А. Гусев
Тыгъуасэ Адыгэ Республикэм и ЛIышъхьэу КъумпIыл Мурат общественнэ ыкIи хэушъхьафыкIыгъэ техникэу республикэм къыщэфыгъэхэм яIункIыбзэхэр аритыжьыгъэх ахэр зыфытегъэпсыхьагъэхэм. ЦIыфхэм язещэнрэ ящынэгъончъэнрэ ахэр афэлэжьэщтых.
Къалэу Мыекъуапэ иобщественнэ транспорт автобуси 9 къыхэхъуагъ. Лъэпкъ проектэу «ЩыIэныгъэм пае инфраструктурэр» зыфиIорэм къыдыхэлъытагъэу ахэр къащэфыгъэх. Бюджет зэфэшъхьафхэм къахагъэкIыгъэ сомэ миллион 97,2-рэ ахэм апэIуагъэхьагъ.IункIыбзэхэр ятыжьыгъэным епхыгъэ Iофтхьабзэм хэлэжьагъэх АР-м иминистрэхэм я Кабинет и Тхьаматэ игуадзэу Хъоткъо Хъызыр, псэолъэшIынымкIэ Министерствэм ипащэ иапэрэ гуадзэу Лафышъэ Рэмэзан, Мыекъуапэ имэрэу Геннадий Митрофановыр, Мыекъопэ троллейбус гъэIорышIапIэм ипащэу Хьао Анзор.
Адыгеим и ЛIышъхьэ хэгъэгум къыщашIыгъэ автобусыкIэхэр къыплъыхьагъэх. Мыекъопэ троллейбус гъэIорышIапIэм нэбгырэ 54-рэ зэрыфэщт, гурыт классым къыхиубытэрэ автобуси 9 ратыгъ. ЗэкIэ автобусхэр ищыкIэгъэ Iэмэ-псымэхэмкIэ зэтегъэпсыхьагъэх: видеолъыплъэнымкIэ камерэхэр, гъогупкIэм итынкIэ терминалхэр, гъэучъыIалъэхэр ахэтых.2026-рэ илъэсым иящэнэрэ мэзищ Мыекъуапэ иурамхэм автобусыкIэхэр къатырагъэхьанхэу рахъухьэ. Троллейбусхэу N 2-р, 6-р, 10-р зэрыкIорэ гъогухэм ахэр атетыщтых, тырагъэкIыжьыгъэгъэ маршрутэу N 17-ми иIофшIэн зыпкъ игъэуцожьыгъэным иамали хэплъэх.
Адыгеим и ЛIышъхьэ къызэрэхигъэщыгъэмкIэ, республикэм общественнэ транспортым игъэкIэжьын чэзыу-чэзыоу щэкIо. ЫпэкIэ автобусыкIэ 60 республикэм къыIэкIэхьэгъагъ, цIыфхэр цыхьэшIэгъоу ыкIи игъом зещэгъэнхэм иамал ащ къытыгъ. Федеральнэ гупчэм лъэIу тхылъэу агъэхьыгъэм лъэпкъ проектэу «ЩыIэныгъэм пае инфраструктурэр» зыфиIорэм къыдыхэлъытагъэу джыри автобусыкIэ 15 къызIэкIэдгъэхьаным фытегъэпсыхьэгъэ субсидие къытатынэу къыделъытэ.
«ЦIыфхэр зезыщэщт автобусхэу тиIэхэм къызэрахэхъуагъэр общественнэ транспортым иавтопарк гъэкIэжьыгъэнымкIэ, джырэ уахътэм диштэрэ щынэгъончъэ ыкIи Iэрыфэгъу къэлэ щыIакIэр гъэпсыгъэнымкIэ Iофышхоу зэшIотхырэм изы Iахь. Лъэпкъ проектэу «ЩыIэныгъэм пае инфраструктурэр» зыфиIорэм ишIуагъэкIэ а IофшIэныр лъыдгъэкIотэщт», — къыIуагъ КъумпIыл Мурат.АР-м и ЛIышъхьэ мыщ ыпэкIэ къулыкъу зэфэшъхьафхэм ыкIи муниципалитетхэм пшъэрылъ афишIыгъагъ цIыфхэр зезыщэрэ транспортым иIофшIэн нахь агъэлъэшынэу, анахьэу етIани гъэстыныпхъэм ылъэныкъокIэ непэ Iофхэм язытет зыфэдэ хъугъэр къыдалъытэнэу ыкIи расписанием дэмыххэу автобусхэр зекIонхэм анаIэ тырагъэтынэу. Джащ фэдэу пшъэрылъ афишIыгъ цIыфхэм ялъэIу тхылъхэм лъэшэу анаIэ атырагъэтынэу, транспортым епхыгъэ Iофыгъохэр зэкIэ псынкIэу зэшIуахыхэзэ ашIынэу. ЦIыфхэм ящыIакIэ нахьышIу шIыгъэным, къэлэ щыIакIэмрэ транспорт инфраструктурэмрэ хэхъоныгъэ ягъэшIыгъэным афытегъэпсыхьэгъэ Iофтхьабзэхэр пхырыщыгъэнхэмкIэ хэушъхьафыкIыгъэ пшъэрылъхэри къыгъэуцугъэх.
