ШъэуапцIэкъо зэшхэр хэгъэгум фэшъыпкъэх

Адыгэ Республикэм ит къуаджэу Тэхъутэмыкъуае щыпсэухэрэ ШъэуапцIэкъо зэшъхьэгъусэхэу Адамрэ Нэфсэтрэ якIэлищ а зы сэнэхьатыр къыхахыщтмэ, къэралыгъом ищынэгъончъагъэ фэлэжьэщтхэмэ ныбжьи ашIэныеп. Унагъом ышъхьэ сэнаущыгъэ хэушъхьафыкIыгъэ хэлъыгъ, ар ежь-ежьырэу зызыгъэсэгъэ автомеханикыгъ, Тхьэм ащ къыфигъэхъугъэу цIыфмэ алъытэщтыгъ: автомобильхэр ыгъэцэкIэжьыщтыгъэх, а IофымкIэ икIалэхэр иIэпыIэгъугъэх, къоджэдэсмэ лъытэныгъэ къызфаригъэшIыгъагъ.

КIалэхэр еджапIэм щеджэщтыгъэх, спортым пылъыгъэх, урым-рим бэнакIэмкIэ тренерэу Зэрамыку Руслъан фигъа­сэщтыгъэх. Бысымгуащэм ищыIэныгъэ сатыум фигъэхьыгъ. Ны-тымэ пшъэры­лъэу зыфагъэуцужьыгъагъэр якIэлищи апшъэрэ гъэсэныгъэ арагъэгъотыныр арыгъэ. Джащ пае зыгъэпсэфыгъо ­уахътэ ямыIэу ахэр лэжьагъэх.Яшъаохэри щыIэныгъэ гъогоу зэрыкIощтхэм хадэхэу аублагъ.ЯкIалэу Мурат, зэрэкIэхъопсыщты­гъэу, юрист сэнэхьатыр зэригъэгъотыгъ. ­2000-рэ илъэсым Ростовскэ юридическэ институтыр къыухыгъ ыкIи Урысыем и МВД иследственнэ къулыкъухэм ахэ­хьагъ.

Мурат Адамэ ыкъом Тэхъутэмыкъое районым и ОВД инспекторэу IофшIэныр щыригъэжьагъ, нэужым Мыекъуапэ и УВД хэхьэрэ Следственнэ ГъэIорышIапIэм старшэ следователэу Iоф щишIэнэу рагъэблагъэ. Ащ зы уахътэрэ зыщылажьэрэм ыуж Адыгэ Республикэм и Следственнэ ГъэIорышIапIэ ащэжьы.Илъэс 20-м ехъурэ Мыекъуапэ ыкIи Адыгэ Республикэм яследственнэ къулыкъухэм ахэтыгъэу Тэхъутэмыкъое районым щыIэ следственнэ отделым ипащэу агъэнафэ. Муратэ мы сэнэхьатыр къызыхехым ышIэщтыгъ зыгъэпсэфыгъо мафэу къыфыхэфэщтыр зэрэмэкIэ дэдэр, нэужым иIофшIэнкIэ ар къэ­нэфэжьыгъ, арэу щытми, Iофым фэшъыпкъэныр пстэуми апэ регъэшъы. Джащ тетэу, зыгъэпсэфыгъо имыIэу, тыдэкIи зыщытегущыIэщтыгъэхэ Iофыр 2020-рэ илъэсым кIэухым нигъэсын ылъэкIыгъ. А хъугъэ-шIагъэм ежь ышъхьэ­кIэ АР-м и ЛIышъхьэу КъумпIыл Мурат лъыплъэщтыгъ. Уголовнэ Iофыр къызфызэIуахыгъэ тымрэ ипшъашъэрэ гъэпцIэгъэ зекIокIэ 400 фэдиз зэрахьагъэу агъэунэфыгъагъ. Фэтэрыбэу зэтет унэр Тэхъутэмыкъое районым ахэм щашIы зэхъум, фэтэрхэр аращэхэрэм фэдэу цIыфхэр агъапцIэхэзэ, нэбгырэ 400-мэ сомэ миллион 430-рэ хэбзэн­чъэу къаIахыгъагъ. Мысагъэ зыфалъэгъурэмэ япсэуалъэхэу Урысыем ыкIи Зэхэт Араб Эмиратхэм арытхэм, ауасэ сомэ миллиард 1,4-кIэ къалъытэщтыгъ, арест атыралъхьэгъагъ, охътэ кIэкIым къыкIоцI нэбгырэ 600-мэ упчIэхэр афагъэуцугъэх, къэбарыр къарагъэIотагъ. Уголовнэ Iофыр хьыкумым щызэхафыгъ, бзэджашIэмэ пшъэдэкIыжь арагъэ­хьыгъ.

