Хыныгъу-2026 (АМ)
Адыгеим бжыхьэсэ лэжьыгъэхэм яIухыжьын щылъагъэкIуатэ. ПстэумкIи гектар 112212-рэ ар хъущтыгъ. АР-м мэкъу-мэщымкIэ и Министерствэ бэдзэогъум и 22-м тызэрэщигъэгъозагъэмкIэ, ащ щыщэу 72034-р аIожьыгъах. Ар ызыныкъом нахьыб.
Бжыхьэсэ коцыр гектар 90005-рэ хъущтыгъ. Ащ 53665-м ехъу хагъэкIыгъ. Зы гектарым гурытымкIэ лъытагъэу, центнер 44,4-рэ къырахыжьы, тонн 238080-рэ мэхъу мы уахътэм къаугъоижьыгъэр.Хьэ гектар 8491-рэ республикэм щапхъыгъагъ. Ащ щыщэу 7895-р Iуахыжьыгъ. Зы гектарым гурытымкIэ центнер 34,2-рэ къырахы, тонн 27012-м ехъу къаугъоижьыгъ.Ахэм анэмыкIэу чылапхъэ ашIыщт рапсэу гектар 13586-рэ яIагъ, 10474-р аIожьыгъ, зы гектарым, гурытымкIэ центнер 25,1-рэ къеты, тритикалер гектари 130-рэ мэхъу, ащ джыри фежьагъэхэп.Бжыхьасэхэм яIожьынкIэ апэ итхэр Шэуджэн районым ичIыгулэжьхэр ары. Анахьыбэуи ахэм къырахы. Гектар 17324-у яIа- гъэм ипроцент 77-р, ар 13394-рэ, аIожьыгъах. Коцэу мы районым щыхалъхьагъэр гектар 14500-рэ хъущтыгъ, 10690-рэ хагъэкIыгъ. Зы гектарым, гурытымкIэ лъытагъэу, центнер 49,7-рэ къеты.КъырахыжьырэмкIэ ахэм ауж кIэкIэу итых Кощхьэблэ районым ичIыгулэжьхэр. ПстэумкIи бжыхьэсэ гектар 18986-у апхъыгъагъэм щыщэу 15284-р коцым рагъэубытыгъагъ, 10154-р Iуахыжьыгъ, центнер 48-рэ, гурытымкIэ лъытагъэу, къырахы.ЗэкIэмкIи комбайнэ 262-мэ республикэм ибжыхьасэхэр Iуахыжьых. Ахэм лэжьыгъэр зытырахыгъэу пстэумкIи гектар 34806-м ехъумэ уарзэр ащаупкIэтэжьыгъах, 1638-р ажъожьыгъ.ХЪУТ Нэфсэт.