Урысые физкультурэ-спорт фестивалэу «IофшIэным ыкIи зыкъэухъумэжьыным сафэхьазыр» зыфиIорэм ишъолъыр едзыгъо хэлэжьагъэхэм шIухьафтынхэр спортымкIэ республикэ Комитетым аритыжьыгъэх.
Фестивалым зыщаушэтыгъ къалэу Мыекъуапэ, Джэджэ, Красногвардейскэ, Мыекъопэ, Тэхъутэмыкъое ыкIи Теуцожь районхэм якомандэхэм. ЗэкIэмкIи кIэлэ нэбгырэ 28-рэ ыкIи пшъэшъэжъые 24-рэ хэлэжьагъэр. АныбжьхэмкIэ ахэр купитIоу гощыгъагъэх.Зы командэм спортсмени 8 хэтыгъэр: 4-р — кIалэ, адрэхэр — пшъашъэх. Хэлэжьагъэхэм ГТО-м илъэныкъуихкIэ зыкъагъэлъэгъуагъ: къэчъэныр (метрэ 60, 1500-рэ ыкIи метрэ 2000), гъучIым пыгъэнагъэу ыкIи щылъэу пкъы Iэтынхэр, лъапэм унэсэу ыпэкIэ зыууфэныр, есыныр (метрэ 50) ыкIи щэрыоныр.Зэкъо зыкъэгъэлъэгъонымкIэ, илъэс 12 — 13 зыныбжьхэмкIэ, анахь лъэшэу къычIэкIыгъ Теуцожь районым щыщ СтIашъу Ислъам. Пчъэгъэ 421-рэ ащ къылэжьыгъ. Тыжьыныр Мыекъуапэ икуп хэт Глеб Халаимовым (411-рэ) къыхьыгъ, джэрзыри къалэм илIыкIоу Тимур Сосновскэм (386-рэ) фагъэшъошагъ. Мы ныбжь дэдэм ит пшъэшъэжъыехэмкIэ Мыекъуапэ къэзыгъэлъэгъогъэ София Оно пчъэгъэ 394-рэ иIэу дышъэр къыхьыгъ. Тыжьынри республикэм икъэлэ шъхьаIэ илIыкIоу Валерия Тищенкэм (383-рэ) фагъэшъошагъ. Ящэнэрэ чIыпIэр ыхьыгъ Мыекъопэ районым къикIыгъэ Диана Шушпановам (353-рэ).Илъэс 14 — 15 зыныбжьхэмкIэ къэгъэлъэгъон анахь дэгъу зиIэр Мыекъопэ районым щыщ Даниил Труновыр ары. Пчъэгъэ 379-рэ ащ ригъэкъугъ. ЯтIонэрэ ыкIи ящэнэрэ чIыпIэхэр ахьыгъэх Мыекъуапэ илIыкIохэу Даниил Сосновскэмрэ (346-рэ) Денис Голиковымрэ (310-рэ). ПшъашъэхэмкIэ анахь лъэш хъугъэр Джэджэ районым къикIыгъэ Мария Лысенкэр ары (403-рэ). Красногвардейскэ районым щыщ Полина Мотинам тыжьыныр къылэжьыгъ. Джэрзыр фагъэшъошагъ Мыекъуапэ илIыкIоу София Ершовам (330-рэ). ХагъэунэфыкIырэ чIыпIэхэр къэзыхьыгъэхэр зэкIэ зэнэкъокъум и Урысые едзыгъо хэлэжьэщтых. Зэнэкъокъур Республикэу Къырым ит лагерэу «Артекым» бжыхьэм щыкIощт.Команднэ зэфэхьысыжьхэри ашIыгъэх. ЯтIонэрэ илъэс хъугъэу Мыекъуапэ апэрэ чIыпIэр къыдехы. ЯтIонэрэр ыхьыгъ Джэджэ районым. Ящэнэрэ хъугъэ Мыекъопэ районым икомандэ.