Тэу З.
Муниципальнэ гъэпсыкIэ зиIэ къалэу Мыекъуапэ культурэ хэхъоныгъэмкIэ и Гупчэу «Ошъадэм» хэтхэр я 36-рэ Дунэе фольклор хореографическэ фестивалэу мы мафэхэм Тыркуем щыкIорэм хэлажьэх. Къалэу Самсун ар щырекIокIы.
Урысыем (Адыгэ Республикэр, къалэу Омск), Болгарием, Польшэм, Сербием, Мексикэм, Босния-Герцеговинам, Тыркуем, Кипр ятворческэ купхэр мэфэкI зекIом хэтыгъэх.Фестивалым икъызэIухын хэлэжьэгъэ Самсун ипащэ къыIуагъ дунаим тет лъэпкъхэм якультурэ, яфольклорнэ хабзэхэр зэрэзэфэшъхьафхэр къэгъэлъэгъогъэныр Iофтхьабзэм зэрипшъэрылъыр. Ащ цIыфхэр нахь зэгурегъаIох, лъэпкъхэр нахь зэпэблагъэ ешIых, язэфыщытыкIэхэр егъэпытэх.Лъэпкъ культурэмкIэ Гупчэу «Ошъадэм» ипащэу Едыдж Викторие къыхигъэщыгъ лъэпкъыбэ хъурэ Урысыер къызэрагъэлъагъорэр лъэшэу зэрягуапэр. Тыркуем тилъэпкъэгъухэу щыпсэухэрэм яшIуагъэкIэ яунэ исхэм фэдэу «Ошъадэм» хэтхэм къызэращыхъурэр ащ къыкIигъэтхъыгъ. Урысыем щыпсэурэ лъэпкъхэм языкIыныгъэ и Илъэс тикъэралыгъо зыщыхагъэунэфыкIырэм тикуп фэдэ Iофтхьабзэм зэрэхэлажьэрэм имэхьанэ нахь къеIэты.Фестивалым икъызэIухынрэ ащ хэлэжьэрэ купхэм япащэхэм яшIуфэсрэ къалэу Самсун искусствэхэмкIэ и Ордэунэжъ щыкIуагъэх.Чобанлы Искелеси игупчэ мэфэкI концертыр къыщатыгъ, къэшъокIо куп пэпчъ зы номер ащ къыщигъэлъэгъуагъ.Фестивалыр бэдзэогъум и 26-м нэс кIощт, «Ошъадэм» Тыркуем икъэлэ зэфэшъхьафхэм концертхэр къащитыщтых.Тэу Замир.Мыекъуапэ — Самсун.