УФ-м псауныгъэр къэухъумэгъэнымкIэ и Министерствэ 2026-рэ илъэсым иапэрэ мэзихкIэ къэралыгъом щыпсэухэрэм япсауныгъэ зыгъэпытэщт щыIакIэр къызэрэхахырэ шIыкIэр зэфихьысыжьыгъ. Ащ къызэригъэлъэгъуагъэмкIэ, мы лъэныкъомкIэ тиреспубликэ шъолъыр анахь дэгъуищымэ ахэт.
Аужырэ илъэситфыр пштэмэ, республикэм щыпсэоу физкультурэм пылъхэм япчъагъэ процент 13-кIэ хэхъуагъ. Джащ фэдэу спорт чIыпIэхэм ягъэпсыни республикэм щылъагъэкIуатэ.2026-рэ илъэсыр пштэмэ, теннис ыкIи теннис цIыкIум атегъэпсыхьэгъэ чIыпIэхэр къызэIуахыгъэх. Самбэм, есыным алъэныкъокIи чIыпIакIэхэр илъэсым ыкIэм нэс республикэм щашIынхэу рахъухьэ.ДжырэкIэ спорт чIыпIэ 1089-рэ тишъолъыр щэлажьэ. Ахэм азыныкъор республикэм ипсэупIэ зэфэшъхьафхэм адэт. 2018-рэ илъэсым щегъэжьагъэу непэрэ мафэм нэс пштэмэ, зэкIэмкIи псэолъи 186-рэ Адыгеим щагъэуцугъ.
— Мыщ фэдэ IофшIэнхэр дгъэцэкIэнымкIэ къэралыгъо программэу «Урысыем испорт» зыфиIорэр, партиеу «Единэ Россием» илъэпкъ проектхэр тиIэпыIэгъух. Тыфай спортым пылъы зышIоигъохэр зыхэдэн спорт лъэпкъхэр нахьыбэу тиIэнхэу, ащ фытегъэпсыхьэгъэ чIыпIэхэми ащымыкIэнхэу. Мары республикэ стадионым щагъэкIэжьыгъэх теннисым тегъэпсыхьэгъэ чIыпIэхэр. Теннис цIыкIумкIэ Урысыем и Федерацие тигъусэу кIэлэцIыкIухэми нахьыжъхэми апае шъолъыр гупчэ тшIыгъэ. Ащ фэдэ псэуалъэ Тэхъутэмыкъое районми щыдгъэпсын пшъэрылъ тиI, — къыIуагъ Адыгэ Республикэм и ЛIышъхьэу, «Единэ Россием» ишъолъыр къутамэ и Секретарэу КъумпIыл Мурат.Мыщ фэдэ екIолIакIэхэм шIуагъэ къатэу республикэ пащэхэм алъытэ. Спортым нахь хэщагъэ хъухэрэм аужырэ илъэсхэм зэхапшIэу ахэхъуагъ. Мы лъэныкъомкIэ Iофэу агъэцакIэрэми къыщагъэкIэщтэп. ДжырэкIэ спорт чIыпIищ республикэм щашIы. Ахэм ащыщ АдыгеякIэм щагъэпсырэ бассейныр. СамбэмкIэ зыгъэхьазырынхэр зыщашIыщт гупчэ Мыекъуапэ щашIы. Спорт площадкэ «Iуш» зыфиIорэм фэдэу 4 чIыпIэ зэфэшъхьафхэм ащагъэпсыщтых. Атлетикэ онтэгъумкIэ еджапIэр, республикэ спорт еджапIэу N 3-р зыщылэжьэхэрэ унэхэм игъэкIотыгъэ гъэцэкIэжьынхэр къяжэх.