А. Гусев
Урысые Федерацием следствиемкIэ икъулыкъухэм яIофышIэ и Мафэ ихэгъэунэфыкIын фэгъэхьыгъэ Iофтхьабзэ АР-м и Правительствэ зычIэт унэм тыгъуасэ щыIагъ. Ясэнэхьат мэфэкIкIэ следствием иIофышIэхэмрэ иветеранхэмрэ афэгушIонэу къэкIуагъ Адыгеим и ЛIышъхьэу КъумпIыл Мурат.Джащ фэдэу зэIукIэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр,УФ-м и Следственнэ комитет Адыгэ РеспубликэмкIэ иследственнэ гъэIорышIапIэ ипащэу Василий Лариныр, прокуратурэм, хэбзэухъумэкIо ыкIи уплъэкIокIо къулыкъухэм, хьыкумхэм ялIыкIохэр.
МэфэкI зэхахьэм хэлажьэхэрэм шIуфэс къарихызэ, республикэм и ЛIышъхьэ къыхигъэщыгъ Урысые Федерацием и Следственнэ комитет зызэхащагъэр илъэс 15 зэрэхъурэр. ХэушъхьафыкIыгъэ къулыкъоу зэхащэгъэгъэ Комитетым бзэджэшIагъэхэм язэхэфынкIэ мэхьанэшхо зэриIэр къыгъэшъыпкъэжьыгъ. Непэ къолъхьэ тын-Iыхыным, цIыфымрэ къэралыгъомрэ апэшIуекIорэ бзэджэшIагъэхэм ябэныгъэнымкIэ къулыкъур цыхьэшIэгъу амалэу щыт.«Следовательхэр ары бзэджэшIагъэхэр къыхэгъэщыгъэнхэр, IэубытыпIэхэр къэугъоигъэнхэр, пшъэдэкIыжь ягъэхьыгъэныр зипшъэрылъхэр. Урысыем и Президентэу Владимир Путиным къызэрэхигъэщыгъэмкIэ, «следствием Iоф щызышIэхэрэм цIыфым ифитыныгъэхэмрэ ишъхьафитыныгъэрэ якъэухъумэн, правовой къэралыгъом ыкIи ащ иинститутхэм ягъэпытэн яIахьышхо ахашIыхьэ». Къулыкъоу зыхахьэхэрэм емылъытыгъэу, зэкIэ следовательхэм япшъэрылъхэр зэфэдэх: цIыфым ифитыныгъэхэр къэухъумэгъэнхэр, хэбзэгъэуцугъэу щыIэр укъуагъэ мыхъуныр ыкIи нэмыкIхэр. Мыщ дэжьым хэгъэунэфыкIыгъэн фае республикэм следствиемкIэ иIофышIэхэм япшъэрылъхэр зэрифэшъуашэу зэрагъэцакIэхэрэр, республикэм зыпкъитыныгъэ хэлъэу тапэкIи хэхъоныгъэ ышIыным лъэпсэ пытэ зэрэфэхъухэрэр. Адыгеим зэхъокIыныгъэ инхэр фэхъух, экономикэм, социальнэ лъэныкъом ащызэшIуахырэ Iофтхьабзэхэр нахьыбэ мэхъух – зэкIэми тызэгъусэу тицIыфхэм ящыIакIэ нахьышIу зэрэхъущтым иамалхэм тызэдяусэ ыкIи къызэдэтэгъотых», — къыIуагъ КъумпIыл Мурат.
