Iэшъынэ А.
Донбасс щыкIогъэ заом хэкIодэгъэ кIэлэцIыкIухэм яшIэжь мафэ фэгъэхьыгъэ игъэкIотыгъэ патриотическэ Iофтхьабзэ Мыекъуапэ Зэкъошныгъэм игупчэ тыгъуасэ щыкIуагъ. Ащ кIэщакIо фэхъугъ АР-м ныбжьыкIэ IофхэмкIэ и Комитет ыкIи Гупчэу «Адыгеим иныбжьыкIэхэр» зыфиIорэр.
Iофтхьабзэм хэлэжьагъэх дзэ общественнэ организациехэм ялIыкIохэр, республикэм ит еджэпIэ организациехэм ыкIи ныбжьыкIэ купхэм япэрыт нэбгыри 100-м ехъу.ШIуфэс гущыIэхэмкIэ къэзэрэугъоигъэхэм закъыфигъэзагъ ветеранхэм я Урысые общественнэ организацие и Адыгэ республикэ къутамэу «ДзэкIолI зэкъошныгъэр» зыфиIорэм итхьаматэу Алексей Харитоновым.— Непэ зэрэкъэралыгъоу шIэжь мафэр щыхагъэунэфыкIы. 2014-рэ илъэсым, бэдзэогъум и 27-м Украинэм иуIэшыгъэ кIуачIэхэм урамэу Горловкэм щэрыонэу къыщызэIуахыгъэм лажьэ зимыIэ цIыфхэр щаукIыгъэх, мин пчъагъэ ауIагъ, ахэм кIэлэцIыкIухэри ахэтыгъэх. Ащ фэдэ лыузыр пчъагъэхэмкIэ къэппчъышъущтэп, ахэр егъашIэм тщыгъупшэщтхэп. Непэ тидзэкIолIхэу хэушъхьафыкIыгъэ дзэ операцием хэлажьэхэрэм зэпэуцужьым хэкIодагъэхэм апае нэпсэу рагъэхыгъэр афагъэгъущтэп, — къыIуагъ Алексей Харитоновым.Патриотическэ Iофтхьабзэм къыдыхэлъытагъэу кIэлэцIыкIухэм яшIэжь агъэлъапIэзэ, шэф остыгъэ миным ехъу афызэхагъэнагъ, такъикърэ афэшъыгъуагъэх.— Лажьэ зимыIэ сабыйхэу зищыIэныгъэ пасэу пыч фэхъугъэхэм яшIэжь дгъэлъэпIэнэу тыкъэзэрэугъоигъ. Шэф остыгъэу афыхэдгъэнагъэхэр гухэкIым, зыкIыныгъэм ыкIи пстэуми зэрэтщымыгъупшэхэрэм ятамыгъэу хъущт, — хигъэунэфыкIыгъ ныбжьыкIэ гупчэм иIофышIэу Самуил Образцовым.IЭШЪЫНЭ Сусан.