Кушъхьэфэчъэ спортымкIэ Урысыем и Первенствэ Республикэу Татарстан икъалэу Иннополис щыкIуагъ. Адыгеир ащ дэгъоу къыщигъэлъэгъуагъ спортымкIэ мастерэу Вадим Ларичевым.
Зэрэхабзэу къэралыгъо зэнэкъокъум спортсмен анахь лъэшхэр къыугъоигъ. Мы спорт лъэпкъым изы лъэныкъоу «Критериум» зыфиIорэр ары Вадим Ларичевым зызщиушэтыгъэр.Иннополис иурамхэм гъогууанэр арыкIощтыгъ. Километри 2,4-рэ зы урам къечъэкIыгъом икIыхьэгъагъ. Ащ фэдэу 8 спортсменхэм зэпачын фэягъ. ЗэкIэмкIи къачъынэу щытыгъэр километрэ 40. Нахь псынкIэу зы гъогу хъураер къэзыкIурэм пчъагъэхэр къалэжьых. Мыщ фэдэ шIыкIэм тетэу къэчъагъэр нэбгырэ 29-рэ. Вадим фэдэу спортымкIэ мастерэу ахэтыгъэр джыри зы спортсмен. Ащ емылъытыгъэу, Адыгеим икIыгъэ кIалэм апэрэ такъикъхэм ухьазырыныгъэ дэгъу къыгъэлъагъощтыгъэп. Пэрытныгъэр зыIыгъыгъэ нэбгырищым ауж къинэщтыгъ.
КIэмыхьашъужьынхэу зэкIэми апэ ишъыгъэгъэ Москва илIыкIоу Даниэль Прокофьевым апэрэ чIыпIэр ыубытыгъ. Адрэ хагъэунэфыкIырэ чIыпIэхэм афэбэнагъэх Свердловскэ хэкум щыщ Артем Шкирмонтовыр (очкоуи 10), Санкт-Петербург къикIыгъэ Егор Костыря (7), Ленинградскэ хэкум илIыкIоу Николай Кезеревыр (5) ыкIи Вадим Ларичевыр (5). Аужырэ гъогум нахь лъэшыр къыгъэнэфагъ. Тиспортсмен ыпэ ишъи, иIэгъэ пчъагъэм джыри тфы хигъэхъуагъ. Артем Шкирмонтовым зыпари къылэжьышъугъэп. СпортсменитIум зэфэдэ пчъагъ яIэу хъугъэр. Ау мы спортым ишапхъэхэмкIэ, аужырэ гъогу хъураер къэзыхьырэр ары текIорэр. Ащ къыхэкIэуи Вадим Ларичевым тыжьын медалыр къыхьыгъ.КIалэр зыгъасэрэр тренерэу Юрий Курочкин.