Республикэм и ЛIышъхьэ къызэрэхигъэхъожьыгъэмкIэ, джырэ лъэхъанэу гумэкIыгъуабэ къызщыкъокIыгъэм Адыгеим ищынэгъончъэн джыри нахь тынаIэ тедгъэтын зэрэфаер къыдгурыIоным мэхьанэшхо иI. Анахь пшъэрылъ шъхьаIэхэм ащыщых бзэджэшIагъэхэр къэтымыгъэхъунхэр, республикэм зыпкъитыныгъэ, рэхьатныгъэ илъынхэм зэкIэми тынаIэ тедгъэтыныр. МыщкIэ анахь мэхьанэ зиIэхэм ащыщых терроризмэмрэ экстремизмэмрэ янэшанэхэр игъом къыхэгъэщыгъэнхэр ыкIи ахэм гъогур афыпыбзыкIыгъэныр.Республикэм и ЛIышъхьэ зэрилъытэрэмкIэ, анахь лъэныкъо шъхьаIэхэм ащыщых бюджетымкIэ бзэджэшIагъэхэр зэрамыхьанхэр ыкIи къыхэгъэщыгъэнхэр, наркотикхэм яIугъэкIын пэшIуекIорэ бэнэныгъэр гъэлъэшыгъэныр. Ащ дакIоу щыIэныгъэм чIыпIэ къин ригъэуцогъэ, социальнэ лъэныкъомкIэ анахь лъэшэу тынаIэ зытетын фэе купхэм ахэхьэх пенсионерхэр, сэкъатныгъэ зиIэхэр, сабыибэ зэрыс унагъохэр, кIэлэцIыкIу ибэхэр.«ХэушъхьафыкIыгъэ ыкIи анахь мэхьанэ зиIэ Iофыгъохэу непэкIэ тиIэхэм ащыщых дзэ операцием хэлажьэхэрэм ыкIи ахэм яунагъохэм яфитыныгъэхэр къэухъумэгъэнхэр. ТидзэкIолIхэм хэгъэгум ифедэхэр блэнагъэ хэлъэу къаухъумэх, яцыхьэ зытелъыжьэу япшъэрылъхэри агъэцакIэх. Хэгъэгум и Президент пшъэрылъ къыгъэуцугъ дзэкIолIхэр правовой лъэныкъомкIэ ухъумэгъэнхэу ыкIи яфедэхэр икъоу къыдэлъытэгъэнхэу. ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм арысхэм ялъэIу тхылъхэм кIыхьэ-лыхьэ зырамыгъэшIэу, амал зэриIэкIэ нахь псынкIэу ахэплъэнхэ фае. Ащ фэд Адыгеим щыпсэурэ цIыфхэм ялъэIу тхылъхэми екIолIакIэу афыряIэн фаер. ЦIыфхэм ялъэIу тхылъ пэпчъ хэплъэнхэшъ, епэсыгъэ зэшIохыкIэ къыфагъотын фае», — къыхигъэщыгъ АР-м и ЛIышъхьэ.
КъумпIыл Мурат агу къыгъэкIыжьыгъ цIыфхэм яIофыгъохэм язэшIохын зэрищыкIагъэм диштэу гъэцэкIэгъэным къэралыгъом цыхьэу къыфашIыщтыри зэрепхыгъэр. Мы IофшIэным, нэмыкI Iофыгъохэу къэуцухэрэм афэдэу, республикэм ихэбзэ къулыкъухэм хэбзэухъумэкIо лъэныкъомкIэ Iоф зышIэхэрэр ягъусэхэу, уахътэм къыгъэуцурэ IофыгъуакIэхэм адэлэжьэнхэр. Ахэм зыкIэ ащыщ IофышIэхэм ягъэхьазырын. ЕджапIэм къыщыублагъэу, кадет классхэр къызфагъэфедэхэзэ, кIэлэеджакIохэм шIэныгъэхэр зэрэзэрагъэгъотыхэрэм имызакъоу, хабзэм ыкIи Хэгъэгум уафэлэжьэн зэрэфаер алъыгъэIэсыгъэн фае. НепэкIэ Адыгеим Следственнэ комитетым икадет классэу зы ныIэп иIэр — къалэу Мыекъуапэ илицееу N 8-м хэтыр. Ау мы илъэсым Iоныгъом и 1-м къыщегъэжьагъэу муниципалитети 6-мэ кадет класси 10-м нахь мымакIэу къащызэIуахыщт.