Мыекъопэ къэлэ администрациер
Донской къэралыгъо техническэ университетым и Дзэ егъэджэн гупчэ икурсант 200-м ехъумэ Мыекъуапэ присягэр щаштагъ. Ащ фэгъэхьыгъэ мэфэкI Iофтхьабзэр Мыекъуапэ идзэ частьхэм ащыщ щыкIуагъ. Урысыем ишъолъыр зэфэшъхьафхэм къарыкIыгъэ ныбжьыкIэ 200-м ехъумэ Хэгъэгум зэрэфэшъыпкъэщтхэмкIэ гущыIэ атыгъ.
Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард, Мыекъуапэ имэрэу Геннадий Митрофановыр, Донской къэралыгъо техническэ университетым иректорэу Бесарион Месхи, дзэ частым икомандование илIыкIохэр, ветеранхэр, динлэжьхэр, къулыкъушIэ хъугъэхэм янэ-ятэхэр.Урысыем и ЛIыхъужъэу Цэй Эдуард курсантхэм зафигъазэзэ хигъэунэфыкIыгъ:— Непэ къэралыгъом шъузэрэфэшъыпкъэщтымкIэ гущыIэ пытэ шъутыгъэ. Ар гущыIэ къодыеп, шъуищыIэныгъэ шъуемыблэжьэу Хэгъэгур къэухъумэгъэным шъузэрэфэхьазырыр шъор-шъорэу шъузэгупшысэгъэ лъэбэкъоу щыт. Псауныгъэ пытэ шъуиIэнэу, еджэным ыкIи дзэ сэнэхьатхэр зэжъугъэгъотынхэу, гъэхъагъэхэр ащышъушIынхэу сышъуфэлъаIо. Ныбджэгъу шъыпкъэхэр ренэу къыжъугорэтых, IэпыIэгъу зыщышъуищыкIагъэм командирхэр шъорэгъотых. Шъуи Хэгъэгу шIу шъулъэгъу, ащ шъуфэшъыпкъ. Шъо – зыщыгугъыхэрэ лIэуж, тикъэралыгъуи дзэми шъурянеущ!Мыекъуапэ ипащэу Геннадий Митрофановым ныбжьыкIэхэм шIуфэс гущыIэхэр ариIуагъ.
— «Хэгъэгум иухъумэкIо» гущыIэхэм сыд фэдэрэ такъикъи IэпыIэгъу хъуным фэхьазырынэу пшъэрылъ къагъэуцу, шъыпкъэныгъэ ыкIи пытагъэ ащ хэлъынэу щыт. Сицыхьэ телъ, апшъэрэ еджапIэм щыжъугъотыгъэ шIэныгъэхэм ыкIи IэпэIэсэныгъэм специалист дэгъу шъухъунымкIэ яшIуагъэ къызэрэшъокIыщтым. Ащ фэдэ мэхьанэ зиIэ унашъо шъушIынымкIэ къыжъудезыгъэштэгъэ ыкIи зэрифэшъуашэу шъузыпIугъэ ны-тыхэм хэушъхьафыкIыгъэу «тхьашъуегъэпсэу» ясэIо, — хигъэунэфыкIыгъ республикэм икъэлэ шъхьаIэ ипащэ.Джащ фэдэу Геннадий Митрофановым къызэрэхигъэщыгъэмкIэ, апшъэрэ еджапIэм и Дзэ егъэджэн гупчэ къэралыгъом изыкъэухъумэжьын гъэпытэгъэнымкIэ дзэ ыкIи техническэ инженерхэр къегъэхьазырых.Мэхьанэ зиIэ хъугъэ-шIагъэмкIэ ныбжьыкIэхэм къафэгушIуагъэх техническэ университетым иректорэу Бесарион Месхи, дзэкъулыкъушIэхэр ыкIи динлэжьхэр.Iофтхьабзэм икIэухым курсантищмэ псэогъу афэхъунэу къыхахыгъэ пшъашъэхэм щыIэныгъэ гъогум къадытехьанхэу зафагъэзагъ ыкIи а чIыпIэм ахэм гущыIэ щызэратыгъ. Нэужым патриотическэ орэдхэр къаIохэзэ, зэхэтхэу къырыкIуагъэх.