Джащ фэдэу КъумпIыл Мурат АР-м цIыфхэм якъэухъумэнкIэ, ошIэ-дэмышIагъэ зыхэлъ тхьамыкIагъохэр щыгъэзыегъэнхэмкIэ ыкIи машIом зыкъымыштэнымкIэ и Гупчэ иIофышIэхэм хэушъхьафыкIыгъэ техникакIэм иIункIыбзэхэр аритыжьыгъ. КъэгъэнэжьакIохэм джы къызфагъэфедэн алъэкIыщт мэшIогъэкIосэнымкIэ ыкIи цIыфхэм якъэгъэнэжьынкIэ къашъхьэпэщт машини 7-р.Мы Iофтхьабзэм хэлэжьагъэх Урысыем ошIэ-дэмышIэ IофхэмкIэ и Министерствэ и ГъэIорышIапIэу АР-м щыIэм ипащэу Станислав Илющенкэр, АР-м цIыфхэм якъэухъумэнкIэ ыкIи ошIэ-дэмышIагъэ зыхэлъ тхьамыкIагъохэм ядэгъэзыжьынкIэ и Комитет итхьаматэу Андрей Колесник.МашинакIэхэм яIункIыбзэхэр заретыжьхэ нэужым АР-м и ЛIышъхьэ гущыIэгъу афэхъугъ Гупчэм иIофышIэхэм ыкIи къыхигъэщыгъ ошIэ-дэмышIагъэ зыхэлъ тхьамыкIагъохэр къэхъухэмэ къызфагъэфедэн алъэкIыщт мылъку-техникэ базэу яIэр гъэпытэгъэным мэхьанэшхо зэриIэр. Ащ пае федеральнэ ыкIи шъолъыр къулыкъухэр гъусэныгъэ пытэ зэдыряIэу республикэм щэлажьэх, Урысыем ошIэ-дэмышIэ IофхэмкIэ и Министерствэ и ГъэIорышIапIэу Адыгеим щыIэм, джащ фэдэу ошIэ-дэмышIэ IофхэмкIэ республикэ Комитетым мылъку лъэныкъомкIэ язэтегъэпсыхьан фэгъэхьыгъэ IофшIэн гъэнэфагъи зэшIохыгъэ мэхъу.«Урысыем и Президентэу Владимир Путиным къыгъэуцугъэ пшъэрылъхэм анахь шъхьаIэр цIыфхэр къэухъумэгъэнхэр ары. Ащ пае лъэшэу тынаIэ атетэгъэты цIыфхэм ящынэгъончъэнрэ ошIэ-дэмышIагъэ зыхэлъ тхьамыкIагъохэр къэмыгъэхъугъэнхэмрэ. МашIом зыкъымыштэным пае зэшIохыгъэн фэе хэушъхьафыкIыгъэ пшъэрылъхэри щыIэх. Гупчэм мэшIогъэкIосэ къулыкъоу иIэм иIофшIэн шIуагъэу къытырэм джыри нахь зыкъыIэтынымкIэ техникакIэр амал дэгъу зэрэхъущтым сицыхьэ телъ», — къыхигъэщыгъ КъумпIыл Мурат.АР-м цIыфхэм якъэухъумэнкIэ ыкIи ошIэ-дэмышIагъэ зыхэлъ тхьамыкIагъохэр къэмыгъэхъугъэнхэмкIэ и Комитет итхьаматэ къыIуагъ къулыкъум ишIуагъэ къызэрэригъэкIырэм пае АР-м и ЛIышъхьэ зэрэфэразэр. Ащ къызэрэхигъэщыгъэмкIэ, мэшIогъэкIосэ автоцистернэхэмрэ чIыпIэ зэфэшъхьафхэм ащызекIон зылъэкIыщт автомобильхэмрэ пшъэрылъыкIэу къэуцухэрэм язэшIохынкIэ, техногеннэ нэшанэ зиIэ, ошIэ-дэмышIагъэ зыхэлъ тхьамыкIагъохэм якIэуххэм ядэгъэзыжьынкIэ яшIуагъэ къэкIощт.Республикэ бюджетым имылъкукIэ АР-м имэшIогъэкIосэ къулыкъу иподразделениехэм апае мэшIогъэкIосэ техники 2 тапэкIэ къащэфыгъагъ, IэпыIэгъу техникэм халъытэрэ зы машини ахэм ахэхьэ. Бюджетым къыхимыубытэрэ ахъщэмкIэ мэшIогъэкIосэ техники 2 къащэфыгъ ыкIи республикэм икъэралыгъо мылъку щыщ хъугъэ.
АР-м и ЛIышъхьэипресс-къулыкъу къытырэкъэбархэмкIэТхьаркъохъо Сафыет.