Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэрэ Адыгеим хэгъэгу кIоцI IофхэмкIэ и Министерствэрэ зэшIуахыгъэ Iофтхьабзэхэм яшIуагъэкIэ Тэхъутэмыкъое районым хэбзэнчъэу чIычIэгъ баиныгъэхэм ащыщ къызэрэщычIахыщтыгъэм гъунэ фашIыгъ.
2023-рэ илъэсым къыщыублагъэу Краснодар краим щыщ бзылъфыгъэу илъэс 43-рэ зыныбжьыр (чIычIэгъ байныгъэхэр къычIэхыгъэнымкIэ компанием ипащэу щытыгъэр) хэбзэнчъэу ащ хэбаикIыным ыуж итыгъ.Бзылъфыгъэм пэщэныгъэ зыдызэрихьэщтыгъэ предприятием лицензиеу иIэм ипIалъэ икIыгъагъэти, лъэIу тхылъ ащ аритыгъагъ пIалъэр фылъагъэкIотэнэу. Ау къыфадагъэп. Бзылъфыгъэм чIычIэгъ баиныгъэхэм якъычIэхын ащ пае зэпигъэугъэп.Краснодар краим щыпсэурэ бзылъфыгъэу илъэс 37-рэ зыныбжьым дишIыгъэ зэзэгъыныгъэм тетэу 2025-рэ илъэсым жъоныгъуакIэм нэс пшэхъо кубометрэ мин 830-рэ фэдиз ащагъ. Къэралыгъом сомэ миллион 235-м ехъу зэрар рагъэшIыгъ.Урысыем и Уголовнэ кодекс ия 171-рэ статья иа 1-рэ Iахь диштэу уголовнэ Iоф бзылъфыгъитIум къафызэIуахыгъ. Мы лъэхъаным уголовнэ Iофым изэхэфын ыкIэм фэкIуагъ. Прокуратурэм икIэух зэфэхьысыжь хьыкумым фагъэхьыгъ нахь игъэкIотыгъэу хэплъэным пае.