А. Гусев
Адыгеим и ЛIышъхьэу КъумпIыл Мурат культурнэ кIэным хэхьэрэ псэуалъэу шъолъыр мэхьанэ зиIэр зэрагъэкIэжьырэр зэригъэлъэгъугъ. Мыекъуапэ иурамэу Советскэм ия 186-рэ унэр республикэм ипащэ къыплъыхьагъ. Ар джырэ уахътэм зыпкъ рагъэуцожьы лъэхъаным диштэу агъэфедэным фэшI.
IофшIэгъу дэкIыгъом джащ фэдэу хэлэжьагъэх АР-м иминистрэхэм я Кабинет и Тхьаматэ игуадзэу Хъоткъо Хъызыррэ АР-м ныбжьыкIэ IофхэмкIэ и Комитет итхьаматэу Максим Галушкинымрэ, АР-м культурнэ кIэным хэхьэрэ псэуалъэхэм якъэгъэгъунэнрэ ягъэфедэнрэкIэ и ГъэIорышIапIэ ипащэу ЦIыпIынэ Рустем, Апэрэхэм я Движение ишъолъыр къутамэ и Совет итхьаматэу Ованес Шекерьянц.Псэуалъэр 1917-рэ илъэсым зыщыпсэущтхэ унэу ашIыгъагъ. Нэужым къалэу Мыекъуапэ хэгъэгу кIоцI IофхэмкIэ и ГъэIорышIапIэ экономическэ бзэджэшIагъэхэм ябэныгъэнымкIэ иотделение чIэтыгъ, ащ ыуж агъэфедагъэп. Адыгеим и ЛIышъхьэ ипшъэрылъкIэ республикэ мылъкоу сомэ миллион 75-рэ фэдиз къыхагъэкIыгъ гъэцэкIэжьынхэм ыкIи тарихъ теплъэу иIагъэр зэтырагъэуцожьыным афэшI.Унэ нэIум инахьыбэ псэолъэшIхэм зэтырагъэуцожьыгъах, ыбгъухэмрэ ыкIыбрэ зэрэгъэпкIэгъэщтхэр зэхагъэуцуагъ, шъхьаныгъупчъэхэм ащыщхэр зэблахъугъэх, ыкIоцI аигъ, унашъхьэр зэблахъугъ.
Джащ фэдэу ыкIоцIкIэ щыIэ коммуникациехэр зэблахъущтых, ыпэкIэ хэлъыгъэ шъхьаныгъупчъэхэм, пчъэм афэдэхэр унэ гупэм хагъэуцощтых, псыр, гъэстыныпхъэ шхъуантIэр ыкIи электричествэр ращэщтых. IофшIэнхэр республикэм и Мафэ ипэгъокIэу аухынхэу агъэнафэ. Ащ ыуж псэуалъэр ратыщт кIэлэцIыкIухэмрэ ныбжьыкIэхэмрэ я Урысые общественнэ-къэралыгъо движениеу Апэрэхэм я Движение ишъолъыр къутамэ, мыщ организациер зыгъэIорышIэхэрэр чIэсыщтых.Iофэу зэшIуахыгъэм шъолъырым ипащэ зыщигъэгъозагъ ыкIи гъэцэкIэжьынхэм яухынкIэ, чIыналъэу къыпэIулъым изэтегъэпсыхьанкIэ пшъэрылъ гъэнэфагъэхэр афишIыгъэх. IофшIэныр шэпхъэ лъагэхэм адиштэнымрэ ныбжьыкIэ организацием Iэрыфэгъоу Iоф щишIэным тегъэпсыхьэгъэнымрэ анахьэу ынаIэ зытыригъэтыгъэхэр.