Мы илъэсым Муратэрэ ащ ишъхьэгъусэу Рим­мэрэ IэпэIэсэныгъэ зы­хэлъ адвокат, тыжьын джэгур хагъэунэфыкIы. ГъэшIэгъоныр, ежьхэм ашIэрэ Iофым ифэмэ-бжьымэ ялъфыгъитIуи атехьагъ: япшъашъэу Сусаннэ Адыгэ къэралыгъо университетым июри­дическэ факультет къыухыгъ. Джырэ уахътэм Мыекъопэ къэ­лэ хьыкумым ихьыкум зэхэсыгъо исекретарэу мэлажьэ. Самирэ – а факультет дэдэм иящэнэрэ курс щеджэ. Мыекъуапэ и МФЦ специалист пэрытэу Iоф щешIэ. Яшъэожъыеу Руслъан Мыекъуапэ дэт лицееу N 35-м икIэлэеджакIу.Илъэс 29-рэ къулыкъу зехьым, Муратэ Адам ыкъом гъэхъагъэ­хэр ышIыгъэх, бгъэхалъхьэхэр къылэжьыгъэх, ахэм ащыщых а 1-рэ, я 2-рэ ыкIи я 3-рэ шъуа­шэхэр зиIэ медалэу «Дэгъу дэдэу къулыкъу зэрихьырэм фэшI», медалэу «За доблесть в службе» зыфиIохэрэр, нэмыкIхэри.2000-рэ илъэсхэм ШъэуапцIэкъо Адам Аслъанбый ыкъом иныбджэгъу горэм Брянскэ МВД-м къулыкъу щихьыщтыгъ. А ныбджэгъур ары Адам зыгъэдэIуа­гъэр икIалэу Азамат Брянскэ ыгъэкIонэу. Тэхъутэмыкъое гурыт еджапIэр къызеухым ыуж ушэтынхэр ытыхи, Брянскэ милицием иеджапIэу дэтым Азамат чIэхьагъ. Ащ къыщыублагъэу хабзэр амыукъоным лъыплъэрэ къулыкъухэм кIалэр ахэхьагъэу хъугъэ. Iофыр лъэшэу ыгу ри­хьыгъ, зэкIэлъыкIохэу къыхихыгъэ сэнэхьатымкIэ Азамат Адам ыкъом апшъэрэ еджапIэхэр къыухыгъэх: Урысыем и МВД июридическэ институт и Брянскэ къутамэ, УФ-м и МВД хэхьэрэ Московскэ университетым икъу­тамэ ыкIи УФ-м и МВД и Орловскэ юридическэ институт.2007-рэ илъэсым къыщегъэжьагъэу джырэ уахътэм нэс Урысые Федера­цием ипрокуратурэ и Следственнэ Комитет иследственнэ гъэIорышIапIэу Брянскэ хэкум щыIэм и Клинцовскэ район следственнэ отделым иследователэу Iоф щешIэ. Азамат ыныбжь илъэс 42-рэ зыщыхъурэм ехъулIэу полковник званиер къыратыгъ.

