Пшъэрылъ шъхьаIэхэм язэшIохынкIэ республикэм амал зэфэшъхьафхэр щагъэфедэх. Ахэм ащыщых «Единэ Россием» ипартийнэ проектхэр. Мыщ дэжьым къыхэгъэщыгъэн фае лъэпкъ проектхэм къыдалъытэрэ Iофтхьабзэхэм илъэсым къыкIоцI мылъкоу апэIуагъахьэрэр сомэ миллиарди 3-кIэ нахьыбэ зэрэхъугъэр.
Адыгэ Республикэм и ЛIышъхьэу КъумпIыл Мурат къызэрэхигъэщыгъэмкIэ, илъэсэу икIыгъэм къыщыублагъэу лъэпкъ проектхэм язэшIохынкIэ илъэсихым телъытэгъэ чэзыур ублагъэ хъугъэ. Лъэпкъ проектыкIэ 12-у республикэм щыпхыращыхэрэм ахэхьэх «Унагъор», «IофышIэхэр», «НыбжьыкIэхэр ыкIи кIэлэцIыкIухэр», «ЩыIэныгъэм пае инфраструктурэр» зыфиIохэрэр.КъумпIыл Мурат агу къызэригъэкIыжьыгъэмкIэ, 2025-рэ илъэсым лъэпкъ проектхэм къыдалъытэрэ Iофтхьабзэхэм сомэ миллиарди 8 апэIуагъэхьагъ, къэралыгъо программэхэм – сомэ миллиарди 6,5-рэ. Псэолъи 171-мэ япхыгъэ IофшIэнхэр агъэцэкIагъэх. Мы илъэсым сомэ миллиард 11-м ехъу лъэпкъ проектхэм апэIуагъэхьащт. Федеральнэ къэралыгъо программэхэм ягъэцэкIэн пае джыри сомэ миллиарди 5,6-рэ къафыхагъэкIыщт. 2025-рэ илъэсым къыщыублагъэу «Унэе программэкIэ» заджэхэу илъэсихым телъытагъэр агъэцакIэ. Ащ сомэ миллиарди 6 пэIухьащт. Мылъкур зэкIэ экономикэм ихэхъоныгъэ къыдилъытэрэ лъэныкъохэм пае агъэфедэщт.— Бюджетым зэкIэ къызэлъеубыты, ау социальнэ лъэныкъом нахь тегъэпсыхьагъэу щыт. Илъэсэу икIыгъэм зэкIэ хъарджхэм япроцент 66-м ехъурэр а лъэныкъор ары зыпэIухьагъэр, — къыхигъэщыгъ КъумпIыл Мурат.