Футболыр зикIасэхэм къагъэпсыгъэ командэхэр зыхэлэжьэрэ республикэ зэнэкъокъур мы тхьамафэм аублагъ.
ЗэкIэмкIи куп 16 ащ хэлажьэрэр. Адыгеим икъэлэ шъхьаIэ нэмыкIэу районхэми къарыкIыгъэ командэхэр зэнэкъокъум щызэIокIэх. Зы ешIэгъур едзыгъуитIоу такъикъ 25-рэ зырызэу макIо. ПчъагъэмкIэ зэфэдэ кIэух зыфэхъурэм, пенальтикIэ нахь лъэшыр агъэнафэ.Апэрэ зэIукIэгъухэр мы мафэхэм щыIэгъахэх. «Кавказ-Адэмыер» «Ошъутенэм» IукIагъ. Красногвардейскэ районым къикIыгъэхэм 4:0-у ешIэгъур ахьыгъ. Iэгуаор къэлапчъэм дагъэфагъэх Датхъужъ Адам, Артем Мельник (Iэгоуи 2) ыкIи Александр Красновым.ЗэIукIэгъу гъэшIэгъон хъугъэр «Факелымрэ» «Аргомрэ» язэпэуцужь. ЯтIонэрэр командэ ныбжьыкI, апэрэу мыщ фэдэ зэнэкъокъум хэлажьэ. Арэу щытми, дэгъоу джэгугъэ. Илъыгъохэр ышIыщтыгъэх, Iэгуаор къэлапчъэм дигъэфэн зыщилъэкIыщт чIыпIи бэрэ ифагъ. Ау пчъагъэр къызэIузыхыгъэр «Факелыр» ары. ЗэIукIэгъур аухынкIэ нэгъэупIэпIэгъу заулэ къэнагъэу «Аргом» пчъагъэр 1:1 ышIыжьыгъ. Нэужым пенальтикIэ нахь лъэшыр агъэнэфагъ. «Аргом» текIоныгъэр ыхьыгъ.Ящэнэрэ ешIэгъоу мы мафэм щыIагъэр «Ансарым» 3:0-у ыхьыгъ. ЗыIукIагъэр «Хьатыгъужъыкъуаехэр» ары. IэгоуитIур Хъунэго Тамерлан икомандэ къыфихьыгъ, ящэнэрэр Бэгъушъэ Джамболэт къэлапчъэм дигъэфагъ.Зэнэкъокъур лъагъэкIуатэ. ЗэIукIэгъу пэпчъ зэнкIэ зэпхыныгъэм тетэу дунэе хъытыумкIэ къагъэлъагъо.