ
АР-м социальнэ ыкIи экономикэ хэхъоныгъэхэр егъэшIыгъэнхэм фытегъэпсыхьэгъэ Унэе программэм къызэрэщыдэлъытагъэу, езыгъэжьэгъэкIэ фермерэу маткIохэр е хэтэрыкIхэр фэбапIэхэм къащызыгъэкIыхэрэм къэралыгъо IэпыIэгъоу субсидие ятыгъэным фэгъэхьыгъэ унашъом блэкIыгъэ илъэсым кIуачIэ иIэ хъугъэ.
АР-м мэкъу-мэщымкIэ и Министерствэ къызэритыгъэмкIэ, Адыгеим зыщязгъэтхыгъэ мэкъумэщ хъызмэтшIапIэхэр е унэе предпринимательхэр ары мы IэпыIэгъум къыхиубытэхэрэр. Сомэ миллиони 3-рэ мин 500-рэ анахьыбэу зы нэбгырэм ратынэу къыдэлъытагъэр.Ахъщэр мэткIо е хэтэрыкI гъэтIысыжьэу, куашэу агъэтIысхьащтхэм (сэнашъхьэр мыхэм къахиубытэрэп), зэфэшIыгъэ псэуалъэхэм, гущыIэм пае, фэбапIэхэм, къащагъэкIыщтмэ, ар зыхашIыкIыщтхэм, чIыгоу къызэлъаубытырэр къызэрашIыхьащтым, техникэм якъэщэфын тырагъэкIодагъэм пэIуагъэхьажьынэу къараты.
БлэкIыгъэ илъэсым сомэ миллиони 100-у ащ пае республикэм щагъэнэфэгъагъэр фермер нэбгырэ 30-мэ атырагощагъ. Джыри мы илъэсым нэбгырэ 29-рэ а къэралыгъо IэпыIэгъум къыхиубытагъ. Программэм ишIуагъэкIэ илъэситIум фермер хъызмэтшIэпIэ 59-рэ республикэм щагъэпсыгъ.Мы къэралыгъо IэпыIэгъур шъолъырым имэкъумэщ хъызмэт хэхъоныгъэ ышIыным имызакъоу, социальнэ ыкIи экономикэ зыпкъитыныгъэм игъэпытэн фэIорышIэ. Программэм къыщыдэлъытэгъэ мурадхэм ащыщ илъэсэу тызхэтым ыкIэм нэс IофшIэпIэ чIыпIэ 20-м къыщымыкIэу къэтыгъэныр, бюджетым къыхэмыхыгъэ инвестициеу сомэ миллион 11,1-рэ, хэбзэIахьэу сомэ миллионитIу экономикэм хахъоу иIэныр.2030-рэ илъэсым нэс программэм пIалъэу пылъ. Ащ нэс фэбапIэхэм, нэмыкI зэфэшIыгъэ псэуалъэхэм къащагъэкIырэ хэтэрыкIхэр, маткIохэр тонн 547-м нэсынэу ары зэрэгугъэхэрэр.Мы субсидиер зытефэщтхэр зэнэкъокъу шIыкIэм тетэу къыхахы. Ащ хэлэжьэщтым ыпэрапшIэу план ыгъэхьазырын фае. Ащ щигъэнэфэгъэ ахъщэм ипроценти 10-м къыщымыкIэу IэкIэлъыныр шапхъэхэм зэу ащыщ.Джащ фэдэу республикэ бюджетым ыпашъхьэ чIыфэ телъы хъущтэп, хэбзэIахьхэр игъом ытыгъэнхэ, мазэм гъотэу иIэр, гурытымкIэ лъытагъэу, цIыфыр зэрыпсэун ылъэкIыщт ахъщэ анахь макIэу Адыгеим щагъэнэфагъэм ехъун фае.Ащ нэмыкIэу, чIыгоу маткIор къызщигъэкIыщтыр нэмыкI горэм ыгъэфедэнэу ритыгъэ хъущтэп, нахьыпэкIэ ахъщэ IэпыIэгъу, субсидие е грант къыратыгъэнэу щытэп.Шапхъэу пылъыр зэкIэ ыгъэцакIи, зэнэкъокъум пхырыкIи субсидиер къызэратыгъэ фермерым ахъщэр мэзэ 18-м шIомыкIызэ планым зэрэщигъэнэфагъэм тетэу ыгъэфедэн, шIокI имыIэу зы IофшIэпIэ чIыпIэ къытын, илъэси 5,5-м нахь мымакIэу ар ыIыгъын фае.Зыгъэхьазырыгъэр ХЪУТ Нэфсэт.