Зыныбжь хэкIотагъэхэу, зипсауныгъэ амалхэр зэщыкъуагъэхэм ыкIи сэкъатныгъэ зиIэхэм унэм узэращылъыплъэщтым зыщыфырагъэджэхэрэ Iофтхьабзэхэр цIыфхэм ясоциальнэ фэIо-фашIэхэр зыгъэцэкIэрэ Зэхэубытэгъэ гупчэу Тэхъутэмыкъое районым щыIэм регъэкIокIых. Ащ иIэпыIэгъу АР-м IофшIэнымрэ социальнэ хэхъоныгъэмрэкIэ и Министерствэ.
Ащ фэдэ егъэджэнэу Тэхъутэмыкъое районым щыкIуагъэм хэлэжьагъэх мы районым ыкIи Теуцожь районым, Адыгэкъалэ ясоциальнэ IофышIэхэр, нахьыжъхэм алъыплъэнхэмкIэ IэпыIэгъухэр ыкIи макIэу зекIорэ цIыфхэм яIахьылхэр.Тренерэу зыгъасэхэрэр унэм щарагъэгъотырэ IэпыIэгъум зегъэушъомбгъугъэнымкIэ московскэ экспертэу, шIушIэ фондэу «Жъыгъо гушIуагъор» зыфиIорэм илIыкIоу Юрий Баевыр ары. Iофтхьабзэм хэлажьэхэрэм къаригъэлъэгъузэ ащ къафиIотагъ сэкъатныгъэ зиIэр зэрэзэпырыбгъэзэщтыр, къызэрэбгъэтIысыщтыр, пIэм зэрэщыбгъэкощыщтыр, икъэбзэныгъэ узэрэлъыплъэщт амалхэр.— Охътэ кIыхьэм узэралъыплъэщт системэр (СДУ) — зыныбжь хэкIотагъэхэу ыкIи сэкъатныгъэ зиIэхэу ышъхьэ ифэIо-фашIэхэр зымыгъэцэкIэшъухэрэм IэпыIэгъу афэхъугъэнымкIэ зэхэубытэгъэ программ. Ар федеральнэ проектэу «Унагъор» зыфиIорэм хэхьэрэ проектэу «Нахьыжъхэр» зыцIэм къыдыхэлъытагъэу агъэцакIэ ыкIи унэм щыряIэ псэукIэ амалхэр Iэрыфэгъу афэшIыгъэным, япсэукIэ изытет нахьышIу хъуным фэIорышIэ, — щыхагъэунэфыкIыгъ АР-м IофшIэнымрэ социальнэ хэхъоныгъэмрэкIэ и Министерствэ.Адыгеим и ЛIышъхьэ къызэрэхигъэщыгъэмкIэ, мыщ фэдэ IэпыIэгъур ящыкIагъэу щыт. ИкIыгъэ илъэсым федеральнэ IэпыIэгъум ишIуагъэкIэ нэжъ-Iужъхэр ыкIи сэкъатныгъэ зиIэхэр зыщаIыгъхэрэ республикэ унэ-интернатым псэолъакIэ фашIи, кощыжьыгъэх. Ар шэпхъэшIухэм адиштэу зэтырагъэпсыхьагъ. IэпыIэгъу афэхъугъэныр — уалъыплъэн закъор арэп, зызэрагъэпсэфыщтым, творчествэм зэрэхащэщтхэм, гущыIэгъу зэфэхъунхэм атегъэпсыхьагъ. Муниципальнэ образованиехэм нахьыжъхэм язэIукIэпIэ гупчэ 42-рэ къащызэIуахыгъ. Ахэр зыфытегъэпсыхьагъэхэр зыныбжь хэкIотагъэхэм щыIэкIэ Iэрыфэгъу афызэхэщэгъэныр, социальнэ зэпхыныгъэхэр гъэпытэгъэнхэр, тинахьыжъхэм ящыIэкIэ-псэукIэ зыкъегъэIэтыгъэныр ары.