Тхьамэфищ зикIыхьэгъэ зэпыугъом ыуж «Зэкъошныгъэм» Урысые зэнэкъокъур ригъэжьэжьыгъ. Апэрэ зэIукIэгъури пэрытныгъэр зыIыгъ командэу «Севастополым» дыриIагъ.
«Зэкъошныгъ» (къ. Мыекъуапэ) — «Севастополь» (къ. Севастополь) — 1:3 (1:2)Iэгуаор къэлапчъэм дэзыдзагъэхэр: Хьэх Тамерлан (я 10-рэ такъикъыр), Вадим Зубавленкэр (я 15-рэ такъикъыр), Дмитрий Ивановыр (я 36-рэ ыкIи я 49-рэ такъикъхэр).Футбол шапхъэхэр зыукъуагъэхэр, тхьэпэ гъожь къэзылэжьыгъэхэр: А. Дугу, Делэкъо А., К. Юшко, Едыдж Т., С. Абзалилов.«Зэкъошныгъэм» щыджэгугъэхэр: Хачиров (къэлэпчъэIут), Васильев, Датиев (ХъуакIо), Солоп, Черджиев, Кобл, Хьэх (Едыдж), Цанава (Iащэ), Юшко, Делэкъо, Къуанэ (Малыш).Тренер шъхьаIэр: Александр Кайванов.«Севастополым» хэтыгъэхэр:Вертиев (къэлэпчъэIут), Абзалилов, Алиев, Гречкин, Потапов, Дугу, Зубавленко (Гевлич), Максимов (Рубан), Иванов (Супрун), Османов (Загребельный), Степанович (Оленев).Тренер шъхьаIэр: Станислав Гудзикевич.Урысые зэнэкъокъум иапэрэ къекIокIыгъо къыдыхэлъытагъэу мы командэхэр ыпэкIэ зэдешIэгъагъэх. Ащ дэжьым зэIукIэгъур 0:0-у аухыгъагъ. Джы «Севастополыр» Мыекъуапэ къеблэгъагъ, Iэгуаохэри мымакIэу футболыр зикIасэхэм алъэгъугъ. ГухэкIыр — ахэр «Зэкъошныгъэм» иехэп.
ЗэIукIэгъум ипэублэ тикомандэ пчъагъэр къызэIуихыгъ. Хьэх Тамерлан Iэгуаор къэлапчъэм дигъэфагъ. Стадионым къекIолIагъэхэр икъоу ащ щыгушIукIынхэу игъо ифагъэхэп. Такъикъи 5-кIэ хьакIэхэм пчъагъэр 1:1 ашIыжьыгъ. Тикомандэ щыджэгурэ Кирилл Юшко Iэгуаоу къыфадзыгъэр къыубытыным ычIыпIэ ар блигъэкIыгъ, кIэхьажьынэуи къыдэхъугъэп, хэукъоныгъэу ышIыгъэм икIэух хъугъэ голыр. Ау «Зэкъошныгъэр» ащ къыгъэуцугъэп. Такъикъ заулэкIэ пчъагъэм хигъэхъон амал дэгъу къыфыкъокIыгъагъ. Делэкъо Аскэр Iэгуаор Къонэ Амир IэкIигъэхьагъ, ау аужырэр метрийкIэ къэлапчъэм кIэрытэу фыдэгъэфэжьыгъэп.Тифутболистхэм ялъытыгъэмэ, «Севастополым» хэтхэм яамалхэр нахь агъэфедагъэх. Я 36-рэ такъикъхэм пчъагъэр 1:2-м нагъэсыгъ. ЯтIонэрэ едзыгъом ипэублэ ящэнэрэ Iэгуаори «Зэкъошныгъэм» икъэлапчъэ къыдагъэфагъ.«Апэрэ чIыпIэм щыт командэм тыдешIагъ. IэгоуитIур тэ тихэукъоныгъэ къытфихьыгъ. Ухьазырыныгъэ дэгъу зиIэ командэм удэджэгу зыхъукIэ, ащ фэдэхэр къызхэбгъафэ хъущтэп. Зыпари хэпIухьэшъущтэп — «Севастополыр» непэ нахь лъэш», — зэIукIэгъу ужым къыIуагъ «Зэкъошныгъэм» итренер шъхьаIэу Александр Кайвановым.Я 16-рэ турым командэхэр зэрешIагъэхэр:«Нефтяник» — «Заря» — 2:1«Ангушт» — «Кызылташ» — 0:0«Астрахань» — «Чайка-М» — 3:0«Победа» — «Шахтер» — 4:3«Спартак-Налщык» — «Рубин-Ялта» — 1:1«Зэкъошныгъ» — «Севастополь» — 1:3«Динамо-2» — «Ростов-2» — 1:2Мы зэIукIэгъум ыуж «Зэкъошныгъэр» зы чIыпIэкIэ къехыгъ, я 8-м уцугъэ. Апэрэр зэриIыгъ «Севастополым», ятIонэрэм къыдэкIоягъ «Ростов-2-р», ящэнэрэ чIыпIэм щыт «Шахтерыр».Командэхэр зыдэщыт чIыпIэхэр ыкIи очко пчъагъэу рагъэкъугъэр:
- «Севастополь» — 35
- «Ростов-2» — 32
- «Шахтер» (Донецк) — 30
- «Нарт» (Щэрджэскъал) — 24
- «Кызылташ» (Бахчисарай) — 24
- «Победа» (Хасавюрт) — 24
- «Спартак-Налщык» — 24
- «Зэкъошныгъ» (Мыекъуапэ) — 22
- «Рубин-Ялта» — 21
- «Нефтяник» (Избербаш) — 18
- «Заря» (Луганск) — 15
- «Астрахань» — 15
- «Ангушт» (Назрань) — 1413«Динамо-2» (Махачкала) — 9
- «Чайка-М» (Песчанокопское) — 7