Апэрэ мафэхэм къащыублагъэу ­Азамат иIофшIэн зэпхыгъагъэр укIыгъэ Iоф зыхэлъхэр, тын-Iыхыным епхыгъэ хъугъэ-шIагъэхэр зэхифынхэр ары. Зэфагъэ зэрэхэлъым, иIоф зэрэфэшъыпкъэм къахэкIэу иIофшIэгъухэм яшъхьэ­кIэфэныгъэ къылэжьыгъ.Анахь Iоф хьылъэу ыкIи зэлъашIа­гъэу зэхифыгъэхэм ащыщыгъ 2016-рэ илъэсым мэзибгъу нахь зымыныбжьыгъэ пшъэшъэжъыеу аукIыгъэм фэгъэхьыгъа­гъэр. А тхьамыкIагъом Брянскэ ыкIи зэрэхэгъэгоу агучIэ рихыгъагъ, Iофыр зэрэлъыкIуатэрэм лъыплъэщтыгъэх. Мары ар зэрэхъугъагъэр: пшъэшъэ­жъыем ятэ ешъуагъэу унэм къызехьажьым, ишъузрэ арырэ зэщыхьагъэх. Сабыир пIэм хэлъэу гъыщтыгъэ, тым ар къышти, дэпкъым риутэкIыгъ. Ным пшъэшъэжъы­ер ыпхъуати, зыгъэпскIыпIэм ыхьыгъ. Ау ар зэрэщымыIэжьыр къэзышIэгъэ тым апэ сабыеу ыукIыгъэр балконым рихыгъ, ащ ыуж хьадэр цIыф зыдэщымыIэ чIыпIэм ыщи, щигъэстыжьыгъ. ПшъэдэкIыжьым зыщагъэзыеным пае зэлI-зэшъузхэм япшъашъэ атыгъугъэу аIуагъ, следствиер лъэуж пхэндж рагъэ­кIоным пылъыгъэх. БзэджэшIагъэр зыщызэрахьэгъэ мафэм къыщыублагъэу лъыхъокIо-оперативнэ купым ШъэуапцIэкъо Азамат пащэу иIагъ, ащ МВД-м, ФСБ-м ягъэIорышIапIэхэм, УФСИН-м, Урысыем и СК-у Брянскэ хэкум щыIэм якъулыкъушIэ 500-м ехъу хахьэщтыгъ. Полицейскэхэмрэ гуфэкIо минхэмрэ чэщи мафи ямыIэу тхьамафитIум сабыим лъыхъугъэх. Следствиер кIозэ, ны-тымэ пцIы къызэраусыгъэр агъэунэ­фыгъ. УкIакIомэ пшъэдэкIыжьэу атефэрэр арагъэхьыгъ, ау аукIыгъэ пшъэшъэжъы­ем къебгъэгъэзэжьын плъэкIыщтэп.Ащ ыуж Азамат хъугъэ-шIэгъэ тхьамыкIагъом къымытIупщэу охътабэрэ хэтыгъ. Ау щыIэныгъэр лъэкIуатэ.Анахь Iоф хьылъэхэм язэхэфынкIэ отделым урипэщэныр псынкIагъоп, пшъэ­дэкIыжьышхо пылъ, IэпэIэсэныгъэ ин зэрэхэлъым, сыд фэдэрэ Iофи ишъыпкъэ зэрэрихьылIэрэм яшIуагъэкIэ Азамат ар фызэшIокIы. Бгъэхалъхьэу къыфагъэшъо­шагъэхэми ар къаушыхьаты. «Гъэхъагъэхэр зэришIыгъэхэм апае», «Дэгъу дэдэу къулыкъу зэрихьырэм фэшI» зыфиIорэ медалым иапэрэ, иятIонэрэ ыкIи иящэнэрэ шъуашэ зиIэхэр, джащ фэдэу медалэу «Доблесть и отвага» зыцIэр къыфагъэшъошагъэх.2025-рэ илъэсым ичъэпыогъу мазэ ШъэуапцIэкъо Азамат къэралыгъо щынэгъончъэным, хабзэр амыукъоным иIахьышхо зэрахилъхьагъэр къыдалъыти, орденэу «Хэгъэгум ыпашъхьэкIэ гъэхъа­гъэу щыриIэхэм апае» зыфиIорэм имедалэу я II-рэ шъуашэ зиIэр къыфагъэшъошагъ.Илъэс 17-кIэ узэкIэIэбэжьмэ, Азамат шъхьэгъусэ фэхъугъэ Рабиетрэ ежьыррэ якIалэхэу Тимуррэ Бэллэрэ зэдапIу, ахэр Брянскэ дэт гимназиеу «Снежнэм» щеджэх.Зыгъэпсэфыгъо уахътэ къызэрэхагъэ­кIэу Азаматрэ Рабиетрэ якIалэхэр ягъусэхэу якъоджэ гупсэ къэкIох. Ежь иIофшIэн фэгъэхьыгъэу Азамат Адам ыкъом бэп къыIорэр: «Шъыпкъэр пIощт­мэ, сызхэтыр Iоф псынкIэп, ау сэ сшIэщтыгъэ сыздакIорэри, пшъэрылъэу сиIэри, сиамал къызэрихьэу ар зэрэзгъэцэкIэщтым сыпылъ».Зэшымэ анахьыкIэу Рэщыди нахьы­жъ­мэ ягъогу рэкIо. АКъУ-м июридическэ факультет къыухыгъ. Ар бзэджэшIагъэ­хэм ябэныгъэнымкIэ МВД-м иотделэу АР-м щыIэм ипащэ игуадзэу мэлажьэ, полицием имайор. Илъэс 13 хъугъэ Iоф зишIэрэр.Рэщыдэ дэгъоу къулыкъу зэрихьырэр мызэу, мытIоу щытхъу тхылъхэмкIэ ыкIи медальхэмкIэ къыхагъэщыгъ.БэмышIэу ащ къыщагъ. Рузаннэ Адам ыпхъур шъхьэгъусэ фэхъугъ.Зэшымэ зэралъытэрэмкIэ, непэ лъэгапIэу зынэсыгъэхэр зишIушIагъэхэр ны-тыхэмрэ зыщеджэгъэхэ еджапIэмрэ.ГухэкIыр Адам игъонэмысэу идунай зэрихъожьыгъэр ары, икIалэмэ гъэхъагъэу ашIыгъэхэр, тэхъутэмыкъуаехэр, Адыгеир ыкIи зэрэхэгъэгоу зэрарыгушхохэрэр къылъэгъужьыгъэп.Тэхъутэмыкъуаехэр якIалэхэу Хэгъэгум фэшъыпкъэхэу къулыкъу фэзыхьырэмэ арэгушхох ыкIи УФ-м следствиемкIэ икъулыкъухэм яIофышIэ и МафэкIэ афэгушIох!Iофэу шъузпылъым ренэу гухахъо хэжъугъуатэу, шъуигъэхъагъэхэм ахэжъу­гъахъоу шъущыIэнхэу тышъуфэлъаIо!Тицыхьэ телъ, шъуяти шъузнэсыгъэ лъэгапIэхэр елъэгъух, шъощ пае мэ­гушхо.Мурат, Азамат ыкIи Рэщыд, шъуигу­хэлъхэр Тхьэм къыжъудегъэхъух, шъори, шъуигупсэхэми шъупсаухэу, шъутхъэжьхэу шъущегъаIэх!АкIэгъуРазиет.