ЧIыгу Iахь 30-мэ ащагъэунэфыгъ

Гъэмафэр къызихьагъэм къыщегъэжьагъэу шIокI имыIэу амброзием ебэныгъэным фэгъэхьыгъэ федеральнэ унашъом къыпкъырыкIыхэзэ Iофтхьабзэхэр республикэм щызэшIуахых. Амброзием ебэныгъэным хэкIыпIэ закъоу иIэр ар лъэпсэкIодэу гъэкIодыгъэныр ары. Мы унашъом игъэцэкIэн фэгъэзагъ Россельхознадзорым Къыблэ шъо­лъы­рымкIэ и ГъэIорышIапIэу Адыгэ Республикэм щыIэр.

2026-рэ илъэсым телъытэгъэ Iофтхьабзэм хахьэу ГъэIорышIапIэм икъэралыгъо инспекторэу ГъукIэлI Рустам джырэблагъэ Джэджэ районым дэкIыгъо уплъэ­кIунхэр щызэхищагъэх. Мы районым мэкъу-мэщымкIэ иотдел ипащэу Наталья Антиповар игъусэу цIыфхэм япсауныгъэ­кIэ щынагъо къэзытырэ амброзиер къызыщыкIырэ чIыпIэхэр къаплъыхьа­гъэх.УплъэкIун Iофтхьабзэу зэрахьагъэхэм къакIэлъыкIоу Джэджэ районым ичIыгу Iахь 30-м амброзиер къащыкIэу агъэу­нэфыгъ.Хэукъоныгъэу къыхагъэщыгъэхэр яIэубытыпIэхэу Россельхознадзорым Къыблэ шъолъырымкIэ и ГъэIорышIапIэ чIыгу Iахьхэр зиехэр ыгъэунэфыным фэшI «Роскадастрэм» и ГъэIорышIапIэу Адыгэ Республикэм щыIэм зыфигъэзэщт, нэужым хэбзэукъоныгъэм къызэрэдилъы­тэу чIыгу Iахьхэр зиунаехэм унашъохэр афашIыщтых.Джэджэ районым мэкъу-мэщымкIэ иотдел ипащэ къызэриIуагъэмкIэ, яамал къызэрихьэу мэкъумэщ хъызмэтым иIофышIэхэр амброзием ебэных. Ау къэIогъэн фае, мыгъэ ощхыбэ къызэрещхыгъэр амброзием игъэкIодынкIэ пэрыохъу къафэхъугъ. ЧIыгур зэрэцIынэм къыхэкIэу химие препаратэу рахьылIэрэм ишIуагъэ къакIорэп.Къэралыгъо инспекторэу ГъукIэлI Рустам къызэриIуагъэмкIэ, тыкъэзыуцухьэрэ дунаир зыушIоирэ уцыжъ лъэпкъэу амброзиер жъоныгъокIэ мазэм къэкIынэу регъажьэ. Арышъ, а мазэм къыщегъэжьагъэу ащ игъэкIодын ыуж итых, ащкIэ Iофыгъо зэфэшъхьафхэр зэрахьэх, уцыжъыр къызщыкIырэ чIыпIэхэр къыхагъэщых. Ахэм муниципальнэ образованиехэр къахагъэлажьэх, пащэхэм пэшIорыгъэшъэу макъэ ара­гъэIу. Шапхъэхэр зыукъуагъэу къыхагъэ­щыгъэхэр агъэпщынэх.Амброзием игъэкIодын Iэпэдэлэл зышIыхэрэм хэбзэгъэуцугъэу щыIэхэм къызэраIорэм тетэу адэзекIох. ЦIыф къызэрыкIом административнэ тазырэу сомэ 300-м къыщегъэжьагъэу 500-м нэс, IэнатIэ зыIыгъым — сомэ 500 — 1000-м, юридическэхэм — мини 5 — 10-м нэс.— Амброзием цIыфым ипсауныгъэ зэрэзэщигъакъорэм имызакъоу, чIыгум иягъэ регъэкIы, лэжьыгъэу къэ­кIырэми, ащ идэгъугъи къаще­гъакIэ, — еIо инспекторым. — Ащ нэмыкIэу, амброзием кIэу къыпытэкъурэр былым Iусым зыхафэкIэ, щэм иIэшIугъэ ыкIи ышъо зэблехъу, былымылми иягъэ екIы. Бэдзэогъу-шышъхьэIу мазэхэм къэгъагъэ хъунэу регъажьэ. Бжыхьэм ехъулIэу чылапхъэр ретэкъухьэ. Ащ кIэу къыпытэ­къурэм цIыфым ыпэпс къырегъэ­чъы, нэм нэпсыр къыкIе­гъэкIы, егъапскэ, ыкIышъо къэуп­лъыжьы, егъэхъупцIы. Ахэм адакIоу жьымыгъот къыреты.Россельхознадзорым и ГъэIорышIапIэу Къыблэ шъолъырым щыIэмрэ Адыгэ Республикэмрэ зэзэгъыныгъэ зэрэзэдашIыгъэм тетэу комиссие зэхаща­гъэу Iоф ешIэ, ащ хэтых АР-м мэкъу-мэщымкIэ и Министерствэ, муниципальнэ образованиехэм, УФ-м ошIэ-дэмышIэ IофхэмкIэ и ГъэIорышIэпIэ шъхьаIэу АР-м щыIэм ялIыкIохэр.— Планым диштэу республикэм ирайонхэм зэкIэми тыкIощт, лэжьыгъэ къызщагъэкIырэ мэкъу­мэщ чIыгухэр амброзием зэрэщаухъумэхэрэр тыуплъэкIущт. Амброзиер нахьыбэу къызыщыкIэу къы­хэдгъэщыхэрэр коцыр, хьэр, натрыфыр, соер, тыгъэгъазэр зыщалэжьырэ хъызмэтшIапIэхэр ары. ХъызмэтшIапIэхэм япащэхэм Iофтхьэбзэ зэфэшъхьафхэр адызетэхьэ, шIокI имыIэу амброзиер зэрагъэкIодын фаер агурытэгъаIо. Хэбзэгъэуцугъэу щыIэр аукъо зэрэмыхъущтым, ащ тазыр зэрэпы­лъым епхыгъэ мэкъэгъэIу тхьапэхэр пащэхэм афэтэгъэхьы, — къыIуагъ Рустам.КIАРЭ Фатим.