«Следственнэ комитетым ыкIи хэбзэухъумэкIо къулыкъухэм язэдэлэжьэныгъэ тапэкIи нахь пытэ зэрэхъущтым сицыхьэ телъ. Лъытэныгъэ зыфэсшIырэ ныбджэгъухэр! Джыри зэ сышъуфэгушIо шъуисэнэхьат епхыгъэ мэфэкIым фэшI! Урысыем и Следственнэ комитет Адыгэ РеспубликэмкIэ иследственнэ гъэIорышIапIэ ипащэхэми зэкIэ следствием Iоф щызышIэхэрэми шIогъэшхо къэзытырэ IофшIэныр зэрагъэцакIэрэм, япшъэдэкIыжь икъоу зэрэзэхашIыкIырэм апае сызэрафэразэр къэсIонэу сыфай. Анахьэу къыхэзгъэщынхэу сызыфаер следственнэ къулыкъухэм яветеранхэр ары. Шъо къулыкъум лъапсэ зэрэфэшъушIыгъэм имызакъоу, непи ныбжьыкIэхэмкIэ шъущысэтехыпI, къулыкъум ихьынкIэ анахь пшъэрылъ шъхьаIэхэр ахэм алъышъогъэIэсых. ЗэкIэми сышъуфэлъаIо псауныгъэ пытэ, щыIэкIэшIу шъуиIэнэу, гъэхъагъэкIэхэр шъушIынхэу, Адыгеимрэ Урысыемрэ яфедэ зыхэлъ IофшIэнэу мэхьанэшхо зиIэм тапэкIи гъэхъагъэхэр щышъушIынхэу!», — икIэухым къыхигъэщыгъ Адыгеим и ЛIышъхьэ.Ащ нэужым анахь дэгъоу къахэщыгъэхэм къэралыгъо шIухьафтынхэмрэ щытхъу тхылъхэмрэ аратыжьыгъэх. Адыгэ Республикэм и ЛIышъхьэ и Щытхъу тхылъ фагъэшъошагъ УФ-м и Следственнэ комитет АР-мкIэ иследственнэ гъэIорышIапIэ ипащэу Василий Лариным. ЩытхъуцIэу «Адыгэ Республикэм ихэбзэухъумэкIо къулыкъухэм язаслуженнэ IофышI» зыфиIорэр фагъэшъошагъ гъэIорышIапIэм криминалистикэмкIэ иотдел ипащэу Мамый Руслъан. ЩытхъуцIэу «Адыгэ Республикэм изаслуженнэ юрист» зыфиIорэр фагъэшъошагъ УФ-м и Следственнэ комитет Адыгэ РеспубликэмкIэ иследственнэ гъэIорышIапIэ и Джэджэ район къутамэ ипащэу Дмитрий Киселевым.Ащ нэужым депутатхэм ацIэкIэ мэфэкIым пае къафэгушIуагъ АР-м и Къэралыгъо Совет – Хасэм и Тхьаматэу Владимир Нарожнэр. Джащ фэдэу следствием икъулыкъухэм яIофышIэхэмрэ яветеранхэмрэ къафэгушIуагъ УФ-м и Следственнэ комитет АР-мкIэ иследственнэ гъэIорышIапIэ ипащэу Василий Лариныр.Мы Iофтхьабзэм Къэралыгъо Советым — Хасэм, хэбзэухъумэкIо ыкIи нэмыкI къулыкъухэм ящытхъу ыкIи ярэзэныгъэ тхылъхэр къащыфагъэшъошагъэх анахь къахэщыгъэ IофышIэхэм.АР-м и ЛIышъхьэипресс-къулыкъу къытырэкъэбархэмкIэТхьаркъохъо Сафыет.