Iэшъынэ А.
Ащ пае республикэ бюджетым илъэсым ыкIэ нэс сомэ миллион 300 фэдиз къыхагъэкIыщт. Ар къыщиIуагъ КъумпIыл Мурат 2025-рэ илъэсым министрэхэм я Кабинет Iофэу ышIагъэр къызызэфехьысыжьым.
Президентым иунашъоу кIэлэегъаджэхэм лъытэныгъэу афашIырэм зыкъегъэIэтыгъэным тегъэпсыхьагъэм игъэцэкIэн Адыгеим джаущтэу щаублагъ. Партиеу «Единэ Россием» изэфэс къэралыгъом ипащэ къыщишIыгъэ гущыIэм имэхьанэ зэрэиныр Адыгеим и ЛIышъхьэ къыхигъэщыгъ. Ащ тегъэпсыхьэгъэ унашъом Владимир Путиныр кIэтхэжьыгъ. Ащ фэшI джыри зы пшъэрылъэу ЛIышъхьэм къышIыгъэр кIэлэегъаджэхэм адэIэпыIэгъэным тегъэпсыхьагъ.— Илъэс къэс Адыгеим иеджапIэхэмрэ икIэлэцIыкIу IыгъыпIэхэмрэ кIэлэегъэджэ ныбжьыкIэ 200 къякIуалIэ. Ау IофышIэхэмкIэ щыкIагъэхэр джыри щыIэх. Iофыгъор IэпыIэгъу зэфэшъхьафхэмкIэ зэшIотэхы. КIэлэегъаджэхэм ялэжьапкIэ зэблэхъугъэнымкIэ унашъо тштагъэ. Iоныгъом и 1-м къыщыублагъэу сыхьат 18 хъурэ шапхъэмкIэ кIэлэегъаджэм зэрамыхъокIырэ лэжьэпкIэ Iахьэу иIэщтыр анахь макIэу аратырэ пчъагъэр ары (сомэ 27093-рэ), — къыIуагъ КъумпIыл Мурат.Ащ ыпэкIэ АР-м и ЛIышъхьэ пшъэрылъ къыгъэуцугъагъ муниципальнэ псэупIэхэм ежьхэм IэпыIэгъу зэфэшъхьафхэм атегъэпсыхьэгъэ унашъохэр ащашIынхэу. Район пэпчъ ежь шIыкIэ хэхыгъэхэр иIэнхэ фае кIэлэегъаджэхэр къыращэлIэнхэм пае.