ЗэIухыгъэ къэбарлъыгъэIэс амалхэр
1922-рэ илъэсым бэдзэогъум и 27-р — Черкес автоном хэкур загъэпсыгъэ маф, адыгэ къэралыгъо гъэпсыкIэм ыкIи лъэныкъо зэфэшъхьафхэм чанэу хэхъоныгъэ ашIэу зырагъэжьагъэм иублапI.
КъыдэгъэкIыжьыным епхыгъэ предприятиякIэхэр, еджапIэхэр, сымэджэщхэр, культурэм иунэхэр, коммунальнэ ыкIи энергетическэ псэуалъэхэр, нэмыкIыбэхэр ашIыхэу рагъэжьэгъагъ. Ежь шъолъырми зызэрихъокIыщтыгъ: лъэпкъ-чIыпIэ образованиер Урысые Федерацием хэхьэрэ шъолъырэу ежь-ежьырэу зиIофхэр зыгъэзекIорэ Адыгэ Республикэу хъугъэ.«Урысыем щыпсэурэ цIыф лъэпкъ зэфэшъхьафхэм тырягъусэу илъэси 100-м хъугъэу тарихъ чэзыухэр зэпытэчых, уахътэм къыгъэуцурэ пшъэрылъхэм такъыпкъырыкIызэ, лъэгэпIакIэхэр тэштэх. А пстэуми адакIоу тятэжъхэм къытфагъэнэгъэ кIэныр къэтыухъумагъ: бзэр ыкIи культурэр, тарихъыр ыкIи лъэпкъ шэн-хабзэхэр, тичIыгу гупсэ зыфэдэ къэмыхъугъэ ичIыопс дахэ. ЗэхъокIыныгъэшIу пстэуми алъапсэ зыфэкIожьырэр республикэм щыпсэурэ лъэпкъхэм мамырныгъэ-зэгурыIоныгъэу азыфагу илъыр ары. КIэлэегъаджэхэм ыкIи врачхэм, псэолъэшIхэм ыкIи чIыгулэжьхэм, къыдэгъэкIыжьыным ылъэныкъокIэ лажьэхэрэм ыкIи къулыкъушIэхэм, шIэныгъэлэжьхэм ыкIи артистхэм – тилъэныкъо гупсэ джыри нахь зэтегъэпсыхьагъэ хъуным зиIахь хэзышIыхьэгъэ пстэуми ар ятекIоныгъ.Непэ тятэжъ пIашъэхэм къадэхъугъэр зэкIэ къэтыухъумэным ыкIи нахь хэхъоныгъэ едгъэшIыным тынаIэ тетэгъэты. Хэгъэгум и Президент, УФ-м и Правительствэ яIэпыIэгъу хэлъэу лъэпкъ проектхэр, къэралыгъо программэхэр, партиеу «Единэ Россиер» кIэщакIо зыфэхъурэ Iофтхьабзэхэу экономикэм нахь зыкъыIэтынымкIэ, гъэсэныгъэм, псауныгъэм икъэухъумэн, культурэм, социальнэ лъэныкъом япхыгъэ гъэхъагъэхэр шIыгъэнхэмкIэ зишIогъэшхо къакIохэрэр пхырытэщых. Тэ амалышхохэр тиIэх, ахэр зэкIэ дгъэфедэщтых Адыгеим ипсэупIэ пэпчъ адэсхэм щыIэкIэ Iэрыфэгъу яIэнымкIэ, Iоф ашIэнымкIэ, кIэлэцIыкIухэр апIунхэмкIэ», — социальнэ хъытыухэм къаригъэхьагъ Адыгеим и ЛIышъхьэу, партиеу «Единэ Россием» ишъолъыр къутамэ и Секретарэу КъумпIыл Мурат.