Цэй З.
«Общественнэ лъыплъакIохэм ыкIи 2026-рэ илъэсым ихэдзынхэмкIэ экспертхэм япшъэрылъхэр» зышъхьэ Iэнэ хъурае Мыекъуапэ щыкIуагъ. Гражданскэ обществэм хэхъоныгъэ ышIынымкIэ ыкIи цIыфхэм яфитыныгъэхэмкIэ Советэу УФ-м и Президент дэжь щызэхэщагъэм хэтэу, Ассоциациеу «Шъхьафит общественнэ лъыплъэным» итхьаматэу Александр Брод ащ хэлэжьагъ.
Хэдзынхэр зэрэкIохэрэр зыуплъэкIурэ ыкIи алъыплъэрэ Общественнэ штаб Адыгэ Республикэм и Общественнэ палатэ ыгъэпсыгъ. Джырэ уахътэм УФ-м и Къэралыгъо Думэ и Федеральнэ зэIукIэ ыкIи АР-м и Къэралыгъо Совет — Хасэм ядепутатыщтхэм яхэдзынхэу Iоныгъо мазэм ащыIэщтхэ общественнэ лъыплъакIохэр ащ щагъэхьазырых.— Хэдзын мафэм чIыпIэ хэдзыпIэ 265-у республикэм щылэжьэщтхэм общественнэ лъыплъэкIо 700 ащыIэщт. ДжырэкIэ ахэр тэгъэхьазырых. Нэбгырэ 200-мэ егъэджэнхэр афызэхэтщэгъахэх. ШышъхьэIу мазэм районхэм ащ фэдэ Iофтхьабзэхэр ащыредгъэкIокIынхэу едгъэжьэщт, — къыIуагъ АР-м и Общественнэ палатэ итхьаматэу Устэ Руслъан.Адыгеим щыпсэурэ нэбгырэ 340305-мэ хэдзынхэм ахэлэжьэнхэ фитыныгъэ яI.— Къэралыгъо Думэм идепутатынымкIэ хэдзынхэм ахэлэжьэщтхэм ягъэнэфэн аухыгъ. Зы мандат зиIэ Адыгэ хэдзыпIэ шъолъырэу N 1 -мкIэ кандидатибл къагъэлъэгъуагъ. Ахэр политическэ партие зэфэшъхьафхэм ялIыкIох. Адыгеим изакъоп, тикъэралыгъо ичIыпIэ зэфэшъхьафхэми хэдзынхэм афэгъэхьыгъэ Iофтхьэбзэ зэмылIэужыгъохэр ащызэхащэх. Уахътэу къэнагъэр макIэ, арышъ, ащ фэгъэзэгъэ къулыкъухэм яIофшIэн агъэлъэшы. ЗэкIэмкIи депутат мандат мин 20 зэблахъущт, — къыIуагъ Александр Брод.Федеральнэм имызакъоу, шъолъыр ыкIи муниципальнэ хэдзынхэр чIыпIэхэм ащыкIощтых. Ащ къыхэкIэуи мы хэдзынхэр зэрэмыпсынкIэщтхэр Ассоциацием итхьаматэ къыхигъэщыгъ. ЦIыфхэм ящынэгъончъагъэ пшъэрылъ шъхьаIэу зэрэщытыри А. Брод къыIуагъ.— ХэушъхьафыкIыгъэ дзэ операциер кIозэ хэдзынхэр зэхэпщэнхэр псынкIэп. Къэралыгъом игъунэпкъэ къодыеп, нахь чыжьэуи, гущыIэм пае, мары Омскэ хэкуми заор нэсы. Щынагъо къэхъумэ, хэдзыпIэ чIыпIэхэм ащылажьэхэрэр зэрэзекIощтхэми фагъэхьазырых.Хэдзынхэр зэрифэшъуашэу тикъэралыгъо щырамыгъэкIокIынхэм пыим иамалхэр зэрэрихьылIэхэрэр, къэбар нэпцIхэр дунэе хъытыум джы щегъэжьагъэу къызэрэрагъахьэхэрэр Александр Брод къыхигъэщыгъ. ЦIыфхэр гупшысэ тэрэзым темыкIынхэмкIэ шъолъырхэм ащызэшIуахырэ Iофхэм зэIукIэм щатегущыIагъэх.Цэй Замир.