«Мыщ фэдэ проектхэр зэшIотхыхэзэ пшъэрылъхэу Мыекъуапэ итарихъ теплъэ изэтегъэуцожьынрэ ныбжьыкIэ инфраструктурэм ихэгъэхъонрэ зэдэтэгъэцакIэх. Зы тарихъ унэ дгъэпсыжьыгъахэ шъолъыр гупчэу «Адыгеим иныбжьыкIэхэр» чIэсынхэу, мыщ «Движение Первых» зыфиIорэм ишъолъыр къутамэ екIужьыщт. Урысыем и Президент, УФ-м и Правительствэ IэпыIэгъу къытфэхъухэзэ ныбжьыкIэхэм Iофэу адатшIэрэр лъыдгъэкIотэщт», — къыIуагъ КъумпIыл Мурат.Къыхэдгъэщын, икIыгъэ илъэсым икIэуххэмкIэ къэралыгъо ныбжьыкIэ политикэм ипхырыщын шIуагъэу къытырэмкIэ урысые рейтингым ианахь шъолъыр дэгъуи 10-мэ Адыгеир ахэхьагъ, апэрэхэм ясатырэ ухэкIыжьы хъущтэп. Шъолъырым гъэпсын Iофэу щыкIохэрэм зэкIэми ныбжьыкIэхэр чанэу ахэлажьэх, бэ темышIэу ахэр ары тиреспублики, зэрэ Урысыеуи якъэкIощт уахътэ зыгъэпсыщтхэр.«Урысыем иныбжьыкIэхэм» зэхащэгъэ Урысые зэнэкъокъоу «Шъолъырыр ныбжьыкIэхэм апай» зыфиIорэм текIоныгъэ къыщыдэзыхыгъэхэм Адыгэ Республикэр ащыщ. Мы илъэсым Адыгеим иныбжьыкIэ политикэ лъэныкъо зэфэшъхьафхэмкIэ хэхъоныгъэ егъэшIыгъэнымкIэ программэм ипхырыщын сомэ миллион 81,3-рэ къыфыхагъэкIыгъ. Лъэныкъо шъхьаIэхэм ащыщ хъущтыр ныбжьыкIэхэм апае инфраструктурэ гъэпсыгъэныр ары. Мы илъэсым Теуцожь ыкIи Шэуджэн районхэм лъэхъаным диштэрэ ныбжьыкIэ гупчэхэр къащызэIуахыщтых.Джыри мыгъэ тишъолъыр грантитIу къыдихыгъ зэкIэмкIи сомэ миллион 84-м ателъытагъэу — Росмолодежым изэнэкъокъухэу «Шъолъырыр ныбжьыкIэхэм апай» ыкIи «IофышIухэм яшъолъыр» зыфиIохэу лъэпкъ проектэу «НыбжьыкIэхэмрэ кIэлэцIыкIухэмрэ» къыхиубытэу зэхащагъэхэмкIэ. А мылъкумкIэ 2027-рэ илъэсым муниципальнэ ныбжьыкIэ гупчэхэр Красногвардейскэ районымрэ Адыгэкъалэрэ ащашIыщтых, Мыекъуапэ иныбжьыкIэ организациехэр зычIэт псэолъищ агъэцэкIэжьыщт. 2030-рэ илъэсым ыкIэ нэс ныбжьыкIэ гупчэхэр муниципалитет пэпчъ иIэ хъущтых.НыбжьыкIэ политикэм мылъкоу фатIупщырэми хэхъо. ИкIыгъэ илъэсым Адыгеим ащ сомэ миллиони 170-рэ пэIуигъэхьагъэмэ, мыгъэ сомэ миллиони 197,2-рэ къыфыхигъэкIыгъ. НыбжьыкIэхэр чанэу гъэпсын IофшIэнхэм ахэлажьэх, къэралыгъо къулыкъухэм ягъусэуи лъэпкъ проектхэу «НыбжьыкIэхэмрэ кIэлэцIыкIухэмрэ», «IофышIэхэр» зыфиIохэрэм къадыхэлъытэгъэ Iофтхьабзэхэр зэшIуахых.Аужырэм ылъэныкъокIэ Iофышхо зэшIохыгъэ мэхъу: республикэм федеральнэ проектэу «Профессионалитетыр» щырагъэкIокIы, ащ къыхиубытэу медицинэ кластерэу «ПрофиМед» зыфиIорэр ыкIи зекIонымрэ фэIо-фашIэхэмрэ я Гупчэ мэлажьэх лъэныкъохэр зыщыкIэхэрэ IофышIэхэр агъэхьазырынхэм пае.Апэрэхэм я Движение къыхэлажьэзэ республикэм патриотическэ Iофтхьабзэхэр щырагъэкIокIых: хэушъхьафыкIыгъэ дзэ операцием хэлэжьагъэхэм класс зэIукIэгъухэр афызэхащэх, Апэрэхэм я Движение ипроект шъхьаIэу «Зарница 2.0», акцие ыкIи егъэджэн зэфэшъхьафхэр рагъэкIокIых. Мы зэдэлэжьэныгъэм иекIолIакIэхэм щатегущыIагъэх АР-м и ЛIышъхьэу КъумпIыл Муратрэ Апэрэхэм я Движение и Правление и Тхьаматэу, Урысыем и ЛIыхъужъэу Артур Орловымрэ зэдыряIэгъэ зэдэгущыIэгъум.АР-м и ЛIышъхьэ ипресс-къулыкъу