Гупчэм ихъарзынэщ
Республикэм щыпсэухэрэм япсауныгъэ изытет уплъэкIугъэным фэгъэхьыгъэ Урысые Iофтхьабзэм къыдыхэлъытагъэу «ШIур къуаджэ пэпчъ» зыфиIорэр Адыгеим щылъагъэкIуатэ. 2018-рэ илъэсым щегъэжьагъэу ар зэхащэ. БлэкIыгъэ илъэсым къыщыублагъэу мы Iофтхьабзэм дыхэтэу «Псауныгъэ пытэр ыкIи гъэшIэ кIыхьэр» зыфиIорэ шъолъыр медицинэ программэри рагъэкIокIы.
Общественнэ псауныгъэмкIэ ыкIи пэшIорыгъэшъ медицинэ уплъэкIунхэмкIэ республикэ Гупчэм щылажьэхэрэм районэу зыдакIохэрэм Iоф ащызышIэрэ врачхэр ягъусэхэу цIыфхэм япсауныгъэ изытет зэрагъашIэ. Ахэм адэсхэм терапевтым, неврологым, кардиологым, нэхэм яIазэхэрэм, нэмыкIхэми зафагъэзэшъущт. Хъулъфыгъэхэми бзылъфыгъэхэми хэушъхьафыкIыгъэ врачхэу ящыкIагъэхэми якIолIэшъущтых. ЦIыфыр зыгъэгумэкIырэ лъэныкъом елъытыгъэу уплъэкIун тедзэхэри афашIых.КъэIогъэн фае, зэкIэ врачхэр зэгъусэхэу псэупIэхэм якIуалIэхэрэп, ау лъым изытет ыкIи терапевтым иуплъэкIунхэм язэфэхьысыжьхэмкIэ ищыкIэгъэ врачым сымаджэр нэужым екIолIэшъунэу тхьапэ раты. Ащ фэдэ шIыкIэм тетэу республикэм щыпсэурэ нэбгырэ 1500-м кIахьэу ауплъэкIугъах. ЦIыфхэм гуцаф амышIэу уз зэфэшъхьафхэр къызфыхагъэщыгъэхэр къахэкIыгъэх.— ЦIыфым уз хьылъэ иIэмэ ар нахьыжьэу къыхэгъэщыгъэмэ, гъэхъужьыгъэным игугъэпIэшIухэр щыIэх. Ау медицинэ уплъэкIунхэр умышIхэу сымаджэм идагъор къэшIэгъуай. Гукъау нахь мышIэми, нахьыбэр узым къыримыутыпэу врачхэм адэжь кIорэп. Арышъ, тэ ежь цIыфхэм тафэкIо. Анахьэу нэжъ-Iужъхэр ары район сымэджэщхэм зафагъэзэныр къызэхьылъэкIыхэрэр, — къыIуагъ АР-м псауныгъэр къэухъумэгъэнымкIэ и Министерствэ общественнэ псауныгъэмкIэ и Гупчэ зэпхыныгъэхэмкIэ ыкIи общественнэ проектхэмкIэ иотдел ипащэу Джульета Керим-Заде.Мы илъэсыр къызихьагъэм щегъэжьагъэу республикэм ипсэупIэхэу нахь чыжьэу район гупчэхэм апэIудзыгъэхэм медицинэм иIофышIэхэр макIох. ДэкIыгъо 30-м кIахьэу ашIыгъах.— Врачхэм ямызакъоу Мыекъопэ къэралыгъо технологическэ университетым имедицинэ Институт ыкIи медицинэ колледжым ащеджэрэ студентхэр волонтерхэу тигъусэх. Ежь ныбжьыкIэхэм яшIэныгъэхэм ахагъэхъонкIи ар дэгъу, тэри тиIэпыIэгъушхох, — еIо тигущыIэгъу.УплъэкIунхэм анэмыкIэу, цIыфхэм япсауныгъэ изытет зэрэлъыплъэжьыщтхэм, узхэм якъежьэгъухэм яапэрэ нэшанэхэр зыфэдэхэр, шхыныгъоу щыбгъэзыен фаехэм, мыхэм анэмыкIхэм афэгъэхьыгъэ зэдэгущыIэгъухэри медицинэм иIофышIэхэм къоджэдэсхэм адашIыгъ.ШышъхьэIу мазэм зэпыугъо фашIынышъ, шIушIэ Iофтхьабзэм Iоныгъо мазэм лъыпадзэжьыщт. Тхьамафэм зэ мы купыр дэкIызэ, илъэсым ыкIэм нэс ар зэхащэщт.Цэй Замир.