Iэшъынэ А.
ЦIыф зэрымыс быбырэ пкъыгъохэм (БПЛА) ядзэхэм ягъэпсын икIыгъэ илъэсым ыкIэхэм ыкIи ахэр зыгъэIорышIэщт операторхэм яугъоин 2026-рэ илъэсым ищылэ мазэ аублагъ. Адыгэ Республикэми ащ епхыгъэ IофшIэныр щылъэкIуатэ, анахьэу фэгъэзагъэр дзэ комиссариатхэр ары. Ахэм ямызакъоу, муниципальнэ образованиехэм, гъэсэныгъэм иучреждениехэм ялIыкIохэри хэлажьэх.
ХэушъхьафыкIыгъэ дзэ операциер зыщыкIорэ лъэхъаным къыщынэфагъэхэм ащыщ зэонымкIэ шIыкIэ-амалэу щыIэхэр зэрэзэхъокIыгъэхэр. Пыим нахьыбэу ыгъэфедэрэр авиациер ары, жьым хэт зэпэуцужь ригъэкIокIырэр. Ащ епхыгъэу джы подразделениякIэм игъэпсын фежьагъэх. Джырэ дзэм мыр анахь ищыкIэгъэ сэнэхьатхэм ащыщ, ахэр ары дронхэр зыгъэIорышIэхэрэр, дзэ IофымкIэ пшъэрылъ шъхьаIэхэр зэшIозыхыхэрэр.Шъугу къэдгъэкIыжьын, Хэгъэгур къэухъумэгъэнымкIэ амалыкIэу щыIэм ишапхъэхэр, фэгъэкIотэнхэу, ахъщэ тынхэу пылъхэр зэхъокIыгъэхэп. ЦIыф зэрымыс быбырэ авиацием зэзэгъыныгъэ шIыкIэм тетэу къулыкъу щызыхьыщтхэм Iашэ амыIыгъэу, окопхэм адэмысхэу пыим ебэныщтых, ятIонэрэ, ящэнэрэ линием тетхэу япшъэрылъхэр агъэцэкIэщтых. Зэтыгъо ахъщэ тынэу Адыгеим щаратырэр сомэ миллионищ. ДзэкъулыкъушIэхэм яIэ фэгъэкIотэнхэр зэкIэ къафэнэщтых.ПодразделениякIэу агъэпсырэм операторхэм ямызакъоу, водительхэр, техникхэр, инженерхэр ыкIи нэмыкI сэнэхьатхэр зиIэхэр аштэх. БПЛА-м иоператор ухъуным шэпхъэ гъэнэфагъэхэр пылъых. Илъэс 18-м къыщегъэжьагъэу 35-м нэс аныбжьын, «базовэ» шапхъэм диштэу инджылызыбзэр, компьютерыр ашIэнхэ фае. НэмыкI сэнэхьатхэмкIэ къулыкъур зыхьыщтхэм аныбжь илъэс 45-м шIокIынэу щытэп. Джащ фэдэу зэкIэми япсауныгъэ медицинэ комиссием ыуплъэкIущт, купэу «А-м» ыкIи «Б-м» адиштэнхэу щыт.КъэIогъэн фае, хэушъхьафыкIыгъэ дзэ операцием административнэ ыкIи уголовнэ пшъэдэкIыжь зыхьыгъэхэр ащэхэмэ, мы подразделением ахэр щегъэзыех, анахь дэгъухэр ары къыхахыхэрэр.Джащ фэдэу ыныбжьыкIэ къулыкъур зыхьынэу къызтефэхэрэр цIыф зэрымыс быбырэ пкъыгъохэм ядзэхэм ахэхьанхэу зэзэгъыныгъэм зыкIатхэхэкIэ, а къулыкъур мыщ пэIохьэ ыкIи ахъщэ тынхэр зэкIэ къаратых, «зэо зэпэуцужьым иветеран» зыфиIорэ цIэр къафагъэшъошэщт.Анахь хэхыгъэхэм ахалъытэрэ подразделениякIэм диштэхэрэр ныбжьыкIэхэр ары. Ащ епхыгъэу Мыекъопэ къэралыгъо технологическэ университетым щеджэхэу зэзэгъыныгъэм кIэтхэщтхэм апае хэушъхьафыкIыгъэ фэгъэкIотэнхэр афагъэнэфагъэх. Апшъэрэ еджапIэм ипресс-къулыкъу къызэритыгъэмкIэ, федеральнэ, шъолъыр ыкIи муниципальнэ ахъщэ тынхэр, фэгъэкIотэнхэм адакIоу, студентыр илъэс пIалъэм къэтыфэ колледжым е университетым ячIыпIэ къыфэнэщт. Зэнэкъокъум хэмытэу бюджет чIыпIэхэр къыратыщт. ЫпкIэ ытызэ еджэу щытмэ, бюджет шIыкIэм тырагъэхьажьыщт. Зэтыгъо ахъщэ IэпыIэгъоу сомэ мини 100 фатIупщыщт. ХэушъхьафыкIыгъэ е социальнэ стипендие къыратыщт. Студентым еджэныр къеухыфэ общежитием чIыпIэ щыриIэщт. ЧIэхьагъу ушэтынхэр пэIудзыгъэ шIыкIэм тетэу рагъэтыщтых (медицинэ сэнэхьатхэм анэмыкIырэр).— КъежьэгъэкIэ сэнэхьатыр ныбжьыкIэхэм аIэ къырагъэхьанымкIэ ыкIи къэралыгъом иIэпыIэгъу къаIукIэнымкIэ мыр амалышIу, — хигъэунэфыкIыгъ Мыекъопэ къэралыгъо технологическэ университетым иректорэу Къуижъ Саидэ.Зэзэгъыныгъэ шIыкIэм тетэу къулыкъур зыхьынэу фаеу Мыекъуапэ щыпсэухэрэм дзэ комиссариатэу ащ дэтым зыщарагъэтхышъущт. УпчIэ зиIэхэм зыздагъэзэшъущтыр: къ. Мыекъуапэ, ур. Комсомольскэр, 217-рэ, я 119, 102-рэ кабинетхэр е телефонхэу: 8 (8772) 52-11-27, 52-11-25. Зэзэгъыныгъэ шIыкIэкIэ къулыкъу зыхьы зышIоигъохэм апае линие плъырыр: 117#4 ыкIи 8 (8772) 52-11-28.Джащ фэдэу шъузщыпсэурэ чIыпIэм щыIэ дзэ комиссариатым зыфэжъугъазэмэ, шъуищыкIагъэр ежъугъотылIэщт. Телеграм-каналэу «Адыгея — Служу Родине» зыфиIорэм игъэкIотыгъэ къэбарыр ижъугъотэщт.IЭШЪЫНЭ Сусан.